កំពង់ឆ្នាំង ៖ ប្រាសាទពណ្ណរាយ ជាតំបន់ទេសចរណ៏ ដែល មាន វៃចំណាស់ ស្ថិតនៅលើកំពូលភ្នំមានបុណ្យ មានកំពស់ ១៤០ ម៉ែត្រ ស្ថិតក្នុង ភូមិលិច ឃុំច្រណូក ស្រុកកំពង់លែង ខេត្តកំពង់ឆ្នាំង នៅពេលយើងឡើងទៅដល់ ប្រាសាទ ពណ្ណរាយ ដែលបុព្វបុរសខ្មែរបានកសាងនៅលើកំពូលភ្នំមាន បុណ្យ ហាក់បីដូច ជាមាន អារម្មណ៍ ស្រងេះស្រងោច ខុសពី ប្រាសាទដទៃព្រោះថា ប្រាសាទនេះ មិនសូវមាន ប្រជា ពលរដ្ឋ ឬអ្នកទេសចរណ៍ជិតឆ្ងាយ ទៅទស្សនា កំសាន្ដនោះ ឡើយ ព្រោះតែខ្វះការ ផ្សព្វផ្សាយព័ត៌មានរបស់ មន្ទីរពាក់ ពន្ធ័ និង អាជ្ញាធរ មូលដ្ឋាន ។
នេះបើតាមការបញ្ជាក់ឲ្យដឹងពី លោក សេង សាលី ប្រធានមន្ទីរទេសចរណ៍ខេត្ដកំពង់ឆ្នាំង កាលពីថ្ងៃទី០៩ វិច្ឆិកា ឆ្នាំ២០១៧។
លោក សេង សាលី បានបញ្ជាក់ថា៖ ភ្នំមានបុណ្យនៅដាច់ឆ្ងាយពីភ្នំដទៃទៀត ។ ភ្នំនេះព័ទ្ធជុំវិញរំលេចដោយ វាលស្រែ និងផ្ទៃបឹងធំៗ ពណ៌ បៃតងស្រស់មើលទៅ គួរអោយ រីករាយក្នុង អារម្មណ៍ជាពន់ពេក ។ ផ្លូវឡើងទៅលើ កំពូលភ្នំមានកាំជណ្តើរធ្វើ ពីស៊ីម៉ង់ត៍ជាង២០០កាំដែលនៅ អមសងខាងជណ្តើរឡើងមានរុក្ខជាតិនិង ដើមឈើគ្រប់ ប្រភេទដុះអមយ៉ាងស្រស់បំព្រង ។នៅលើកំពូលភ្នំ គេ ឃើញ មានផ្ទៃរាបស្មើប្រមាណ៥០ ម៉ែត្រគុណនឹង៣០ ម៉ែត្រជាទីដែលបុព្វបុរសយើងកសាងប្រាសាទពណ្ណរាយ នេះ ឡើង ដើម្បីឧទ្ទិសចំពោះលទ្ធិព្រហ្មញ្ញសាសនានា សម័យ នោះ តែមានលក្ខណៈមួយដែលយើងគួរកត់សម្គាល់ និង មានអាថ៌កំបាំងគឺប្រាសាទនេះបានសង់បែរមុខទៅទិស ខាងលិច ខុសពីប្រាសាទកំពង់ព្រះបែរមុខទៅទិសខាងជើង រីឯ ប្រាសាទជាច្រើនទៀតបែរមុខទៅ ទិសខាងកើត ។
លោក សេង សាលី បានបន្តថា៖ ប្រាសាទពណ្ណរាយ មានប្រាង្គប្រាសាទ២បែរមុខទៅខាងលិចកសាងឡើង អំពី ឥដ្ឋ និងថ្មភក់ ក្នុងអំឡុងសតវត្សទី៧ និងទី៨ក្នុងយុគសម័យ តែមួយជាមួយនឹងការកសាងប្រាសាទនានា ជាច្រើន ក្នុងស្រុកកំពង់លែងនេះដែរ ។ ប្រាសាទមានទំហំ៤ម៉ែត្រ គុណ នឹង៤ម៉ែត្រ ក្នុងប្រាង្គនីមួយៗនៅលើជញ្ជាំងក្តីលើផ្ទៃ ច្រកទ្វា ចូលក្តីមិនមាននៅសល់ក្បាច់ចំលាក់អ្វីឡើយ គឺមានតែស្នាម ប្រេះស្រាំរបេះឥដ្ឋធ្លាក់ដោយ អន្លើ គួរអោយ សង្វេគ ក្រៃលែង នៅពេល នឹកដល់ស្នាដៃ មរតក៌ ដ៍មានតម្លៃ ដែល បុព្វបុរសខ្មែរយើង បន្សល់ទុកអោយ កូនចៅ ជំនាន់ ក្រោយ បានឃើញ និង ស្វែងយល់ពីអរិយធម៌នាសម័យកាលនោះ ។
នៅ ជុំវិញបរិវេណប្រាសាទទាំង២ មាននៅសេសសល់ បំណែកបែកបាក់ជាច្រើនដូចជាសរសរពេជ្រផ្ទាំងថ្មខ្លះ មាន ក្បាច់ចម្លាក់ខ្លះទៀតជាទម្រទ្រ ដែលមានទំហំធំ ដែលអ្នក អភិរក្ស បានប្រមូលទុកបានមួយចំនួនតូច ។ ដោយឡែក ទេសភាពនៅជុំវិញជើងភ្នំវិញ ប្រកបដោយជំនោរ ខ្យល់ បរិសុទ្ធ ត្រជាក់ចិត្តដែលជារៀងរាល់ថ្ងៃ បុណ្យប្រពៃណី ប្រជាពលរដ្ឋនៅក្នុង ស្រុកកំពង់លែងតែនាំគ្នាទៅធ្វើ បុណ្យទានជួបជុំគ្នានៅលើកំពូលភ្នំនេះ ។ ប៉ុន្តែ ក្រោយពី ថ្ងៃ ធ្វើ បុណ្យទានគេពុំសូវឃើញមានប្រជាពលរដ្ឋឬ អ្នក ទេសចរណ៍ទៅកំសាន្តនៅទីនោះឡើយ ធ្វើអោយ ប្រាង្គ ប្រាសាទមួយនេះប្រែជាស្ងាត់ជ្រងំស្រងេះស្រងោចនៅលើ កំពូលភ្នំតែឯងដែលសភាពបែបនេះ តម្រូវអោយ អាជ្ញាធរ ឃុំ ស្រុក ខេត្តជាពិសេសមន្ទីរទេសចរណ៍ខេត្តត្រូវយកចិត្តទុកដាក់ក្នុងការផ្សព្វផ្សាយបន្ថែមដល់អ្នកទេសចរណ៍ជាតិ អន្តរជាតិបានគេបានដឹងបានស្គាល់និងទៅលេងកំសាន្តនៅ ប្រាង្គប្រាសាទពណ្ណរាយដែលជាកេរ្ត៍ មរតក៌របស់ដូនតាខ្មែរ ដែលគួរអោយកំសត់នេះមួយនេះ ផង ៕