ភ្នំពេញ៖នៅថ្ងៃទី១០វិច្ឆិកាមានមន្ត្រី និងជាសកម្មជនមកពីគណបក្សប្រឆាំង ចំនួន៥នាក់ទៀត បានប្រកាសភ្នាល់ ជាមួយលោកនាយករដ្ឋមន្ត្រី ដោយដាក់ទឹកប្រាក់ ក្នុងម្នាក់១០០០ដុល្លារ។ បន្ទាប់ពីយុវជនម្នាក់ ដែលបានចេញមុខភ្នាល់ ទល់នឹងលោក ហ៊ុន សែន កាលពីថ្ងៃទី៩វិច្ឆិការួច ។ នេះបើតាមគេហទំព័រមួយឈ្មោះមនោរម្យ។ មន្ត្រីទាំង៥រូបនោះ រួមមានលោក ហេង ដាណារ៉ូ សមាជិកសភា និងជាតំណាងរាស្ត្រមណ្ឌលព្រៃវែង – លោក ញឹម គឹមញ៉ុល អនុប្រធានក្រុមការងារ ព្រះសីហនុ , លោក សុភ័ណ្ឌ ឡារី សមាជិកក្រុមការងារ កំពង់ចាម ,លោក សួន ចំរើន សមាជិកក្រុមការងារ បាត់ដំបង និងលោក អែម ប៊ុនណារិទ្ធ សមាជិកក្រុមការងារ ពោធិ៍សាត់ដោយដាក់ក្នុងម្នាក់១០០០ដុល្លារអាមេរិក។
សូមបញ្ជាក់ដែរថា៖កាលពីថ្ងៃ ទី៨ ខែវិច្ឆិកាថ្លែងនៅចំពោះកម្មករកម្មការិនី ច្រើនពាន់នាក់ ក្នុងខណ្ឌដង្កោ រាជធានីភ្នំពេញ សម្តេចនាយករដ្ឋមន្ត្រី ហ៊ុន សែន បានប្រកាសលេងល្បែងភ្នាល់ ជាទូទៅមួយលើករណីរំលាយគណបក្សសង្គ្រោះជាតិនៅថ្ងៃទី១៦ ខែវិច្ឆិកាខាងមុខ នៅពេលដែលតុលាការកំពូល នឹងបើកសវនាការ លើបណ្តឹងរបស់ក្រសួងមហាផ្ទៃសុំរំលាយគណបក្សជំទាស់ ដែលមានរូបសម្តេច ជាមេស៊ីសង។
«អ្នកដែលចង់ភ្នាល់ ក៏ភ្នាល់ទៅ មួយចាក់មួយរយទៅ គឺអារំលាយ ឬមិនរំលាយហ្នឹង។ តាមហាងគុយទាវ នាំគ្នាចាក់ទៅ! ទៅ! បើកម៉ាសេរី ឲ្យនាំគ្នាចាក់! បើ[មិន]រំលាយ ឲ្យមកទារលុយពីខ្ញុំ (…) ឥឡូវចាក់ភ្នាល់ទៅ! បើរំលាយស៊ីតែ ១ទេ បើអត់រំលាយសង១០០។ អ្នកណាចាញ់ មកទារពីខ្ញុំ។»។
ក្រោយពីការប្រកាសនោះ មានយុវជនម្នាក់ ឈ្មោះ សាន ប៊ុនឆាយ ចេញមុខកាលពីម្សិលម៉ិញ មកភ្នាល់ទល់នឹងលោក ដោយដាក់ទឹកប្រាក់ ១០០០ដុល្លារ។ យុវជនថា បើគណបក្សសង្គ្រោះជាតិត្រូវបានរំលាយ លោកនឹងផ្ញើរ១០០០ដុល្លារ ជូនលោកនាយករដ្ឋមន្ត្រី តាមវីង (Wing)។ តែបើគណបក្សប្រឆាំង នៅជ្រងោរៗដដែលទេ លោក ប៊ុនឆាយ ថាលោក ហ៊ុន សែន ត្រូវសងថ្លៃភ្នាល់ចាញ់ ចំនួន ១០០ ០០០ដុល្លារ ឲ្យមកលោកវិញ។
គេមិនដឹងថាតើនឹងមានការស៊ីសងយ៉ាងម៉េចនោះទេករណីយ៍ភ្នាល់រឿងនយោបាយចឹងនោះ។តែតាមទម្លាប់នៃល្បែងនយោបាយគឺថាបើឈ្នះនឹងក្លាយជាស្តេចអ្នកចាញ៉ត្រូវជាប់គុករត់ចោលស្រុកឬធ្ង់ជាងនេះគឺដេកមុងឈើតែប៉ុណ្ណោះ។មិនទាន់ឃើញមានប្រតិកម្មពីមន្ត្រីអ្នកនាំពាក្យគណបក្សប្រជាជនកម្ពុជាជុំវិញរឿងមានគេចេញមុខភ្នាល់នេះនៅឡើយ។
