ភ្នំពេញ ៖ នាព្រឹកថ្ងៃទី២១ខែវិច្ឆិកាឆ្នាំ២០១៧លោកមាន ចាន់យ៉ាដា អភិរងរាជធានីភ្នំពេញបានបញ្ជាឲ្យ គណៈបញ្ជាការឯកភាពខណ្ឌពោធិ៍សែនជ័យ ចុះពិនិត្យមើលទង្វើរបស់ ក្រុមហ៊ុនសន្តិសុខឯកជននៅក្រុមហ៊ុនបុរីពិភពថ្មីត្រពាំងថ្លឹង៤ក្នុងសង្កាត់ចោមចៅខណ្ឌពោធិ៍សែនជ័យជាបន្ទាន់។ ក្នុងវេទិការសាធារណៈ និងពិគ្រោះយោ បល់ របស់ក្រុមប្រឹក្សារាជធានភ្នំពេញនៅក្នុង វត្តរុណវត្តី មានលោកម៉ម សារិន ប្រធានក្រុមប្រឹក្សារាជធានភ្នំពេញ តំណាងប្រជាពលរដ្ឋរស់នៅក្នុងបុរីភិពថ្មីត្រពាំងថ្លឹង៤បានសុំណូមពរដល់ លោកប្រធានក្រុមប្រឹក្សារាជធានីភ្នំពេញ និង លោក ហែម ដារិទ្ធ អភិបាល ខណ្ឌពោធិ៍ សែនជ័យឲ្យជួយពិនិត្យមើលសកម្មភាពរបស់ក្រុមហ៊ុនសន្តិសុខឯកជនដែលទទួលបានសិទ្ធិយាមការពារបុរីពិភពថ្មី ជាសំណង់របស់លោក ឧកញាហុង ពីវ តែងតែបង្ករការភ័យខ្លាចដល់ ប្រជាពល រដ្ឋរស់នៅទីនោះដូចជា៖ការប្រើប្រាស់ឯកសណ្ឋានយោធានិងរថយន្តយោធា ។ពេលយាម ល្បាតពួកគេសុទ្ធតែបំពាក់អាវុធនូវជាប់និងខ្លួន ខុសសន្តិសុខឯកជនក្រុមហ៊ុនផ្សេង ធ្វើឲ្យប្រជា ពលរដ្ឋភិតភ័យ ។
ក្រៅពីនេះ តំណាងប្រជាពលរដ្ឋបានសុំណូមពរដល់ថ្នាក់ដឹកនាំសាលារាជធានីភ្នំពេញមេត្តាជួយទប់ស្កាត់សកម្មភាពសន្តិសុខឯកជនខាងលើនេះដូចជា ទី១-ជួយសំរួលដល់ប្រជាពលរដ្ឋដែលចូលលក់ នំចំណីបន្តិច បន្តួចក្នុងបុរីសូមកុំយកលុយពីពួកគាត់ ទី២-រាល់រថយន្តរបស់ប្រជាពលរដ្ឋរស់នៅ ក្នុងបុរីដឹកជញ្ជូន អ៊ីវ៉ាន់ លក់ដូរ សូមកំឲ្យសន្តិសុខយកលុយពីពួកគាត់ ទី៣-រាល់ពិធីបុណ្យធំតូច សូមឲ្យសន្តិសុខអនុញ្ញាតឲ្យ ក្រុមប្រជាការពារភូមិ ចូលក្នុងបុរី ដើម្បីជួយការពារសន្តិសុខសុវត្ថិភាព និងសណ្តាប់ធ្នាប់ជូនពលរដ្ឋ ។
ទី៤-ស្នើសុំកុំឲ្យក្រុមហ៊ុន សន្តិសុខយកសេវាបន្ថែមលើសេវា តបណ្តាញប្រព័ន្ធអ៊ិនធើណេត និងខ្សែកាបន៍ ដែលពលរដ្ឋហៅក្រុមហ៊ុនមកតំឡើងជូនផ្ទះក្នុងបុរីពិភពថ្មី ទី៥-បច្ចុប្បន្នក្រុមហ៊ុនសន្តិសុខឯកជននោះ បានយកថ្លៃការពារផ្សេងៗ ក្នុងតម្លៃខ្ពស់ចន្លោះពី១០០-៥០០ដុល្លារ ទី៦-ការយកលុយលើសេវាពន្ធម៉ូតូ និងរថយន្តដោយមានបិទស្ទីកគើ (ដូចស្ទីកគើរបស់ពន្ធដាតាមខេត្ត) ។ បញ្ហាបង់ពន្ធ លើទោចក្រ យាន យន្តនេះ ត្រូវបានប្រមុខរាជរដ្ឋាភិបាលលុបចោល អស់ហើយដើម្បីសម្រួលដល់ ជីវភាព របស់ប្រជាពលរដ្ឋ ក្នុងគោលបំណងកាត់បន្ថយភាពក្រីក្រ ។
ដោយឡែកម៉ូតូ និង រថយន្ត របស់ប្រជាពលរដ្ឋរស់នៅក្នុង បុរីពិភពថ្មីត្រពាំងថ្លឹង៤ត្រូវបានក្រុមហ៊ុនសន្តិសុខឯកជន ក្នុងបុរីពិភពថ្មី បង្កើតស្ទីកគ័រផ្ទាល់ខ្លួនបិទទៅ លើម៉ូតូនិងរថយន្តដើម្បីទាថ្លៃពន្ធប្រចាំខែ-ឆ្នាំ ពីប្រជាពលរដ្ឋរស់នៅក្នុងបុរី ក្នុងតម្លៃ ម៉ូតូ១ គ្រឿងចាប់ ៣ដុល្លារ និងរថយន្ត៥ដុល្លារឡើង ។ ទី៧-រាល់ពេលបុគ្គលិកក្រុមហ៊ុនសន្តិសុខឯកជននោះទៅយកថ្លៃសេ វាការពារផ្សេងៗតែងតែបំពាក់អាវុធជាប់បង្កឲ្យមានការភ័យខ្លាចយ៉ាងខ្លាំងដល់ប្រជាពលរដ្ឋ។
លោក មាន ចាន់យ៉ាដា អភិរងរាជធានីភ្នំពេញ បានចាត់ទុកទង្វើរ របស់ក្រុមហ៊ុនសន្តិសុខឯកជន យាមការពារសន្តិសុខ នៅបុរីពិភពថ្មីត្រពាំងថ្លឹង៤ របស់លោកឧកញា ហុង ពីវនោះថា ជាទង្វើរចង់បង្កើត តំបន់អបគមន៍ ដូច្នេះគណៈបញ្ជាការឯកភាពខណ្ឌពោធិ៍សែនជ័យត្រូវតែចុះទៅពិនិត្យករណីនេះភ្លាម មិនអាចបណ្តែតបណ្តោយឲ្យក្រុមហ៊ុនសន្តិសុខឯកជនមួយនេះធ្វើអ្វីតាមចិត្តបានឡើយ ។
