ខេត្តរតនគិរី ៖ កាលពីថ្ងៃទី ៤ និងទី៥ ធ្នូ សង្វៀនជល់មាន់កូនប្រសារលោក ហ៊ុន សាន នៅទន្លេបាទីខេត្តតាកែវ និងអរីយក្សត្រខេត្តកណ្តាល ត្រូវបានសមតត្តកិច្ចបង្ក្រាបតាមបញ្ជារនាយករដ្ឋមន្ត្រី។ ផ្ទុយទៅវីញ សព្វថ្ងៃសង្វៀនជល់មាន់មួយកន្លែងទៀតដែលមានទីតាំងនៅភូមិប៉កធំ ឃុំប៉ក់ញ៉ៃ ស្រុកអូរយ៉ាដាវដែលគេដឹងថាមានថៅកែឈ្មោះលោក សុខ គឹមសាន្ត មិនត្រូវបានសមត្តកិច្ចខេត្តរតនៈគិរី បង្ក្រាបឡើយ ដែលថ្វើឲ្យមានចំងល់ថាស្រុកខ្មែរតែមួយម៉េចក៏មានស្តង់ដាអនុវត្តច្បាប់ពីរ?។
បើតាមការឲ្យដឹងពីប្រភពអ្នកញៀនល្បែងថាៈ សង្វៀនជល់មាន់ដុះស្លែមួយកន្លែង ដែលមានទីតាំងនៅភូមិប៉កធំ ឃុំប៉ក់ញ៉ៃ ស្រុកអូរយ៉ាដាវ បានដំណើរលេងអស់រយៈពេលជាង៥ឆ្នាំមកហើយ ទាំងគេស្គាល់ច្បាស់ថាៈ ម្ចាស់សង្វៀនដ៏ល្បីល្បាញមួយនេះមានឈ្មោះសុខ គឹមសាន្ត តែងតែបើកឲ្យខ្មែរលេងប្រជល់មាន់ជារៀងរាល់ថ្ងៃ មានការភ្នាល់លុយរាប់ពាន់ដុល្លារអាមេរិក។
បើមានគូរណាត់ពិសេសមកពីកំពង់ចាម ត្បូងឃ្មុំ ស្ទឹងត្រែង។ល។ ក្នុង១គូរគេចាក់ចាប់ពី ពីរពាន់ដុល្លារ(២ ០០០$)ទៅដល់រាប់ម៉ឺនដុល្លារឯណោះ។ ក្រៅពីល្បែងជល់មាន់ដែលអ្នកញៀនហៅថា បក្សីកីឡាពលរដ្ឋខ្មែរដែលចូលលេងបំពានបំរាមនាយករដ្ឋមន្ត្រីតេជោសែន មានលេងល្បែងស៊ីសងជាច្រើនប្រភេទផ្សេងដូចជា បៀរ អាប៉ោង និងយ៉ូគី ។ ទីតាំងបនល្បែងជល់មាន់និងបៀរយូគីរបស់លោកសុខគឹមសាន្តបានធ្វើឲ្យពលរដ្ឋខ្មែរខ្លះលង់ខ្លួនលក់ ឬ បញ្ចាំ ទ្រព្យសម្បត្តិដោយសារចូលទៅលេងល្បែង។ផ្ទុយទៅវិញសមត្តកិច្ចពិសេស លោក សុខ គឹមសាន្ត កាន់តែមានបានទៅវិញ។
ប្រភពពីក្រុមអ្នកដែលចូលទៅលេងជល់មាន់ក្នុងសង្វៀននេះបានឲ្យដឹងថា ក្រៅពីលោក សុខ គឹមសាន្ត ដែលជាអ្នកមានឥទ្ធិពលនៅសង្វៀនជល់មាន់នេះ ក៏នៅមានមនុស្សម្នាក់ទៀតឈ្មោះ និន ចាន់តារា ហៅ យ៉ាត ជាមន្ត្រីនគរបាលការពារព្រំដែនលេខ៦២៣ ដែលមានតួនាទីជាប្រធានច្រករបៀងភ្នំក្រហម ក៏ជាអ្នកមានឥទ្ធិពលនៅក្នុងសង្វៀនជល់មាន់ដុះស្លែនេះដែរ។
ទាក់ទងទៅនឹងសង្វៀនជល់មាន់ខាងលើនេះ លោកឧត្តមសេនីយ៍ទោ ងួន គឿន ស្នងការនគរបាលខេត្តរតនគិរីបានឲ្យដឹងតាមទូរស័ព្ទថា កន្លងមានច្បាប់ ប៉ុន្តែឥឡូវអត់សុពលភាព ឬយ៉ាងណានោះ អត់ទាន់ដឹងទេ។ លោកទទួលស្គាល់ថា រឿងថាមានពលរដ្ឋខែ្មរចូលលេងនោះវាជារឿងខុសច្បាប់ ។
ឯកឧត្តម ញ៉ែម សំអឿន អភិបាលរងខេត្តរតនគីរី និងជាអ្នកនាំពាក្យបានបញ្ជាក់ថា ឯកឧត្តមអត់បានដឹងទេ ដឹងត្រឹមថាមានកាស៊ីណូ ទ្រី ភាព នៅទីនោះ ចាំគាត់ទាក់ទងទៅអាជ្ញាធរស្រុកអូរយ៉ាដាវ បើមានបែបនោះត្រូវលប់បំបាត់មិនឲ្យមានទេ ព្រោះវាអាចមានចោរកម្ម អំពើហឹង្សាក្នុងគ្រួសារ ។ ប្រជាពលរដ្ឋនៅខេត្តរតនគិរី ហួសចិត្តនឹងអ្នកគ្រប់គ្រងក្នុងខេត្តដែលម្នាក់ៗតែងតែឆ្លើយថា “មិនដឹងទេ?” “ចាំឲ្យគេចុះទៅមើល” !!?។ចឹងបានគេថាស្រុកខ្មែរការអនុវត្តន៍មានស្តង់ដារពីរនោះ!។
