ខេត្តស្ទឹងត្រែង ៖ សមត្ថកិច្ចចម្រុះខេត្ត នៅរសៀលថ្ងៃ១៤ធ្នូ បានរួមគ្នាធ្វើការប្រដេញស្ទាក់ចាប់បានរថយន្តសាំយ៉ុងដឹកជញ្ជូន៤គ្រឿង គ្រារថយន្តទាំងនោះ បាននិងកំពុងផ្ទុកទៅដោយក្តារ បើកចេញពីស្រុកថាឡាបរិវ៉ាត់ ឆ្លងកាត់ដីក្រុងស្ទឹងត្រែង ហើយសមត្ថកិច្ចបានស្ទាក់ចាប់បាន នៅរង្វង់មូលផ្លូវបំបែកជា៣ នៃចំណុចប្រសពអូរពងមាន់ ស្ថិតនៅក្នុងដីក្រុងស្ទឹងត្រែង ។
ស្នងការនគរបាលស្តីទីខេត្តស្ទឹងត្រែង លោកឧត្តមសេនីយ៍ត្រី ឌៀប ចន្ធី បានប្រាប់ឲ្យដឹងថា រថយន្តដឹកឈើដែលរងការបង្ក្រាបនេះ ជាប្រភេទរថយន្តសាំយ៉ុង ចំនួន៤គ្រឿង រថយន្តទាំងនេះ បានផ្ទុកទៅដោយឈើក្តារប្រភេទលេខ២ បានដឹកជញ្ជូនឈើចេញពីក្នុងភូមិសាស្ត្រស្រុកថាឡាបរិវ៉ាត់ យ៉ាងអនាធិបតេយ្យបំផុត ក្នុងបំណងនាំឆ្ពោះទៅកាន់ទីផកសារគោលដៅ។ លោកថា រថយន្តដឹកឈើទាំង៤គ្រឿងនោះ ត្រូវបានមន្ត្រីនគរបាលជំនាញខេត្តបានកសាងសំណុំរឿង ហើយបាននាំយកមកប្រគល់ទៅឲ្យមន្ត្រីព្រៃឈើខេត្តចាត់ការជាបន្ត។ ចំណែកម្ចាស់រថយន្តដឹកឈើទាំងនេះបានគេចខ្លួនអស់ទៅហើយ ។
ដោយឡែកនៅថ្ងៃ១៣ធ្នូសមត្ថកិច្ចចម្រុះខេត្ត ក៏បានធ្វើការប្រដេញស្ទាក់ចាប់បានរថយន្តសាំយ៉ុង៦គ្រឿងផងដែរ នៅគ្រាដែលរថយន្តទាំងនោះ បានផ្ទុកដោយឈើមូលធំៗ ហើយវែងៗ ដោយដឹកចេញពីស្រុកថាឡាបរិវ៉ាត់ តែត្រូវចាប់បាននៅដីក្រុងស្ទឹងត្រែងផងដែរ។
សូមបញ្ជាក់ថា រយៈពេលពីរថ្ងៃបន្តបន្ទាប់គ្នានេះ សមត្ថកិច្ចបានបង្ក្រាបរថយន្តដឹកឈើ បាន១០គ្រឿង ប្រគល់ទៅឲ្យមន្ត្រីព្រៃឈើ ចាត់ការជាបន្តទៅតាមច្បាប់៕
