ភ្នំពេញ ៖ អគ្គនាយកដ្ឋានពន្ធដារ បានក្រើនរំលឹកដល់ ម្ចាស់ យានយន្តទាំងអស់ដែលមិនទាន់បានបំពេញកាតព្វកិច្ចបង់ពន្ធ សូម អញ្ជើញមកបង់ពន្ធឲ្យបានរួសរាន់នៅលើមធ្យោបាយដឹកជញ្ជូនគ្រប់ប្រភេទព្រោះការបង់ពន្ធ នឹងត្រូវបិទបញ្ចប់ជា ស្ថាពរនៅត្រឹមថ្ងៃទី៣០ ខែវិច្ឆិកា ឆ្នាំ២០១៧ ខាងមុខនេះ ។
នេះបើតាមសេចក្ដីជូនដំណឹងឲ្យដឹងពីអគ្គនាយកដ្ឋានពន្ធដារ នៅថ្ងៃទី០៩ វិច្ឆិកា ឆ្នាំ២០១៧ ស្តីពីការបង់ពន្ធលើ មធ្យោបាយដឹកជញ្ជូន និងយានជំនិះគ្រប់ប្រភេទ ។
តាមសេចក្ដីជូនដំណឹងបានបញ្ជាក់ថា៖ នៅក្នុងការប្រកាសបង់ពន្ធលើមធ្យោបាយដឹកជញ្ជូន និង យានជំនិះគ្រប់ប្រភេទសម្រាប់ ឆ្នាំ២០១៧ នៅរយៈពេល ប៉ុន្មាន ខែកន្លងមកនេះ មានម្ចាស់យានយន្តជាច្រើនបានមក បង់ពន្ធរួចរាល់ខណៈមានម្ចាស់យានយន្តមួយចំនួនទៀតនៅមិនទាន់មកបង់ពន្ធនេះនៅឡើយ ។
ទាក់ទិនបញ្ហានេះ អគ្គនាយកដ្ឋានពន្ធដារសូម ក្រើន រំលឹក ដល់ម្ចាស់យានយន្តទាំងអស់ដែលពុំទាន់បានមក បំពេញកាតព្វកិច្ចបង់ ពន្ធសូម អញ្ជើញមកប្រកាសបង់ពន្ធឲ្យ បានរួសរាន់នៅត្រឹមថ្ងៃទី៣០ ខែវិច្ឆិកា ឆ្នាំ២០១៧នៅតាម សាខាពន្ធដារខេត្ត -ខណ្ឌ ឬនៅតាមធនាគារអេស៊ីលីដារ ធនាគារការណាឌីយ៉ាធនាគារវឌ្ឍនៈនិងធនាគារកម្ពុជា សាធារណៈដើម្បី ជៀសវាងបាននូវការកកស្ទុះ និងការ ប្រជ្រៀត គ្នាមកប្រកាសបង់ពន្ធ នៅថ្ងៃជិតផុតកំណត់ដែល អាចនាំឲ្យមានបាតុភាពអសកម្មដោយ ប្រការណាមួយ ។
ពាក់ព័ន្ធ នឹងការបង់ពន្ធលើមធ្យោបាយដឹកជញ្ជូននេះដែរ ដោយអនុលោមប្រកាសរបស់ក្រសួងសេដ្ឋកិច្ចនិងហិរញ្ញវត្ថុ ស្តីពីការប្រមូលពន្ធលើមធ្យោបាយដឹកជញ្ជូន និងយានជំនិះ គ្រប់ប្រភេទសម្រាប់ឆ្នាំ២០១៧ ការប្រមូលពន្ធគ្រប់ប្រភេទ នេះនឹងត្រូវបិទបញ្ចប់ជាស្ថាពរនៅត្រឹមថ្ងៃទី៣០ខែវិច្ឆិកា
ឆ្នាំ ២០១៧ខាងមុខ ។
នៅក្នុងករណីខកខានមិនបានបង់ពន្ធទាន់ពេលវេលាតាមការកំណត់ខាងលើម្ចាស់យានយន្តនឹងត្រូវរងនូវទោសទណ្ឌ តាមច្បាប់ជាធរមាន ក្នុងនោះ អគ្គនាយកដ្ឋានពន្ធដារនឹង សហការជាមួយ អាជ្ញាធរមានសមត្ថកិច្ចជាពិសេសនគរបាល ចរាចរណ៍ ដើម្បីចុះត្រួតពិនិត្យការប្រមូលពន្ធនេះនៅតាម ដងផ្លូវនានាបន្ទាប់ពីការបិទបញ្ចប់នៃការប្រមូលពន្ធ ៕