ក្នុងសុន្ទរកថាសម្តេចអគ្គមហា ពញ្ញាចក្រី ហេង សំរិន ប្រធានរដ្ឋសភា ប្រធានកិត្តិយស គណបក្សប្រជាជនកម្ពុជា និងជាប្រធានក្រុមប្រឹក្សាជាតិរណសិរ្ស អភិវឌ្ឍន៍មាតុភូមិកម្ពុជា អានដោយឯកឧត្តម ច័ន្ទ សុផល អភិបាលនៃគណអភិបាលខេត្តបាត់ដំបង ក្នុងឪកាសអបអរ សាទរ ខួបអនុស្សាវរីយ៍លើកទី៣៧ ថ្ងៃបង្កើតរណសិរ្សសាមគ្គីសង្រោះ្គជាតិកម្ពុជា កាលពីថ្ងៃ ទី២ ខែធ្នូ នៅមហាស្រពស្ទឹងសង្កែបានបញ្ជាក់ថា ពិតមែនតែអស់រយៈកាល ៣៧ឆ្នាំកន្លងផុត ទៅ ប៉ុន្តែយើងទាំងអស់គ្នា ពិតជាមិនអាចបំភ្លេចបាន នូវអតីតកាល ដ៏័ងងឹតសូន្យសុង ដែល ពោរពេញទៅដោយទុក្ខវេទនា ការឈឺចាប់ខ្លោចផ្សារ និរាសព្រាត់ប្រាស់ក្នុងរយៈពេល៣ឆ្នាំ ៨ ខែ ២០ថ្ងៃ ក្រោមរបបកម្ពុជាប្រជាធិបតេយ្យខ្មែរក្រហមបានឡើយ។
ថ្ងៃ២ធ្នូ ឆ្នាំ១៩៧៨ រណសិរ្សសាមគ្គីសង្រោះ្គជាតិកម្ពុជា បច្ចុប្បន្នប្តូរឈ្មោះថារណសិរ្ស រណសិរ្សសាមគ្គីអភិវឌ្ឍន៍មាតុភូមិកម្ពុជា ដែលជាអង្គការចាត់តាំង មហាជនមួយឈានមុខ របស់គណបក្សប្រជាជនកម្ពុជា បានបដិសន្ធិឡើងក្នុងតំបន់រំដោះនាភូមិជើងឃ្លូ ឃុំ ២ធ្នូ ស្រុក ស្នួល ខេត្តក្រចេះ បានវាយផ្តួលរំលំ របបកម្ពុជាប្រជាធិបតេយ្យ រហូតទទួលបានជ័យជំនះ ដ៏ត្រចះត្រចង់ នាថ្ងៃ៧មករា ឆ្នាំ១៩៧៩។
មហាជ័យជំនះ ៧ មករា ១៩៧៩ បានបញ្ចប់នូ សម័យកាលដ៏ខ្មៅងងឹតបំផុត ដែលពុំធ្លាប់មាន ក្នុងប្រវិត្តសាស្ត្រកម្ពុជា បានបើកនូវសករាជថ្មី ប្រជាជនកម្ពុជា ក៏បានទទួលមកវិញ នូវសិទ្ធិសេរីភាព និងឪកាសដើម្បីស្តារ និងកសាង មាតុភូមិ របស់យើងឡើងវិញ។ បច្ចុប្បន្នប្រជាជនកម្ពុជា បានរស់នៅសុខុដុមរមនា ក្នុង សន្តិភាព សេរីភាព និងសន្តិសុខដ៏ប្រសើរ ហើយកំពង់រួមសាមគ្គីគ្នាឈានទៅមុខ លើមាគ៌ា នៃ ការអភិវឌ្ឍន៍ ដោយផ្អែកលើមូលដ្ឋាន នៃសមិទ្ធិផលទាំងឡាយ ដែលសម្រេចបានកន្លងមក។
៣៧ឆ្នាំកន្លងមកនេះ គណបក្សប្រជាជនកម្ពុជា និងប្រជាជនគ្រប់រូប បានស្ថិតស្ថេររួម រស់ជាមួយគ្នាក្នុងជួររណសិរ្ស ពុះពារឆ្លងឧបសគ្គ តូចធំទាំងឡាយយ៉ាងអង់អាចក្លាហានបំផុត ស្មារតី២ធ្នូ ស្មារតី ៧មករា ដែលបានចារឹកជាប់ ក្នុងមនុសិការ របស់ប្រជាជនគ្រប់រូប បានប្រែ ក្លាយទៅជា កម្លាំងយ៉ាងធំធេង ក្នុងការបង្កើតឡើងនូវ សមិទ្ធិផលធំៗ នៃសង្គមជាតិ ។ឥឡូវ នេះក្រោមពន្លឺនៃសន្តិភាព និងសេរីភាព និងក្នុងជំហរក្តាប់នូវ ជោគវាសនារបស់ខ្លួន យើងជឿ ជាក់ថា និងគ្មានការកើតឡើងជាថ្មីទៀត នូវសោកនាដកម្ម ដូចក្នុងអតីតកាលឡើយ។
ខ្ញុំសូមអំពាវនាវដល់គណកម្មាធិការគណបក្សប្រជាជនកម្ពុជាគ្រប់ថ្នាក់ មន្ត្រីរាជការ សមាជិក សមាជិកា សកម្ម នៃរណសិរ្ស គ្រប់ថ្នាក់ សូមលើកកំពស់ស្មារតី ថែរក្សាឯកភាព ផ្ទៃក្នុង ប្រកាន់ខ្ជាប់ប្រពៃណីស្នេហាជាតិ ផ្សាភ្ជាប់ជាមួយប្រជាជន ហើយខិតខំបញ្ចេញអស់ កម្លាំងកាយចិត្ត ក្នុង ការបំរើប្រទេសជាតិ តាមមាគ៌ានយោបាយ របស់គណបក្សប្រជាជន កម្ពុជា និងកម្មវិធីនយោបានរបស់រាជរដ្ឋាភិបាល។ ត្រូវចងចាំថា នេះជាគោលបំណង និង ឧត្តមគតិឥតប្រែប្រួល របស់រណសិរ្ស និងគណបក្សប្រជាជនកម្ពុជាយើង ៕
