ខេត្តក្រចេះ ៖ មេបញ្ជាការកងអនុសេនាធំលេខ៣ នៅក្នុងស្រុកស្នួល ខេត្តក្រចេះ លោក ហ៊ត់ ប៊ុនគីម ដែលល្បីខ្លាំងខាងដឹកជញ្ជូនឈើប្រណីតឆ្លងដែនទៅលក់ឲ្យឈ្មួញវៀតណាម និងបើកសង្វៀនមាន់ ត្រូវបានដកចេញពីតំណែង។
លោក ហ៊ត់ ប៊ុនគីម ត្រូវបានដកចេញពីតំណែងកាលពីថ្ងៃទី៤ ខែធ្នូ ឆ្នាំ២០១៧ឲ្យទៅបម្រើការងារនៅក្នុងបន្ទាយប្រតិបត្តិការសឹករងខេត្តក្រចេះ ដោយដាក់ជំនួសមេបញ្ជាការរង ឈ្មោះ ជា វណ្ណៈ ឲ្យឡើងកាន់តំណែងនេះ។ ប្រភពពីមន្ត្រីបានឲ្យដឹងថា លោក ហ៊ត់ ប៊ុនគីម ត្រូវបានដកពីតំណែងនេះ ដោយសារនាពេលថ្មីៗកន្លងមកនេះ រថយន្តដឹកឈើប្រណីតខុសច្បាប់មួយគ្រឿងបានបើកបំបុករថយន្តរបស់មន្ត្រីកងរាជអាវុធហត្ថ ដែលព្យាយាមស្ទាក់ចាប់ឈើខុសច្បាប់ នៅក្នុងឃុំគ្រញូង សែនជ័យ ស្រុកស្នួល ខេត្តក្រចេះ មុននឹងបើកគេចចូលទៅក្នុងបន្ទាយរបស់ខ្លួន។
មានសេចក្តីរាយការណ៍ថា លោក ហ៊ត់ ប៊ុនគីម មេបញ្ជាការកងអនុសេនាធំលេខ៣ នៃវរសេនាតូចព្រំដែនគោកលេខ២០៤ របស់ខេត្តក្រចេះរូបនេះមានរឿងជាច្រើនទាក់ទងនឹងការដឹកឈើប្រណីតខុសច្បាប់នេះ កន្លងមកក៏មានករណីស្រដៀងគ្នាដែរ គឺគំនរឈើត្រូវបានទម្លាក់ចុះពីរថយន្ត១គ្រឿង ដែលបានខូចនៅពេលកំពុងដឹកជញ្ជូនឆ្លងដែនទៅលក់ឲ្យឈ្មួញឈើវៀតណាម តាមច្រករបៀង០៦ ក្បែរបង្គោលព្រំដែនថ្មីលេខ៦៥ ស្ថិតក្នុងឃុំគ្រញូងសែនជ័យ ស្រុកស្នួល ខេត្តក្រចេះ។ ក្រៅពីនេះមេបញ្ជាការកងអនុសេនាធំលេខ៣ដែលល្បីខាងបទល្មើសព្រៃឈើរូបនេះ ក៏បានផ្តល់ទីតាំងលាក់ទុកឈើនៅក្នុងទីបញ្ជាការដ្ឋានរបស់ខ្លួន សម្រាប់ស្តុកឈើផងដែរ។
បើតាមប្រជាពលរដ្ឋ និងមន្ត្រីមូលដ្ឋាននៅក្នុងឃុំគ្រញូងសែនជ័យ ស្រុកស្នួល ខេត្តក្រចេះ បានឲ្យដឹងថា មេបញ្ជាការរូបនេះ បានឲ្យភរិយារបស់ខ្លួន ដែលគេហៅថា ចែ វី ដើរប្រមូលទិញឈើពីតំបន់ផ្សេងៗ ក្នុងទឹកដីខេត្តមណ្ឌលគិរី ដោយដឹកជញ្ជូនតាមរថយន្តតូចៗ យកមកគរស្តុកទុកនៅក្នុងទីបញ្ជាការកងអនុសេនាធំលេខ៣នេះ មុននឹងលើកដាក់រថយន្តកែច្នៃធុនធំៗ ដើម្បីដឹកបន្តចេញទៅលក់នៅក្នុងទឹកដីវៀតណាម តាមច្រករបៀងង៉ាំ០៦ ឬហៅថា ផ្លូវរបស់ក្រុមធីធីវ៉ាយ៕