ក្រចេះ៖ ល្បែងកន្ទុយលេខ សព្វថ្ងៃនេះកំពុងរីកដុះដាល ដូចផ្សឹតនៅក្នុងខេត្តក្រចេះ ហើយគេក៏មិនដែលឃើញអាជ្ញាធរមានសមត្ថកិច្ចណាមួយមានវិធានការអ្វីបន្តិចសោះឡើយ។
បើតាមការសង្កេតគេតែងឃើញល្បែងលក់ និងចាក់កន្ទុយលេខនេះ ភាគច្រើនកើតមាន នៅក្នុងក្រុងក្រចេះ ក្រៅពីនោះក៏មាននៅតាមបណ្តាស្រុកមួយចំនួនទៀតដូចជា ស្រុកចិត្របុរី ស្រុកសំបូរ ស្រុកព្រែកប្រសព្វ ស្រុកស្នួល និងស្រុកឆ្លូង។ ចំណែកមេកន្ទុយលេខដែលធំៗជាងគេ ភាគច្រើនមានលំនៅដ្ឋានក្នុងសង្កាត់ក្រចេះ ក្រុងក្រចេះ ខេត្តក្រចេះតែម្តង។
បើយោងតាមប្រភពនានា បានឱ្យដឹងថា ការប្រព្រឹត្តិទៅ នៃការចាក់លក់សុីសងគ្នា រវាងអ្នកចាក់ និងអ្នកលក់ គឺក្នុងមួយថ្ងៃសម្រាប់ឆ្នោតយួន គេលេងសុីសងគ្នាចំនួនពីរលើក ដោយគេ កំណត់ចេញកន្ទុយលេខសីុសងគ្នា នៅម៉ោង ៤នឹង៤៥នាទីម្តង និងនៅម៉ោង៦នឹង៣០នាទី ល្ងាចម្តងទៀត។ ចំពាក់មេកន្ទុយ លេខតូចៗ ដែលបានដាក់តុ រឺជិះម៉ូតូដើរលក់ចល័ត រឺលក់នៅតាមផ្ទះនានាវិញ នៅពេលដែលគេឡើងលេខ ពីមេតូច ទៅមេធំ គឺគេប្រើប្រព័ន្ធឡាញ LINE រឺប្រព័ន្ធវាត់ស្អាប់ WhatsApp ។ ដូច្នោះ រាល់ការបង្ក្រាប ពីសំណាក់អាជ្ញាធរ មានសមត្ថកិច្ច ទៅលើមេកន្ទុយលេខធំៗនោះ គឺវាជួបការលំបាក ប៉ុន្តែបើសមត្ថកិច្ច ចុះបង្ក្រាបកន្លងមក គឺចាប់បានតែមេកន្ទុយលេខតូច តាចល្អិតល្អោចតែប៉ុណ្ណោះ។
ប្រភពពីប្រជាពលរដ្ឋ បានលើងឡើងថា បានជាសមត្ថកិច្ចមិនធ្វើការបង្ក្រាបកន្លែងលក់ឆ្នោតធំៗនៅក្រុងក្រចេះ ដោយសារតែមេឆ្នោតគ្រាក់ៗទាំងនោះបង់ឲ្យជាខែរួចអស់ទៅហើយ ។
ពាក់ព័ន្ធនិងល្បែងកន្ទុយលេខ ដែលកំពុងតែរីកដុះដាល នៅក្នុងខេត្តក្រចេះនោះ អាជ្ញាធរ មានសមត្ថកិច្ច គ្រប់ លំដាប់ថ្នាក់ មិនគួរមើលរំលងនោះទេ ត្រូវតែមានវិធានការ ជាបន្ទនាន់ ដើម្បីឲ្យភូមិឃុំមានសវត្ថិភាព ស្របតាមគោលនយោបាយ របស់រាជរដ្ឋាភិបាលកម្ពុជា ស្តីពីភូមិឃុំមានសុវត្ថិភាព៕