ភ្នំពេញ ៖ កាលពីរសៀលថ្ងៃទី១២ ខែធ្នូ ឆ្នាំ២០១៧ក្នុង ឱកាសប្រារព្ធទិវាជាតិ អន្តរជាតិ ប្រឆាំងអំពើពុករលួយ ៩ធ្នូ ប្រព្រឹត្តទៅនៅវិទ្យាស្ថានបច្ចេកទេសកម្ពុជា ដែលមានការចូលរួមពីមន្ត្រីរដ្ឋាភិបាល មន្ត្រីអង្គភាពប្រឆាំងអំពើពុករលួយ គ្រូពេទ្យ ព្រះសង្ឃ សិស្ស និស្សិតប្រមាណ៤០០០នាក់ លោកទេសរដ្ឋមន្ត្រី ឱម យ៉ិនទៀង បានឲ្យដឹថា៖ ឆ្នាំ២០១៨ខាងមុខនេះអង្គភាពប្រឆាំងអំពើពុករលួយ (ACU) នឹងចាត់វិធានការបោសសម្អាតអំពើពុករលួយឲ្យមានប្រសិទ្ធភាព និងខ្លាំងក្លាបំផុត ដើម្បីធានាឲ្យសង្គមកម្ពុជាមួយនេះ មានយុត្តិធម៌ ស្អាតស្អំ តម្លាភាព និង គណនេយ្យភាព។
លោកទេសរដ្ឋមន្ត្រីអះអាងថា៖ អង្គភាពប្រឆាំងអំពើពុករលួយ គ្មានការដកថយឡើយក្នុងការបោសសម្អាតអំពើពុករលួយនៅក្នុងសង្គមកម្ពុជា ព្រោះអំពើពុករលួយ ជា«ឧបសគ្គ» ដែលរាំងស្ទះដល់កិច្ចអភិវឌ្ឍសង្គមគ្មានតម្លាភាព និងយុត្តិធម៌នៅក្នុងសង្គមកម្ពុជាបច្ចុប្បន្ន ហើយដើម្បីលុបបំបាត់ និងប្រឆាំងអំពើពុករលួយក្នុងសង្គម ។
អង្គភាពប្រឆាំងអំពើពុករលួយមិនត្រឹមតែពង្រឹងការតាមដានស៊ើបអង្កេតវែកមុខរកជនល្មើសប៉ុណ្ណោះទេ ប៉ុន្តែបានបញ្ចូលមេរៀនប្រឆាំងអំពើពុករលួយក្នុងកម្មវិធីអប់រំសិក្សាធិការជាតិចាប់ពីថ្នាក់ទី៤ ដល់ថ្នាក់ទី១២ ដើម្បីបណ្តុះផ្នត់ គំនិតឲ្យកុមារកម្ពុជាស្រលាញ់ភាពស្អាតស្អំ ស្រលាញ់យុត្តិធម៌ និងស្អប់អំពើពុករលួយ ដើម្បីភាពស្អាតស្អំដល់ទំពាំងស្នងឫស្សីរបស់ជាតិនៅថ្ងៃមុខផង ៕
