ខេត្តរតនគិរី ៖ កម្លាំងរបស់ព្រះរាជអាជ្ញាសាលាដំបូងខេត្តរតនគិរីបានឃាត់រថយន្តដឹកឈើប្រណីតមួយគ្រឿង ខណៈកំពុងធ្វើចរាចរណ៍ដឹកឈើនៅក្បែររង្វង់មូលយាយទូលចេក ដែលការឃាត់នេះធ្វើឡើងនៅវេលាម៉ោង២និង៣០នាទីឈាន ចូលថ្ងៃទី៨ ខែឆ្នូ ឆ្នាំ២០១៧ ស្ថិតនៅភូមិ១ សង្កាត់កាចាញ ក្រុងបានលុង។
តាមសមត្ថកិច្ចបានឲ្យដឹងថា រថយន្តមួយគ្រឿងដែលឃាត់នោះម៉ាកបាឡែន ពណ៌ស ពាក់ស្លាកលេខកំពង់ចាម 2A-2529 បើកពីលិចទៅកើត ចូលក្រុងបានលុង ខណៈនោះកម្លាំងរបស់ព្រះរាជអាជ្ញាឈប់រថយន្តនៅក្បែររង្វងមូលយាយទូលចេក បានប្រទះឃើញក៏សង្ស័យរថយន្តនេះដឹកបទល្មើសក៏បានហៅឲ្យឈប់ ហើយបានឆែកឆេររកឃើញឈើប្រណីតប្រភេទធ្នង់ និងនាងនួនពេញរថយន្តតែម្តង។ ចំណែក អ្នកបើកបរបានរត់គេចខ្លួនបាត់បន្សល់ទុករថយន្តនៅកន្លែងកើតហេតុ។
កម្លាំងរបស់ព្រះរាជអាជ្ញា បានរាយការណ៍ជូនទៅកម្លាំងជំនាញរដ្ឋបាលព្រៃឈើផ្នែកលំផាត់ ហើយ កម្លាំងជំនាញបានរឹបអូសយកមកខណ្ឌរដ្ឋបាលព្រៃឈើ ដើម្បីធ្វើការវាស់វែងចំនួនឈើនៅក្នុងរថយន្តនោះ។
ដោយឡែក ម្ចាស់រថយន្តដឹកបទល្មើសសមត្ថកិច្ចជំនាញឲ្យចូលខ្លួនមកដោះស្រាយគ្នាតាមច្បាប់ព្រៃឈើ៕