ខេត្តក្រចេះ ៖ សំណាងណាស់ដែលប្រទេសកម្ពុជាយើង នៅមានសត្វប្រភេទនេះរស់នៅ ហើយរាជ រដ្ឋាភិបាលកម្ពុជាបានចាត់ទុកសត្វផ្សោតនេះជារតនៈសម្បត្តិជាតិមានជីវិតដ៏ពិសិដ្ឋ ក្នុងអនុក្រិតមួយ ស្ដីពី ការបង្កើតតំបន់គ្រប់គ្រង និងការពារសត្វផ្សោតទន្លេមេគង្គ ចុះថ្ងៃទី ២៥ ខែកញ្ញា ឆ្នាំ២០១២
ជាក់ស្តែងនៅព្រឹកថ្ងៃទី១០ ខែវិច្ឆិកាឆ្នាំ២០១៧នេះខេត្តក្រចេះប្រារព្ធវិទាសត្វផ្សោតទន្លេមេគង្គនៅរមណីដ្ឋានកាំពី ក្រោមអធិបតីភាពឯកឩត្ដមសរ ចំរុង អភិបាលខេត្តក្រចេះ ឯកឩត្ដមអេង ជា សាន ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជលផល និងលោក សេង ទៀក នាយកអង្គការ WWF ប្រចាំប្រទេសកម្ពុជា ព្រមទាំងមានការចូលរួមពីឆ្មាំទន្លេ កងកម្លាំងប្រដាប់អាវុធមកពីអង្គភាពពាក់ព័ន្ធ លោក លោកស្រី ភ្ញៀវជាតិ អន្ដរជាតិ និងសិស្សានុសិស្ស យុវជន ។
លោក សេង ទៀក នាយកអង្គការ WWF បានឡើងរាយការណ៍ពីអង្គការ WWF ក្នុងរយៈពេក១០ឆ្នាំ កន្លងទៅនេះ បាននឹងកំពុងសហការជាមួយរដ្ឋបាលជលផល អាជ្ញាធរខេត្ត ស្រុក ឃុំ និងភូមិ អង្គការដៃគូពាក់ព័ន្ធនានា និងសហគមន៍ មូលដ្ឋាន លើការងារអភិរក្សសត្វផ្សោត ហើយលទ្ធផលក៏ទទួលបានគួរជាទីមោទនៈផងដែរ ក្នុងនោះរួមមានៈ បទល្មើសនេសាទពិសេស ការដាកក់មង ក្នុងដែនជម្រកសត្វផ្សោតមានការថតចុះច្រើន អត្រាស្លាប់នៃសត្វផ្សោតក៏មានថតចុះ ចំនួនសត្វផ្សោតអាចរក្សាលំនឹង និងមានការកើនឡើងបន្ទិចបន្ទួចផងដែរ ។
ឯកឩត្ដម អេង ជាសាន មានប្រសាសន៍ថា ការរៀបចំទិវាសត្វផ្សោតនាថ្ងៃនេះ គឺដើម្បីរម្លឹកដល់សត្វផ្សោតទន្លេមេគង្គដែលជាផ្នែកដ៏សំខាន់នៃវប្បធម៌ និងប្រពៃណីជាតិតាំងពីបុរាណកាលមក និងបានចារឹកលើជញ្ជាំងនៃប្រាង្គប្រាសាទអង្គវត្តដែលត្រួវបានសាងសង់តាំងពីដើមសតវត្សទី១២ ។ បច្វុប្បន្នសត្វផ្សោតអាចទាកទាញ់ភ្ញៀវទេសចរណ៍មកទស្សនាកាន់តែច្រើនឡើងៗ អាចបង្កើនប្រាក់ចំណូលដល់ប្រជាពលរដ្ឋពី វិស័យអេកូទេសចរណ៍សត្វផ្សោតនេះ និងដោយប្រយោលតាមរយៈសេវាកម្មនានា ការងារ នៅតាមសណ្ឋាគារ ផ្ទះសំណាក់ ភោចនីយដ្ឋាន ការដឹកជញ្ជូន ការផលិត វត្ថុអនុស្សាវរីយ៍ផ្សេងៗ ។
ឯកឩត្ដមសរ ចំរុង មានប្រសាសន៍ថា ខ្សែចង្វាក់ផលិតកម្មវិស័យទេសចរណ៍អាចដំណើរការទៅមុខបានដោយជោកជ័យគឺ អាស្រ័យយ៉ាងសំខាន់លើភាពស្រស់បំព្រងនៃប្រព័ន្ធអេកូឡុស៊ី និងនិរន្តរភាពនៃសត្វផ្សោតទន្លេមេគង្គ ដែលរួមចំណែកយ៉ាងសំខាន់ក្នុងការកាត់បន្ថយភាពក្រីក្ររបស់ប្រជាពលរដ្ឋ ។ ឯកឩត្ដមអភិបាលខេត្ត បានជម្រុញដល់អង្គការ WWF ឆ្មាំទន្លេ និងកង កម្លាំងដែលពាក់ព័ន្ធ បន្តខិតខំការពារ អភិរក្ស និងបង្កើនការយល់ដឹងអំពីច្បាប់ និងលិខិតបទដ្ឋានគតិយុត្តិនានា ដែលពាក់ព័ន្ធទៅនឹងករការពារ និងអភិរក្សសត្វផ្សោតប្រភេទនេះ អោយបានគង់វង្ស ៕
លោក កិះខន
