ថ្មីៗនេះបន្ទាប់ពីមានភាពស្ងប់ស្ងាត់បានមួយរយៈពេលខ្លីដែលខេត្តរតនៈគីរីលែងមានសកម្មភាពដឹកជញ្ជូនឈើឆ្លងកាត់ទីរួមខេត្តគឺដោយសារមានការចាប់ឃុំខ្លួនអ្នកសារពត៌មានមួយចំនួន ដែលចុះទៅយកពត៌មានពីសកម្មភាពដឹកជញ្ជូនឈើ ហើយត្រូវបានឈ្នួញឈើសហការជាមួយសមត្ថកិច្ចរៀបអន្ទាក់ ចាប់ដើម្បីបំភ័យ ឬបំបាត់ស្មារតីដល់អ្នកសារពត៌មានដទៃទៀត កុំអោយជ្រៀតជ្រែកការរកស៊ីរបស់ក្រុមឈ្មួញនិងសមត្ថកិច្ចខេត្តនេះ។ ឥឡូវនេះចាប់ផ្តើមកុំរើកឡើងវិញហើយ។
តាមប្រភពពត៌មានពីប្រជាពលរដ្ឋដែលរស់នៅក្នុងទីរួមខេត្តរតនៈគីរីបានរាយការណ៍ប្រាប់អ្នកសារពត៌មានថា ឥឡូវសកម្មភាពដឹកជញ្ជូនប្រណិតយកទៅលក់នៅប្រទេសវៀតណាមរបស់មេឈ្មួញដ៏ធំប្រចាំ ខេត្តរតនៈគីរី គឺឈ្មោះ ហ៊ូវ ជីវ៉ៃ ហៅអាវ៉ៃ ដែលមេខ្មូតស៊ីឈើម្នាក់នេះជាគណនេយ្យដ៏ធំបំផុតរបស់លោក ថង សាវុន អភិបាលខេត្តរតនៈគីរី។
ប្រភពដដែលបានបញ្ជាក់បន្ថែមថា ហេតុអ្វីបានជាគេហ៊ានអះអាងថា មេខ្មូតស៊ីឈើឈ្មោះ ហ៊ូវ ជីវ៉ៃ ហៅអាវ៉ៃ ជាមេគណនេយ្យ របស់លោក ថង សាវុន ព្រោះថាក្នុងកំឡុងពេល ឃោសនាបោះឆ្នោតក្រុមប្រឹក្សា ឃុំ/សង្កាត់ កន្លងទៅគេសង្កេតឃើញសកម្មភាពដឹកជញ្ជូនឈើប្រណិតរបស់ឈ្មោះ ហ៊ូវ ជីវ៉ៃ គឺសម្រុកដឹកយកទៅលក់នៅប្រទេសវៀតណាមយ៉ាងខ្លាំងតាមច្រកអូយ៉ាដាវ ។ ពេលដែលសមត្ថកិច្ចនិយាយប្រាប់ទៅអាវ៉ៃ ថាកុំដឹកញ៉ាប់ពេកព្រោះអ្នកសារពត៌មានកំពុងតាមដាន តែអាវ៉ៃ ប្រាប់វិញថា បើអត់ដឹកមានលុយឯណាយកជួយបក្សសម្រាប់ឃោសនាបើពូ ចៅហ្វាយខេត្តទាខ្ពស់យ៉ាងនេះ។ ចំណុចនេះហើយដែលធ្វើអោយប្រជាពលរដ្ឋក៏ដូចជាសមត្ថកិច្ចតូចតាច គេមានជំនឿថាអាវ៉ៃគឺជាគណនេយ្យដ៏ធំសម្រាប់លោក ថង សាវុន អភិបាលខេត្តរតនៈគីរី។
ប្រជាពលរដ្ឋដដែលបន្តទៀតថា ឥឡូវនេះទំនងជាលោក ថង សាវុន ត្រូវការអាវ៉ៃជួយបក្សទៀតហើយមើលទៅ បានជាមេខ្មូតស៊ីឈើរូបនេះកំពុងដាក់កម្លាំងប្រមូលទិញឈើទាំង 9 ស្រុកក្នុងខេត្តរតនៈគីរី ហើយសម្រុកដឹកទៅលក់នៅប្រទេសវៀតណាម ទាំងយប់ទាំងថ្ងៃយ៉ាងនេះ?។
