ភ្នំពេញ៖លោកយាយចាន់ស៊ីផាន់មានអាយុ៩៣ឆ្នាំ សិល្បការនីជើងចាស់មួយរូបដែលធ្លាប់បន្សល់ទុកស្នាដៃភាពយន្តខ្មែររាប់សិបរឿងកន្លងមកកំពុងតែធ្លាក់ខ្លួនមានជម្ងឺរលាកពោះវៀននិងថ្លើម។ តាមរយៈហ្វេសប៊ុកកូនស្រីលោកយាយក៏បានបង្ហើបនូវបំណងប្រាថ្នាចុងក្រោយរបស់លោកយាយថាចង់ជួបមុខសិល្បករខ្មែរទាំងអស់ដែលធ្លាប់ស្គាល់ និងគាំទ្រភាពយន្តរបស់លោកយាយកន្លងមកនាដង្ហើមចុងក្រោយ។
ទទួលបានដំណឹងនេះនៅថ្ងៃទី៨វិច្ឆិកានេះ តារាចម្រៀងនិងសម្តែង ស៊ិន ឧត្ដមផល្លា និង អ្នកនាង ឡាយ លក្ខិណា បានមកសួរសុខទុក្ខ ដោយនាំថវិកាពីសប្បុរសជន រួមទាំងថវិការផ្ទាល់ខ្លួនបន្តិចបន្តួចយកមកជូនលោកយាយដែលកំពុងធ្លាក់ខ្លួនឈឺ។
តារាចម្រៀង ស៊ិន ឧត្ដមផល្លាដែលទើប្រកាសថាចូលប្រឡូកក្នុងវិស័យសិល្បៈវិញជាមួយអ្នកនាងឡាយលក្ខិណា បានរៀបរាប់ក្នុងហ្វេសប៊ុកឲ្យដឹងថា៖ “ថ្ងៃនេះនាងខ្ញុំ ស៊ិន ឧត្ដមផល្លា រួមទាំងប្អូនស្រី ឡាយ លក្ខិណា បានមកសួរសុខទុក្ខលោកយាយ ចាន់ ស៊ីផាន់ ដែលជាអតីតតារាសម្ដែង និងបានពាំនាំថវិកាពីសប្បុរសជន រួមទាំងថវិការផ្ទាល់ខ្លួនបន្តិចបន្តួចយកមកជូនលោកយាយ។
សប្បុរសជនទាំងនោះមានដូចជា លោក Tony Son ហៅតុង ម្ចាស់ផលិតកម្មឆ្លងដែនរស់នៅសហរដ្ឋអាមេរិក, លោក ដួង ប៉េងឡុង រស់នៅសហរដ្ឋអាមេរិក, តារារៀមច្បង ចា រិទ្ធី រួមទាំងនាងខ្ញុំ ស៊ិន ឧត្ដមផល្លា និងតារាចម្រៀង ឡាយ លក្ខិណា”។សូមបញ្ជាក់ដែរថា៖មុននេះលោកខៃប្រសិទ្ធអតីតប្តីខ្មោចអ្នកស្រីពីសីទ្ធពីលិការតារាសម្តែងចើងចាស់ក៏បានផ្ញើលុយ១០០០ដុល្លារពីអូស្ត្រាលីមកជួយលោកយាយចាន់ ស៊ីផាន់ផងដែរ។ សូមអបអរសាទនិងកោតសសើរស្មារតីអ្នកសិល្បៈ២ដួងនេះ!!!។
