ភ្នំពេញ៖ លោកឃួង ស្រេង អភិបាលរាជធានីភ្នំពេញ បាន ជំរុញ ឲ្យមន្ត្រីពាក់ព័ន្ធនិងក្រុមហ៊ុនទំលាក់ខ្សែកាបទៅក្នុងដី អនុវត្តការងារឲ្យបានលឿន និងទាន់ពេលវេលា ដើម្បីកាត់បន្ថយការថ្នាំងថ្នាក់ពីប្រជាពលរដ្ឋ។ ក្រុមហ៊ុនខ្សែកាបទាំងអស់ត្រូវពន្លឿនការងារជីកកប់ខ្សែកាបក្រោមដីឲ្យបានលឿន បើពុំនោះទេ និងធ្វើការផាកពិន័យ ។
ការជម្រុញបែបនេះ របស់លោកឃួង ស្រេង បានធ្វើឡើង កាលពីរសៀលថ្ងៃទី២៣វិច្ឆិកាក្នុងកិច្ចប្រជុំជាមួយ មន្ត្រីរដ្ឋបាលរាជធានី ភ្នំពេញ មន្ទីរពាក់ព័ន្ធ និងក្រុមហ៊ុនឯកជន ខ្សែកាប ត្រូវជីកកប់ខ្សែកាប ទៅក្នុងដី ដើម្បីជម្រុញអោយភាគីពាក់ព័ន្ធទាំងអស់នោះត្រូវអនុវត្តការងារនេះអោយបានលឿន ទាន់ពេលវេលានិងកាត់បន្ថយបានការថ្នាំងថ្នាក់ពីប្រជាពលរដ្ឋ។
អ្នកនាំពាក្យរដ្ឋបាលរាជធានីភ្នំពេញ លោកម៉េត មាសភក្តី បានអោយដឹងក្រោយកិច្ចប្រជុំនេះថា៖ កន្លងមកនេះមានក្រុមហ៊ុនខ្សែកាបមួយចំនួន ខណៈទំលាក់ខ្សែកាបចូលទៅក្រោមដីវិញ ឃើញថាបានបំពេញការងារបានល្អ តែក្នុងនោះក៏មានក្រុមហ៊ុនឯកជននេះមួយចំនួនអនុវត្តការងារមិនទាន់បានល្អផងដែរ ដែលជាហេតុបង្កអោយមានការថ្នាំងថ្នាក់ពីប្រជាពលរដ្ឋ ។ ដោយមើលឃើញពីបញ្ហានេះ ទើបលោកឃួង ស្រេងអភិបាលរាជធានីភ្នំពេញ បើកអោយមានកិច្ចប្រជុំជាមួយភាគីពាក់ព័ន្ធនេះឡើង ដើម្បីធ្វើយ៉ាងណាអោយមន្ត្រីពាក់ព័ន្ធនិងក្រុមហ៊ុនទំលាក់ខ្សែកាបទៅក្នុងដី អនុវត្តការងារអោយបានលឿន និងទាន់ពេលវេលា ជៀសវាងអោយបាននូវការថ្នាំងថ្នាក់ពីប្រជាពលរដ្ឋ ។
លោកបន្តថា ការថ្នាំងថ្នាក់នោះដោយសារតែពួកគាត់ជីកដីនៅមុខផ្ទះប្រជាពលរដ្ឋទុករយៈពេលយូរពេកនិងជីកដីមានប្រវែង វែងពេក មុននៃការកប់វិញ ហើយការជីកកប់នោះមានចំណុចខ្លះក៏មិនត្រឹមត្រូវតាមលក្ខណៈបច្ចេកទេសផងដែរ ។ ដូច្នេះហើយទើបលោកអភិបាលរាជធានីភ្នំពេញជម្រុញអោយពង្រឹងការងារនេះឡើងវិញ ដោយស្នើអោយក្រុមហ៊ុនធ្វើការកែលម្អឡើងវិញ ពិសេសនៅកំណាត់ផ្លូវព្រះនរោត្តម ។ ចំណែកផ្លូវផ្សេងៗទៀតក៏ត្រូវតែអនុវត្តការងារនេះអោយបានល្អផងដែរ ។
លោក ឃូង ស្រេង ក្នុងឱកាសនោះ ក៏បានថ្លែងការកោតសរសើរចំពោះក្រុមហ៊ុនខ្សែកាបទាំងអស់ផងដែរ ដែលបានអនុវត្តតាមការណែនាំរបស់រដ្ឋបាលរាជធានីភ្នំពេញ ក្នុងការកាត់ទំលាក់ខ្សែកាបទៅក្រោមដី ដែលធ្វើអោយភ្នំពេញរបស់យើងមានសោភណ្ឌភាពល្អប្រសើរមួយកម្រិតថែមទៀត ៕
