ភ្នំពេញ៖ កាលពីរសៀលថ្ងៃទី១៣ ខែវិច្ឆិកា ឆ្នាំ២០១៧ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ បានប្រកាស សាលក្រមក្នុងសំណុំរឿងបាញ់ សម្លាប់ឧកញ៉ាអ៊ឹង ម៉េងជឺអាយុ៥៣ឆ្នាំថៅកែស៊ីម៉ង់តិ៍ សញ្ញាត្បូងពេជ្រកាលពីថ្ងៃទី២២ ខែវិច្ឆិកា ឆ្នាំ២០១៤កន្លងទៅ នៅក្នុងសង្កាត់ ទួលស្វាយព្រៃ ខណ្ឌចំការមន ដោយ សម្រេចចាត់របៀបទោះជាត្រូវបានពន្យាពេល៦ខែរួចមកហើយក្តី ។
ចៅក្រម តុប ឈុនហេង បានប្រាប់ពីមូលហេតុថា៖ ការសម្រេចចាត់របៀបធ្វើឡើងតាមមាត្រា៣៣៦ នៃក្រមនីតិវិធីព្រហ្មទណ្ឌ និង បានចាត់តាំងចៅក្រមទទួល បន្ទុកមួយដើម្បីសាកសួរ និង ពិនិត្យបន្ថែមទៅលើភស្តុតាង មួយចំនួនដូចជា៖ ១. ពិនិត្យបន្ថែមទៅលើកំណត់ហេតុពិនិត្យ សាកសពជនជាប់ចោទឈ្មោះលី សៅ ដែលបានស្លាប់នៅ ពេលជាប់ឃុំបណ្តោះអាសន្ន ទី២. សាកសួរបន្ថែមទៅលើ មន្ត្រីនគបាលដែលបានយាមកាមនៅកន្លែងកើតហេតុ ទី៣. ស៊ើបសួរបន្ថែមទៅលើប្រវត្តិការងាររបស់ជនជាប់ចោទឈ្មោះ សៀង វាសនា ដែលជាជនដៃដល់ ទី៤.ចាត់តាំងលោកលី សុខឡេង ជាចៅក្រមស៊ើបសួរ សាលាដំបូង រាជធានីភ្នំពេញ ជាអ្នកទទួលបន្ទុក។
សូមបញ្ជាក់ថា៖សំណុំរឿង ឃាតកម្មឧកញ៉អ៊ឹងម៉េងជឺ បានឆ្លងកាត់ការជំនុំជម្រះជាច្រើនលើកច្រើនសារមកហើយ គឺមានតែជនជាប់ចោទដែលជាអង្គរក្សថោងសារាតប៉ុណ្ណោះចូលរួមសវនាការ ឯជនជាប់ចោទអ្នក មានស្តុកស្តមឧកញ៉ា ថោង សារ៉ាត់ មិនមានវត្តមានក្នុង សវនាការនោះទេតាំងពីដើមមកហើយ រហូតមកដល់ថ្ងៃប្រកាសសាលក្រមនេះ ក៏នៅតែមិនមាន វត្តមានដដែលដោយមេធាវីបាន ដាក់លិខិតជូនតុលាការ ដោយអះអាងថា កូនក្តីខ្លួនមាន បញ្ហាសុខភាព។
សំណុំរឿងឃាតកម្មបាញ់សម្លាប់ លោកឧកញ៉ា អ៊ឹង ម៉េងជឺ នេះមានជនជាប់ ចោទទាំងអស់៦នាក់ ទី ១ . ឧកញ៉ា ថោង សារ៉ាត់ (អ្នកផ្តើមគំនិត) ២.ឈ្មោះ សៀង វាសនា (ជាជនដៃ ដល់ កាន់កាំភ្លើងដើរចូលទៅបាញ់មិនញញើតដៃ ពេលជនរងគ្រោះកំពុងចុះពីលើរថយន្ត បណ្តាលឲ្យស្លាប់ក្នុងថ្លុកឈាម នៅមុខហាងលក់ផ្លែឈើ ក្បែរង្វង់មូលអាងទឹកអូឡាំពិក សង្កាត់ទួលស្វាយព្រៃ២ ខណ្ឌចំការមន កាលពី វេលាម៉ោងជាង៧យប់ថ្ងៃទី២២ វិច្ឆឹកា ២០១៤ ។ ៣.ឈ្មោះ កូយ ចាន់ថុល ៤.ឈ្មោះ ឈុន ចិត្រា ៥.ឈ្មោះ មាស សម្បត្តិ និង៦.ឈ្មោះ លី សៅ ហៅ វី (ស្លាប់នៅក្នុងឃុំ) ។
ជនជាប់ចោទថោង សារ៉ាត់ ត្រូវសមត្ថកិច្ចចាប់ខ្លួន បន្ទាប់ពី ជាប់សង្ស័យថាជាមេខ្លោងនៅពី ក្រោយការបាញ់ សម្លាប់ឧកញ៉ា អ៊ឹង ម៉េងជឺ ហើយត្រូវបានចៅក្រមសាលាដំបូង រាជធានីភ្នំពេញ បញ្ជូនទៅឃុំខ្លួនបណ្ដោះអាសន្ននៅ ពន្ធនាគារព្រៃ សកាលពីរសៀលថ្ងៃទី១៧ មេសា ឆ្នាំ២០១៥ ក្រោយពីត្រូវតំណាងអយ្យការចោទ ប្រកាន់ពីបទផ្តើមគំនិតក្នុងអំពើឃាតកម្មគិតទុកជាមុន តាមមាត្រា២៨និងមាត្រា២០០នៃក្រមព្រហ្មទណ្ឌ ដែលបទល្មើសនេះ កំណត់ការផ្តន្ទាទោសដាក់ពន្ធនាគារអស់មួយជីវិត ។ រីឯក្រុមអង្គរក្ស ត្រូវបានតំណាងអយ្យការចោទប្រកាន់ពីបទ សមគំនិតនិងបទឃាតកម្មគិតទុកជាមុន តាមមាត្រា២៩និងមាត្រា២០០នៃក្រមព្រហ្មទណ្ឌ។
នាថ្ងៃបញ្ចប់សវនាការសួរដេញដោល លោកហ៊ឹង ប៉ុនថន ព្រះរាជអាជ្ញារងនិងជាតំណាងអយ្យការក្នុងរឿងក្ដីនេះ បានធ្វើសេចក្តីសន្និដ្ឋានប្តឹងសុំតំកល់ចោទប្រកាន់ទៅលើឧកញ៉ាថោង សារ៉ាត់ និងក្រុមអង្គរក្ស និង ស្នើតុលាការផ្តន្ទាទោស ជនជាប់ចោទទៅតាមច្បាប់។ រីឯក្រុមមេធាវីការពារក្តីជូនឲ្យគ្រួសារជនរងគ្រោះបានសំណូមពរឲ្យតុលាការផ្ដន្ទាទោស ក្រុមជនជាប់ចោទឲ្យបានតឹងរឹង និងទាមទាសំណងជំងឺចិត្តពីមេផ្ដើមគំនិតឈ្មោះ ថោង សារ៉ាត់ ចំនួន៥០លានដុល្លារ និងពីក្រុមជនដៃដល់ចំនួន១០លានដុល្លារ។តែលទ្ធផលបានត្រឹមចាត់របៀប!!! ៕