មណ្ឌលគិរី ៖ គ្រឿងញៀន ផ្លូវ និងទឹក ជាបញ្ហាសំខាន់ដែលប្រជាពលរដ្ឋ បានលើកឡើង ក្នុងវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្តថ្នាក់ក្រុង នៅបរិវេណតារាងបាល់ទាត់ នៃវិទ្យាល័យ ហ៊ុនសែន មណ្ឌលគិរី ស្ថិតនៅក្នុងក្រុងសែនមនោរម្យ កាលពីព្រឹកថ្ងៃ ទី ១៦ ខែវិច្ឆិកាឆ្នាំ២០១៥ នេះ។
នៅក្នុងកិច្ចពិគ្រោះយោបល់ និងតស៊ូមតិជាមួយប្រជាពលរដ្ឋពេញមួយព្រឹក ជាលទ្ធផលត្រូវបានអាជ្ញាធរពាក់ព័ន្ធ មន្ត្រីជំនាញ និងតាមស្ថាប័នផងដែរ បានធ្វើការបកស្រាយជាបន្តបន្ទាប់ ក្នុងនោះរួមមាន ទី១បញ្ហាគ្រៀងញៀន ដែលប្រជាពលរដ្ឋនៅភូមិឡៅការលើកឡើងថា មានការព្រួយបារម្ភ ចំពោះអ្នកប្រើប្រាស់មានការកើនឡើង ធ្វើអោយពួកគាត់មានការភ័យខ្លាច នៅភាពអសន្តិសុខផ្សេងៗ ត្រូវបានលោកអធិការរងក្រុងបកស្រាយថា សមត្ថកិច្ចជំនាញគ្រឿងញៀន បានចុះទៅ ជាក់ស្តែងហើយ តែមិនទាន់ចាប់បាន ដោយប្រទះឃើញតែ សំណល់ភស្តុតាងខ្លះៗតែប៉ុណ្ណោះ។ ដូច្នេះលោក សំណូមពរអោយ ប្រជាពលរដ្ឋមេត្តាជួយសហការបន្ថែម ចំពោះការកំណត់មុខសញ្ញាគ្រឿងញៀននេះ។
ទី២ បញ្ហាផ្លូវ ដែលប្រជាពលរដ្ឋបានលើកឡើងថា ផ្លូវ៣៩២នៅភូមិចំការតែ មានការខូចខាតខ្លាំង ពិបាកក្នុងការធ្វើដំណើរ ត្រូវបានប្រធានមន្ទីរ សាធារណៈការនិងដឹកជញ្ជូន លោក ម៉ៅ ធននារក្ស លើកឡើងថា គម្រោងផ្លូវនោះ លោកបានធ្វើការធ្វើសំណើឡើងទៅថ្នាក់ក្រសួងរួចហើយ។ លោកបានបញ្ជាក់ថា ការធ្វើផ្លូវគឺទទួលកញ្ជប់ថវិកាពីក្រសួង ហើយស្ថិតក្នុងទិសដៅអាទិភាព ទើបទទួលបានគម្រោងធ្វើផ្លូវមុនគេ ដូចនេះសូមប្រជាពលរដ្ឋអធ្យាស្រ័យ ចំពោះផ្លូវមួយចំនួនដែលមិនទាន់អភិវឌ្ឍន៍។
ទី៣ បញ្ហាខ្វះទឹកប្រើប្រាស់ ត្រូវបានប្រជាពលរដ្ឋនៅ ភូមិឡៅការត្អូញត្អែថា ពួកគាត់ខ្វះទឹកប្រើប្រាស់ ត្រូវការអណ្តូងទឹកជាចាំបាច់ ហើយពួកគាត់បានសំណូមពរជាច្រើនលើកច្រើនសារ តែមិនមានដំណោះស្រាយណាមួយសមរម្យសំរាប់ពួគាត់នោះទេ។ បញ្ហានេះ ត្រូវបានអភិបាលក្រុងសែនមនោរម្យ លោក ឡុង វិបុល ស្រាយបំភ្លឺថា លោកព្រមទាំងមន្ត្រីជំនាញ បានចុះទៅសិក្សាហើយ តែជាលទ្ធផល នៅភូមិឡៅការមានការពិបាក ក្នុងការជីកអណ្តូង ព្រោះជីកទៅមិនចេញទឹកនោះទេ។
ដើម្បីជាការសម្រួលដល់ប្រជាពលរដ្ឋ ប្រធានក្រុមប្រឹក្សាខេត្តស្តីទី លោក លី សាមិ បានបញ្ជាក់បន្ថែមថា លោកនិងពិភាគ្សាជាមួយមន្ទីរ សិប្បកម្មនិងឧស្សាហកម្ម ដើម្បីសម្រួលជួយតបណ្តាញទឹកស្អាតទៅកាន់ទីនោះ៕
