មណ្ឌលគិរី៖ ទោះបីជាលោក អ៊ុក សំណាង ស្នងការនគរបាលខេត្តមណ្ឌលគិរី ដាក់ចេញវិធានការតឹងតែងក្នុងការបង្ក្រាបបទល្មើសព្រៃឈើក៏ដោយក៏នាពេលថ្មីៗនេះមានសេចក្តីរាយការណ៍មកថា៖នៅស្រុកពេជ្រាដា ឯណោះវិញបទល្មើសដឹកជញ្ជូនឈើចេញទៅស្រុកយួនតាមច្រកទ្វេភាគីណាំលៀនៅតែកើតមានយ៉ាងអនាធិបតេយ្យ ជាពិសេសនៅពេលយប់។ ប្រជាពលរដ្ឋដែលរស់នៅក្បែរច្រកណាំលៀ បានឲ្យដឹងថា រយៈ៥ថ្ងៃកន្លងទៅនេះគឺក្នុងមួយយប់ៗឈ្មួញដឹកជញ្ជូនឈើតាមរថយន្តឡង់គ្រឺស័រកែច្នៃ និងរថយន្តផ្សេងៗទៀតមិនតិចជាងពី៣០ទៅ៤០គ្រឿងឡើយតាមច្រកណាំលៀដែលគ្រប់គ្រងដោយសំរឹតណយ។
ដោយសារមានឡានដឹកឈើចេញយ៉ាងងងើលបែបនេះធ្វើឲ្យប្រជាពលរដ្ឋជឿថា៖មេនគរបាលប៉ុស្ដិ៍ច្រកណាំលៀ ឬប៉ុស្ដិ៍៧ និងសមត្ថកិច្ចពាក់ព័ន្ធប្រចាំច្រកនេះគឺ ជាអ្នកឃុបឃិតឲ្យឈ្មួញដឹកជញ្ជូនឈើចេញទៅស្រុកយួនយ៉ាងរលូនដើម្បីជាថ្នូរនឹងផលប្រយោជន៍តែម្តង។
ប្រភពពីមន្ត្រីអាជ្ញាធរមូលដ្ឋានក្នុងស្រុកពេជ្រាដា បានឲ្យដឹងថា៖ ឈើដែលឈ្មួញសម្រុកដឹកជញ្ជូនចេញទៅស្រុកយួនរយៈពេលប៉ុន្មានយប់កន្លងទៅនេះ គឺជាឈើដែលគេប្រមូលទិញនៅតំបន់ក្រងតេះ និងតំបន់ចំការកៅស៊ូបារាំង។ ជាងនេះទៅទៀតមានឈ្មួញមួយចំនួនបានប្រមូលប្រជាពលរដ្ឋឲ្យចូលកាប់ឈើក្នុងព្រៃអភិរក្ស ព្រៃការពារ និងតំបន់ដែនជម្រកសត្វព្រៃភ្នំណាំលៀ ហើយពួកគេប្រមូលទិញឈើទាំងនោះដឹកជញ្ជូនចេញទៅស្រុកយួនតាមច្រកណាំលៀ យ៉ាងគគ្រឹកគគ្រេងដោយគ្មានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការបង្ក្រាបនោះទេ។
សូម្បីតែមន្ត្រីគណៈកម្មការបង្ក្រាបនិងទប់ស្កាត់បទល្មើសព្រៃឈើដែលកំពុងឈរជើងនៅខេត្តមណ្ឌលគិរី ក៏មិនចាត់វិធានការបង្ក្រាបបទល្មើសដឹកជញ្ជូនឈើចេញទៅស្រុកយួនតាមច្រកណាំលៀនោះដែរធ្វើឲ្យមានការសង្ស័យថាពួកគេទទួលបានលាភសក្ការៈពីបទល្មើសឬក៏មកពីគ្មានសមត្តភាពតែម្តង។
សមត្ថកិច្ចមូលដ្ឋានក្នុងស្រុកពេជ្រាដា បានឲ្យដឹងថា ថ្មីៗកន្លងទៅនេះមេបញ្ជាការអាវុធហត្ថខេត្តមណ្ឌលគិរី និងលោក អ៊ុក សំណាង ស្នងការនគរបាលខេត្តមណ្ឌលគិរី បានចេញបទបញ្ជាឲ្យកូនចៅចុះត្រួតពិនិត្យមើលបទល្មើសព្រៃឈើនៅក្នុងស្រុកពេជ្រាដា ជាពិសេសសកម្មភាពដឹកជញ្ជូនឈើចេញទៅស្រុកយួនតាមច្រកទ្វេភាគីណាំលៀ។
ក៏ប៉ុន្តែជាក់ស្ដែងបទល្មើសកាប់ឈើនិងដឹកជញ្ជូនឈើចេញទៅស្រុកយួននៅតែកើតឡើងយ៉ាងពេញបន្ទុក ហើយជួនកាលគ្រាន់តែ១យប់សោះឈ្មួញអាចដឹកជញ្ជូនឈើចេញទៅស្រុកយួនតាមរថយន្តឡង់គ្រឺស័រកែច្នៃនិងរថយន្តផ្សេងៗទៀតពី៣០ទៅ៤០គ្រឿងយ៉ាងរលូន។ តើមកពីហេតុអ្វី?!៕