ដោយឡែកបើតាមប្រភពពត៌មានពីក្រុមអ្នកតាមដានពត៌មាននៅរាជធានីភ្នំពេញ បានជជែកគ្នា នៅតាមទៀមកាហ្វេថា ការកស៊ីដឹកជញ្ជូនឈើចេញទៅលក់នៅប្រទេសវៀតណាមបានយ៉ាងរលូនបែបនេះ ពីសំណាក់ឈ្មួញឈើឈ្មោះ ហ្វ៊ូវ ជីវ៉ៃ នៅក្នុងខេត្តរតនៈគីរីនោះ គឺពិតជាមានការត្រូវរ៉ូវគ្នាជាមួយសមត្ថកិច្ច គ្រប់លំដាប់ថ្នាក់ជាពិសេស ឯកឧត្តមនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការបង្ក្រាប់ និងទប់ស្កាត់ការកាប់បំផ្លាញព្រៃឈើនៃព្រះរាជាណាចក្រកម្ពុជា ជាក់ជាមិនខានឡើយ? បានជាសកម្មភាពមេឈ្មួញឈើឈ្មោះ ហ៊ូវ ជីវ៉ៃ សម្រុកដឹកចេញទៅលក់នៅប្រទេសវៀតណាមបានយ៉ាងរលូនបែបនេះ? មួយវិញទៀតក៏ទំនងប្រហែលជាមេឈ្មួញឈ្មោះ ហ្វ៊ូវ ជីវ៉ៃ គេស្គាល់ថ្នាក់លើដូចជាឧកញ៉ាថៅកែ ឈើមួយចំនួននៅក្នុងខេត្តក្រចេះដែលមួយខែ ឬ ពីខែ គេឡើងទៅជួបទេវតា ឬព្រះឥន្ទ្រម្តង (អត់ដឹងទេថាទេវតា ព្រះឥន្ទ្រជានរណា) ព្រោះនេះជាការជជែកគ្នាក្នុងហាងកាហ្វេ។
ក្រុមអ្នកតាមដានពត៌មានដដែលបានបន្តថាៈ ទោះបីមានស្ថាប័នពត៌មានជាច្រើនបានផ្សព្វផ្សាយនូវពត៌មានពាក់ព័ន្ធជាមួយនឹងសកម្មភាពកាប់ និងដឹកជញ្ជូនឈើពីសំណាក់មេខ្មូតស៊ីឈើឈ្មោះ ហ៊ូវ ជីវ៉ៃ យ៉ាងណាក៏ដោយ ក៏គេមិនដែលឃើញមានចំណាត់ការពីថ្នាក់ដឹកនាំប្រទេសដូចជាសម្តេចក្រឡា ហោម ស ខេង ឬសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហ៊ានស្តីបន្ទោសអោយលោក ថង សាវុន អភិបាលខេត្តរតនៈគីរីម្តងណាឡើយ មិនដឹងជាមកពីមូលហេតុអ្វីនោះឡើយ ឬក៏ខ្លាចអំណាចលោក ថង សាវុន?។ ព្រោះបើយើងនឹកចាំពីប្រសាសនដ៏ខ្ពង់ខ្ពស់របស់សម្តេចតេជោ ហ៊ុន សែន គឺថាបើបង្គ្រាបអ្នកកាប់ឈើអត់បានគាត់សុខចិត្តកាត់កចោល ហើយចៅហ្វាយខេត្តណាដែលបណ្តែតបណ្តោយអោយមានការកាប់បំផ្លាញព្រៃឈើនៅខេត្តនោះ គឺនិងត្រូវដកចេញពីតំណែង ហើយប្រឈម មុខនិងការដាក់ទោសទណ្ឌថែមទៀត។ តែនេះគ្មានឡើយ សកម្មភាពរបស់មេខ្មូតស៊ីឈើ ឈ្មោះ ហ៊ូវ ជីវ៉ៃ សម្រុកដឹកឈើចេញទៅលក់នៅប្រទេសវៀតណាមឡើងរញ្ជួយពេញខេត្តរតនៈគីរីគ្មាននរណាហ៊ានក្អក សូម្បីតែបន្តិច។
ពាក់ព័ន្ធនិងពត៌មានខាងលើអ្នកសារពត៌មានយើងពុំអាចសុំការបកស្រាយពីលោក ថង សាវុន អភិបាលខេត្តរតនៈគីរីបានឡើយ និងឈ្មោះ ហ៊ូវ ជីវ៉ៃ ក៏អញ្ចឹងដែរ ទូរស័ព្ទចុចចូលតែគ្មានអ្នកលើក។