មណ្ឌលគិរី ៖ ឯកឧត្តម ជុក មុន្នី អនុរដ្ឋលេខាធិការក្រសួងមុខងារសាធារណៈ បានមានប្រសាសន៍ថា លទ្ធផលកំណែទំរង់ថ្មី នៃការបើកប្រាក់បៀវត្ស របស់មន្ត្រីរាជការទាំងអស់បច្ចុប្បន្ននេះ បានបើកបៀវត្ស តាមប្រព័ន្ធធនាគារ ខុសប្លែកកាលពីមុនដែលបើបៀវត្សដោយដៃ។
ឯកឧត្តមមានប្រសាសន៍បែបនេះ នៅក្នុងកិច្ចប្រជុំផ្សព្វផ្សាយលិខិតបទដ្ឋានគតិយុត្តថ្មីៗ ស្តីពីការគ្រប់គ្រងមន្ត្រីរាជការស៊ីវិលជូនថ្នាក់ដឹកនាំ និងមន្ត្រីរាជការខេត្តមណ្ឌលគិរី នៅព្រឹកថ្ងៃទី ១៧ វិច្ឆិកាឆ្នាំ២០១៥ នេះ។
ឯកឧត្តមបានលើកឡើងទៀតថា ទំលាប់ជាប្រវត្តិសាស្ត្រមន្ត្រីរាជការស៊ីវិល មិនដែលមានគណនេយ្យក្នុងធនាគារនោះទេ ប៉ុន្តែក្រោយមានកំណែទំរង់ថ្មី មន្ត្រីរាជការទាំងអស់មានគណនេយ្យក្នុងធនាគារគ្រប់ៗគ្នា ហើយថែមទាំងរដ្ឋជាអ្នកចេញថ្លៃបើកគណនេយ្យជូនទៀតផង។
ការបើកប្រាក់់បៀវត្សតាមប្រព័ន្ធធនាគារ មានប្រយោជន៍ច្រើននឹងទាន់ពេលវេលា និងមិនធ្វើអោយបាត់បង់ថវិកាទៀតផង។
ឯកឧត្តមអនុរដ្ឋលេខាធិការក្រសួងសាធារណៈ បានបន្តទៀតថា ការបើកប្រាក់បៀវត្សមិនមានការយឺតយ៉ាវនោះទេ រាល់ការបើកប្រាក់ខែរបស់មន្ត្រីរាជការស៊ីវិល តែងតែបើកបាននៅសប្តាហ៍ទី៣ ក្នុងខែ។ សំរាប់ខេត្តមណ្ឌលគិរី ដែលជា ខេត្តដាច់ស្រយាល គឺមានការលំបាកខ្លះៗដែរ ព្រោះធនាគារមានតិច ហើយស្ថិតនៅតែទីប្រជុំជន ដូចច្នេះអ្នកនៅឆ្ងាយអាចលំបាក ទៅមកក្នុងការបើកបៀវត្ស។ យ៉ាងណាក៏ដោយ ឯកឧត្តមបានបញ្ជាក់ថា ការបើកបៀវត្សតាមប្រព័ន្ធធនាគារនេះជាគោលការណ៍មួយល្អប្រសើរណាស់ ដែលមន្ត្រីរាជការអាចបើកបានក្នុងខែទាន់ពេលនឹងមិនមានការបាត់បង់នូវថវិកាផងដែរ៕
ហ៊ិន សុគន់
