បន្ទាយមានជ័យ៖ ឈើក្រញូងដែលជាប្រភេទឈើមានតម្លៃខ្ពស់លេខ១ ត្រូវបានសមត្ថកិច្ចថៃ រកឃើញក្នុងរទេះកម្មករម្នាក់កាលពីថ្ងៃទី៨ខែវិច្ឆិកា២០១៧ ត្រង់ច្រកទ្វារច្រកអន្តរជាតិក្លងឡឹក ស្រុកអារញខេត្តស្រះកែវ ប្រឈមនិងច្រកប៉ោយប៉ែត ខេត្តបន្ទាយមានជ័យ ។ សេចក្តីរាយការណ៏បានឲ្យដឹងថា មុនពេលសមត្ថកិច្ចថៃ ឆែករទេះកម្មករខ្មែរ ដែលសង្ស័យថា បានដឹកឈើក្រញូងនោះ បន្ទាប់ពីមានព័ត៌មានពីកម្ពុជា ថាមុន២ថ្ងៃថាសមត្ថកិច្ចគយនិងរដ្ឋាករច្រកអន្តរជាតិប៉ោយប៉ែត បង្ខំចិត្ត ឆែករទេះកម្មករតាមការចង្អុរបង្ហាញពីក្រុមអ្នកសារព័ត៌មាននៅក្រុងប៉ោយប៉ែត រកឃើញឈើក្រញូងជាច្រើនរទេះ ដែលឈ្មួញជួលកម្មករដឹកពីដីថៃមកកម្ពុជា ។
ប្រភពបានបង្ហើបមកថា៖ ឈ្មួញដឹកឈើក្រញូងនៅច្រកទ្វារអន្តរជាតិប៉ោយប៉ែត គឺបានត្រូវរ៉ូវគ្នាជាមួយនិងមន្ត្រីជំនាញអស់ហើយ ទើបពួកគេហ៊ានដឹកមកជាចំហរបែបនេះ ប៉ុន្តែមូលហេតុដែលឈានដល់ចំណុចបង្ក្រាបនោះ ដោយសារតែអ្នកសារព័ត៌មានអុកឡុក ? ។ សេចក្តីរាយការណ៏បានឲ្យដឹងថា៖ ឈ្មួញកណ្តាលដែលជាអ្នកនាំឈើក្រញូងចេញមកកម្ពុជានោះ មានឈ្មោះ កុសល ដែលមានឃ្លាំងស្តុបនៅខាងលិចវត្តបាលិលេយ្យ និងមួយទីតាំងទៀត ឃ្លាំងស្តុបទំនិញរបស់ពួកគេនៅដីថ្មីផងដែរ ។
ឈ្មួញកណ្តាលឈ្មោះ កុសល នោះ មានរទេះដឹកទំនិញជាច្រើន ប៉ុន្តែរទេះពួកគេ មិនបានចូលទៅឈប់ចតនៅទីលានត្រួតពិនិត្យ របស់មន្ត្រីជំនាញដូចគេឯងទេ គឺពួកចេញពីដីថៃ ដោយស្វ័យប្រវត្តិតែម្តង ករណីនេះបានកើតមានជាយូមកហើយ បន្ទាប់ពីលោក ហ៊ុយ សុជាតិ ប្រធានការិយាល័យ គយនិងរដ្ឋាករ ប្រចាំច្រកប៉ោយប៉ែតឡើងមកគ្រងតំណែងមកម្លេះ ?។
ជ៊ំវិញករណីដ៏រសើប ពាក់ពន្ធ័និងបទល្មើសឈើក្រញូងត្រូវគេនាំចូលកម្ពុជា តាមច្រកអន្តរជាតិប៉ោយប៉ែត លោក ហ៊ុយ សុជាតិ ប្រធានការិយាល័យគយ និងរដ្ឋាករ នៅព្រឹកថ្ងៃទី០៩វិច្ឆិកា២០១៧នេះ អង្គភាពយើងមិនអាចទាក់ទងបានទេ លើបញ្ហាឈើក្រញូងសំរុកបុកពីថៃតាមច្រកអន្តរជាតិប៉ោយប៉ែតនេះ ។
សូមបញ្ជាក់ដែរថា៖កាលពីថ្ងៃទីទី០៧ខែវិច្ឆិកាឆ្នាំ ២០១៧ គយចល័តរបស់សាខាខេត្តបន្ទាយមានជ័យប្រចាំឃុំអូរបីជាន់បានឃាត់រថយន្តម៉ាកនីសាន់១គ្រឿងដឹកឈើគ្រញូងមកពី ព្រំដែនថៃដែរ។ រថយន្តដែលមន្ត្រីគយចាប់នោះ ពណ៌សពាក់ស្លាកលេខបាត់ដំបង2A.1984 រួមនិងតៃកុងរថយន្តពីរនាក់ប្ដីប្រពន្ធផងដែរ ។ សកម្មភាពឃាត់រថយន្តដឹកឈើក្រញូងនៅត្រង់ចំណុចឃុំអូរបីជាន់ស្រុកអូរជ្រៅកែងផ្លូវទៅតំបន់៥ ។
តែទោះជាយាងណាក្តី មន្ត្រីគយមិនបានបង្ហាញចំនួននៃវត្ថុតាងប្រាប់ដល់អ្នកសារព័ត៌មាននោះទេ មិនតែប៉ុណ្ណោះក្រុមសមត្ថកិច្ចគយនិងរដ្ឋាករទាំងនោះក៏មិនបានអនុញាតឲ្យអ្នកសារព័ត៌មានស្រង់យកខ្លឹមសារនៃការបង្ក្រាបនោះទៀតផង ។ ចំណែក លោក ឆែ សុធា ប្រធានសាខាគយនិងរដ្ឋាករខេត្តបន្ទាយមានជ័យ នៅព្រឹកថ្ងៃទី០៨ខែវិច្ឆិកាឆ្នាំ២០១៧ អង្គភាពសារព័ត៌មានយើង មិនអាចទាក់ទងស៊ំការបំភ្លឺបានបានទេ ជ៊ំវិញករណីសមត្ថកិច្ចជំនាញគយ របស់សាខាដែលបានបង្ក្រាបបទល្មើសឈើក្រញូង ហើយបិទបាំងព័ត៌មានមិនឲ្យអ្នកសារព័ត៌មានផ្តិតយករូបភាពទៅផ្សព្វផ្សាយ ។ករណីយ៍បានធ្វើឲ្យមានការសង្ស័យថាការបង្ក្រាបរបស់គយជាបន្តបន្ទាប់នេះគឺដោយសារបែកការណ៍តែប៉ុណ្ណោះដើម្បីយកស្នាដៃទៅ!៕
