ភ្នំពេញ៖ មន្ត្រីកាំកុងត្រូលផែស្ងួតចុងទីភ្នំពេញ សហការជាមួយមន្ទីរពាណិជ្ជកម្ម បានចុះ ពិនិត្យ និងអង្កេត ទំនិញនៅទីផ្សារចំនួនពីរក្នុងរាជធានីភ្នំពេញ គឺផ្សារកណ្តាល និងផ្សារធំថ្មី ដើម្បីស្វែងរក សារធាតុគីមីហាមឃាត់ និងអប់រំអាជីវករ កុំទទួលយកផលិត ផល ណាដែលមានជាតិគីមី មកដាក់លក់ នាំឲ្យខួចសុខភាព ដល់អ្នកប្រើប្រាស់ ។
ប្រតិបត្តិការនេះធ្វើឡើង កាលពីព្រឹកថ្ងៃទី ០៨ វិច្ឆិកា ឆ្នាំ២០១៧ ដោយអនុវត្តន៍នូវតួនាទីភារកិច្ច និងសេចក្តីណែនាំជាប្រចាំរបស់ប្រធានប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានកាំកុងត្រូល លើការការពារសុខមាលភាពប្រជាជន និងសុវត្ថិភាពម្ហូបអាហារ។
មន្ត្រីកាំកុងបានបញ្ជាក់ថា ជាលទ្ធផលសង្កេតឃើញថា នៅផ្សារទាំងពីរពុំមានការដាក់តាំងលក់ទំនិញហួសកាលបរិច្ឆេទប្រើប្រាស់នោះទេ ដោយសារបច្ចុប្បន្ននេះ អាជីវករមានការយល់ដឹងច្រើន និងបានសហការយ៉ាងល្អជាមួយសមត្ថកិច្ចពាក់ព័ន្ធ។ ជាមួយនេះដែរលោក ក៏បានបន្ដចុះ ពិនិត្យ ទៅលើ ទំនិញជាផលិតផលពងត្រី ដែល មានឈ្មោះ ថា Rainbow Trout Caviar ដែលមានផ្ទុកស្ព័ររបស់បាក់តេរីដែលអាចបង្កហានិភ័យខ្ពស់ ដល់អ្នកប្រើប្រាស់ ព្រមទាំងធ្វើការផ្សព្វផ្សាយដល់អាជីវ ករកុំឲ្យ ទទួលលក់ផលិតផលនេះ។ដោយគ្រឿងហូបចុកដូចជា ប្រភេទប្រហុក,ផ្អក,ជ្រក់, គ្រឿងសមុទ្រ,សាច់,ស្លឹកគ្រៃហាន់រួច និងបន្លែ ចំនួន ៣៥មុខ ត្រូវបានបញ្ជូនទៅមន្ទីរពិសោធន៍ដើម្បីស្វែងរកសារធាតុគីមីហាមឃាត់ ផងដែរ ។
ក្នុងឱកាសនោះដែរលោកក៏បានណែនាំដល់ក្រុមអាជីវករទាំងអស់ត្រូវដាក់តាំងលក់ផលិតផលឲ្យត្រូវតាមលក្ខណៈបច្ចេកទេស ដោយញែកដាច់ចេញពីគ្នារវាងគ្រឿងប្រើប្រាស់ ដែលមានផ្ទុកសារធាតុពុល និងម្ហូបអាហារ ហាមការដាក់តាំងផលិតផលភេសជ្ជៈត្រូវកំដៅថ្ងៃ និងការដាក់លក់ផលិតផលហួសកាលបរិច្ឆេទជាដើម។សូមអាជីវករ អ្នកចែកចាយ លក់ដុំ លក់រាយ អ្នកផលិត នាំចូលចែកចាយ ត្រូវតែមានប្រភពច្បាស់លាស់សិនមុននឹងទទួលយកមកលក់ ហើយត្រូវបញ្ឈប់ការលាយបន្ថែមនូវសារធាតុគីមីផ្សេងៗ ទៅលើផលិតផលម្ហូបអាហារដែលធ្វើឲ្យប៉ះពាល់ដល់សុខភាពអ្នកប្រើប្រាស់ ៕