ភ្នំពេញ៖ លោក ស៊ុយ សែមរដ្ឋមន្ត្រីក្រសួងរ៉ែ និងថាមពល បានឲ្យដឹងនៅព្រឹកថ្ងៃទី២៣ ខែវិច្ឆិកា ឆ្នាំ២០១៧ថា កម្ពុជានឹងចាប់ផ្តើមផលិតប្រេងនៅឆ្នាំ ២០១៩ ខាងមុខនេះដោយក្រុមហ៊ុនសិង្ហបូរី ដែលអាចផលិតប្រេងកាតបាន ៣១ លានបារ៉ែល នៅដំណាក់កាលទី ១ ក្នុងប្លុកA និងប្លុកB ខណៈប្លុក C ក្រុមហ៊ុនម៉ាឡេស៊ី កំពុងសិក្សាស្រាវជ្រាវ និងប្លុកផ្សេងទៀតមានក្រុមហ៊ុនបរទេសកំពុងដាក់ពាក្យសុំរុករកបន្ថែម ។ បើតាមលោកស៊ុយសែមកម្ពុជាមានប្រេងកាតទាំងនៅក្នុងសមុទ្រនិងលើគោកមានចំនួន ២៥ ប្លុក ដែលអាចផលិតប្រេងបានចំនួន៥លានតោនក្នុងមួយឆ្នាំៗ ។
ធ្វើបឋាកថាចែករំលែកចំណេះដឹង និងបទពិសោធន៍លើប្រធានបទស្តីពី”យន្តការគ្រប់គ្រងវិស័យរ៉ែ និងឋាមពលនៅកម្ពុជានិងការបង្ការទប់ស្កាត់ផលប៉ះពាល់ធនធានធម្មជាតិ” ជូនគ្រូនគរបាលជាតិមន្ត្រីនគរបាលជាតិ និង និស្សិត សិក្ខាកាម នៅបណ្ឌិតសភានគរបាលកម្ពុជា លោករដ្ឋមន្ត្រីបានបន្តថាតំបន់ប្រេងនៅសមុទ្រគឺមានចំនួន៦ប្លុក គឺប្លុក A.B.C.D.E និងប្លុកF។
ប្លុកA និងប្លុកBនឹងចាប់ផ្តើមផលិតនៅឆ្នាំ២០១៩ខាងមុខនេះ ដោយក្រុមហ៊ុនគ្រីស អេនើជី របស់ប្រទេសសិង្ហបូរីដែលអាចផលិតបាននៅដំណាក់កាលទី១ បានចំនួន ៣១ លានបារ៉ែល ហើយប្លុក Cមានក្រុមហ៊ុនម៉ាឡេស៊ីកំពុងសិក្សាស្រាវជ្រាវនិងប្លុកមួយចំនួនទៀតមានក្រុមហ៊ុនផ្សេងកំពុងដាក់ពាក្យសុំរុករកស្រាវជ្រាវនាពេលឆាប់ៗនេះផងដែរ។
សម្រាប់តំបន់ប្រេងនៅលើគោកវិញ គឺបានរកឃើញនៅខេត្តកំពង់ធំ ដោយមានចំនួន ១៩ ប្លុក ។
ក៏ប៉ុន្តែនាពេលបច្ចុប្បន្ននេះមានក្រុមហ៊ុនភីត្រូ របស់វៀតណាមកំពុងបានដាក់ពាក្យសុំសិក្សាស្រាវជ្រាវ ។ ចំនួន១៨ប្លុកទៀតគឺពុំទាន់មានក្រុមហ៊ុនណាមួយស្ម័គ្រចិត្តទាន់ចូលនោះឡើយ។ នៅដើមឆ្នាំ២០១៨ ខាងមុខនេះ ក្រសួងរ៉ែនិងថាម ពល នឹងដាក់សេចក្តីព្រៀងច្បាប់ស្តីពីប្រេងកាតនៅកម្ពុជា ជូនទៅទីស្តីការគណៈរដ្ឋមន្ត្រីដើម្បីពិនិត្យនិងអនុម័ត ៕
