បន្ទាយមានជ័យ ៖ ថ្មីនេះៗមានប្រភពព័ត៌មានពីមន្ត្រីគយតូចតាចដែលស្និទ្ធនឹងលោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន ខេត្តបន្ទាយមានជ័យ បានឲ្យដឹងថា ការដែលលោក ញឹក ប៊ុនលេខ ហ៊ានធ្វើអ្វីៗតាមអំពើចិត្តគឺមានការសម្របសម្រួលពីសំណាក់មន្ត្រីគយធំៗក្នុងខេត្តបន្ទាយមានជ័យ និងក្រុមគយចល័តផងដែរ។
ចំណែកលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានរក្សាភាពស្ងៀមស្ងាត់ទុកឲ្យលោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន បង្កើនសកម្មភាពប្រព្រឹត្តអំពើពុករលួយតាមអំពើចិត្ត។ ហេតុនេះហើយទើបមានសេចក្តីអំពាវនាវឲ្យលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ចាត់វិធានការទប់ស្កាត់អំពើពុករលួយរបស់លោកប្រធានការិយាល័យគយច្រកទ្វារតំបន់បឹងត្រកួន ខ្លះផងកុំទុកអោយលោក ញឹក ប៊ុនលេខជិះសេះលែងដៃខ្លាំងពេក ។ ដោយហេតុថាមួយរយៈចុងក្រោយនេះលោក ញឹក ប៊ុនលេខ បានឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងគំហុកដោយសារអាងមានខ្នងបង្អែករឹងមាំ។
ប្រភពពីមន្ត្រីពាក់ព័ន្ធនៅច្រកទ្វារតំបន់បឹងត្រកួន ស្រុកថ្មពួក ខេត្តបន្ទាយមានជ័យ បានឲ្យដឹងថា បច្ចុប្បន្ននេះលោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន ប្រើតួនាទិនិងអំណាចរបស់ខ្លួនប្រព្រឹត្តអំពើពុករលួយខ្លាំងក្លាជាងមុនទៅទៀត។ ប្រភពបានឲ្យដឹងទៀតថា លោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន ឃុបឃិតឲ្យឈ្មួញធំៗ នាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗដោយគ្មានញញើតអ្វីទាំងអស់។ ជាងនេះទៅទៀតនៅច្រករបៀងក្បែរៗច្រកទ្វារតំបន់បឹងត្រកួន ក៏មានឈ្មួញនាំចូលម៉ូតូទំនើបៗអត់ពន្ធនិងទំនិញខុសច្បាប់យ៉ាងពេញបន្ទុកដែរ ព្រោះលោក ញឹក ប៊ុនលេខ គិតតែពីរឿងប្រមូលលុយដាក់ហោប៉ៅយ៉ាងត្រជាក់ចិត្ត។
សមត្ថកិច្ចពាក់ព័ន្ធនៅច្រកទ្វារតំបន់បឹងត្រកួនបានបង្ហើបឲ្យដឹងថា លោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន មិនត្រឹមតែឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់តាមអំពើចិត្តប៉ុណ្ណោះទេ គឺថែមទាំងឃុបឃិតកែឯកសារបន្លំប្រភេទទំនិញទៀតផង។ ទន្ទឹមនឹងនេះលោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន តែងប្រើឈ្មោះលោក គុណ ញឹម ដែលជាមេគយធំ ដើម្បីបិទបាំងទង្វើមិនប្រក្រតីនិងរឿងអាស្រូវពុករលួយរបស់ខ្លួនយ៉ាងក្រអឺតក្រទម។ សង្ឃឹមថាលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងហិរញ្ញវត្ថុ និងលោក ឱម យ៉ិនទៀង ប្រធានអង្គភាពប្រឆាំងអំពើពុករលួយនឹងចាត់វិធានការទប់ស្កាត់អំពើពុករលួយរបស់លោក ញឹក ប៊ុនលេខ ប្រធានការិយាល័យគយច្រកទ្វារតំបន់បឹងត្រកួន ជាមិនខាន។
ជុំវិញសេចក្តីរាយការណ៍ខាងលើនេះ អង្គភាពយើងខ្ញុំ មិនអាចសុំការបំភ្លឺពីលោក ញឹក ប៊ុនលេខ បានទេ ព្រោះពុំមានលេខទូរស័ព្ទទាក់ទង ៕
