រាជធានីភ្នំពេញ ៖ ទីតាំងលក់គ្រឿងសមុទ្រ នៅ(ផ្លូវត្រឡោកបែក) ស្ថិតនៅតាមបណ្ដោយផ្លូវលេខ៥៩៨ សង្កាត់ទឹកថ្លា ខណ្ឌសែនសុខ នៅព្រឹកថ្ងៃទី១៧ ខែមករា ឆ្នាំ២០២៤នេះត្រូវបាន មន្ត្រីនៃសាខា ក.ប.ប. រកឃើញមាន«បង្គា»មានចាក់ចាហួយ ចំនួន៩.៥គីឡូក្រាម ដោយបានដកហូតភ្លាមៗ និងចាត់វិធានការចំពោះម្ចាស់ទំនិញ ។
មន្ត្រីនៃសាខា ក.ប.ប. រាជធានីភ្នំពេញ បានអោយដឹងថា ក្រោមកិច្ចសហការជាមួយមន្ត្រីបច្ចេកទេស នៃនាយកដ្ឋានមន្ទីរពិសោធន៍ នៃអគ្គនាយកដ្ឋាន ក.ប.ប. និងអាជ្ញាធរដែនដី បាននាំយករថយន្តពិសោធន៍ចល័ត ផ្នែកម្ហូបអាហារ ចុះត្រួតពិនិត្យទីតាំងលក់គ្រឿងសមុទ្រ នៅលើផ្លូវត្រឡោកបែក សរុបចំនួន៩ទីតាំង ដោយបានដកយកគំរូសំណាក ចំនួន ២២គំរូ រួមមានមឹក បង្គា ក្តាម បង្កង ត្រីសមុទ្រ ។ល។ មកធ្វើតេស្ត និងវិភាគនៅក្នុងរថយន្តពិសោធន៍ចល័តផ្នែកម្ហូបអាហារ របស់អគ្គនាយកដ្ឋាន ក.ប.ប. ដើម្បីពិនិត្យនិងការពារក្រែងមានការដាក់លាយសារធាតុគីមីហាមឃាត់ផ្សេងៗ ដែលធ្វើឱ្យប៉ះពាល់ដល់សុខភាពអ្នកប្រើប្រាស់។ជាលទ្ធផល ក្រោយការពិនិត្យយ៉ាងហ្មត់ច៉ត់ មន្ត្រីយើងបានរកឃើញ «បង្គា» មានចាក់ចាហួយ ចំនួន៩.៥គីឡូក្រាម ដោយបានដកហូតភ្លាមៗ រួមទាំងចាត់វិធានការចំពោះម្ចាស់ទំនិញតាមនីតិវិធីផងដែរ ។
គួរជម្រាបដែរថា កាលពីថ្ងៃពុធ ទី១៤ ខែតុលា ឆ្នាំ២០២១ មន្ត្រីជំនាញ ក.ប.ប. បានរក ឃើញថាបង្គា និងបង្កងទឹកសាប ចំនួន៥០.៥០គីឡូក្រាម មានចាក់បញ្ចូលសារធាតុចាហួយ ដើម្បីកេងប្រវ័ញ្ចលើ ប្រជាពលរដ្ឋជាអ្នកប្រើប្រាស់ ។ ក្រោយពីបានត្រួតពិនិត្យ ឃើញដូចនេះ មន្ត្រីជំនាញបានធ្វើការពិន័យ និងណែនាំដល់ ម្ចាស់អាជីវកម្មឱ្យឈប់ប្រព្រឹត្តល្មើសនឹងច្បាប់ផងដែរ។ផលិតផលទំនិញ ជាគ្រឿងសមុទ្រលក់នៅតាម តាមបណ្តោយផ្លូវលេខ៥៩៨ ត្រឡោកបែក សមត្តកិច្ចបានដកយកគំរូបចំនួន ៤៥គំរូ រួមមាន ៖ មឹកក្លាសេ បង្គាក្លាសេ ក្តាម បង្កង ក្តាមប្រៃ ត្រីសមុទ្រ ត្រីបបែលក្លាសេ ព្រុយត្រីសមុទ្រក្លាសេ។ ល ។ មកពិសោធន៍ភ្លាមៗ នៅរថយន្តពិសោធន៍ចល័ត។ ជាលទ្ធផលក្នុងចំណោមគំរូ៤៥គំរូ រកឃើញបង្គារ មានចាក់ចាហួយ ចំនួន១៥គីឡូក្រាម ត្រូវបានដកហូត ហើយធ្វើកិច្ចសន្យាបញ្ឍប់ការ ទទួលទិញយកមកលក់ និងដាក់វិធានពិន័យអន្តរការណ៍ទៅតាមច្បាប់ ។គេនៅចាំបានថាមន្ត្រីក.ប.ប. ឆ្មក់បង្ក្រាបបានជាច្រើនលើកផ្សេងទៀត ផងដែរតែដូចជាមិរាងចាលអ្វីឡើយ ។បើចឹងមានតែប្រជាពលរដ្ឋគួប្រយត្ន័ខ្លួនផងទៅ៕
