ភ្នំពេញ៖ លោក ឈឹម សុធី ប្រធាននាយកដ្ឋានសិល្បៈសូនរូប និងសិល្បៈសិប្បកម្ម បានបញ្ជាក់ នៅ ក្នុងសន្និសីទសារព័ត៏មាន នារសៀលថ្ងៃទី០៧ ខែវិច្ឆិកា នេះនៅនាយកដ្ឋានសិល្បៈសូនរូបថា៖ សព្វថ្ងៃ មានសិប្បករតម្បាញសូត្រជិត១ម៉ឺនសិប្បករ នៅទូទាំងប្រទេស។
លោកបន្តថា៖ បច្ចុប្បន្ននេះ ក្រុមការងារកំពុងរៀបចំផែនការពង្រីកនូវការផលិតសសៃសូត្រ នៅក្នុងស្រុកត្រូវដាំមន ចិញ្ចឹមដង្កូវនាង ឲ្យបានច្រើនកន្លែង និងស្វែងរកទីផ្សារផ្សព្វផ្សាយនាំចេញផលិតផលសូត្រលើទីផ្សារអន្តរជាតិ ។នៅថ្ងៃទី២៣ រហូតដល់ថ្ងៃទី២៥ ខែវិច្ឆិកា ឆ្នាំ២០១៧ខាងមុខនេះ នាយកដ្ឋានសិល្បៈសូនរូប និងសិប្បកម្មនៃក្រសួងវប្បធម៌ និងវិចិត្រសិល្បៈ និងបើកមហោស្រពសិល្បៈជាតិឆ្នាំ២០១៧ ដើម្បីជ្រើសរើសស្នាដៃសិល្បៈតម្បាញសូត្រ ក្រោមប្រធានបទ ការរចនាក្បាច់លម្អគោមផ្កាចាន់លើសំពត់ហូលខ្មែរ ព្រមទាំងមានការដាក់តាំងពិព័រណ៍ផលិតផលវប្បធម៌សូត្រខ្មែរ វត្ថុសិល្បៈសូនរូប និងសិល្បៈសិប្បកម្ម ស្ថិតក្រោមវត្តមាន លោកស្រី ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ នៅបណ្ណាល័យជាតិកម្ពុជា ។
លោកបានបញ្ជាក់ថា៖ ក្នុងប្រវតិ្តសាស្ត្ររបស់មនុស្ស សូត្រមានគុណតម្លៃខ្ពស់សម្រាប់អ្នកជំនាន់មុន ពាក្យថាសូត្រតម្រូវលើសំលៀកបំពាក់ អ្នកដែលមានតួនាទីឋានៈខ្ពស់ៗ ហើយមានអង្គការច្រើន បានប្រឹងប្រែងលើកកម្ពស់ឡើងវិញលើវិស័យត្បាញរវៃ ហើយពួកគាត់ទាំងអស់នោះ មិនត្រឹមតែត្រូវថែរក្សានូវក្បាច់បុរាណថ្មីៗនោះទេ ប៉ុន្តែត្រូវប្រឌិតនូវក្បាច់ថ្មីៗដោយរក្សាលើមូលដ្ឋានចាស់របស់យើងផងដែរ។ ដូច្នេះក្នុងនាមក្រសួងវប្បធម៌ លោកសូមឲ្យបេក្ខជន និងបេក្ខនារីបន្តដាក់ពាក្យ ចូលរួមប្រកួត ប្រជែង ដែលមានវិញ្ញាសារចូលរួម ការរចនាក្បាច់លម្អគោមផ្កាចាន់លើសំពត់ហូលខ្មែរខ្នាត៩០សង់ទី ម៉ែត្រ គុណនិង២០០សង់ទីម៉ែត្រ។ លក្ខខណ្ឌចូលរួមអ្នកចូលរូមមានសញ្ជាតិខ្មែរ ផ្ទាំងសំពត់ហូលខ្មែរ ក្រោមប្រធានបទ ការរចនាក្បាច់លម្អគោមផ្កាចាន់លើសំពត់ហូលខ្មែរ ដាក់ពាក្យនៅមនី្ទរវប្បធម៌ និងវិចិត្រសិល្បៈរាជធានី ខេត្ត ទទួលស្នាដៃចាប់ពីថ្ងៃជូនដំណឹងនេះរហូតដល់ថ្ងៃទី១៤ ខែវិចិ្ឆកា ឆ្នាំ២០១៧ និងបញ្ជូនស្នាដៃមកនាយកដ្ឋានសិល្បៈសូនរូប និងសិល្បៈសិប្បកម្ម ដែលស្ថិតនៅទីសី្តការក្រសួងឲ្យបានមុនថ្ងៃទី១៦ ខែវិចិ្ឆកា ឆ្នាំ២០១៧ និងយកសម្ភារៈមកដាក់តាំងពិព័រណ៌ នៅថ្ងៃទី២២ ខែវិចិ្ឆកា ឆ្នាំ២០១៧ ។
លោកបន្ដថា៖ ចំពោះជ័យលាភី ចំណាត់ថ្នាក់លេខ១ និងទទួលបានទឹកប្រាក់ ៣លានរៀលអមដោយប័ណ្ណជ័យលាភី, ចំណាត់ថ្នាក់លេខ០២ និងទទួលបានទឹកប្រាក់២,៥លានរៀល អមដោយប័ណ្ណជ័យលាភី,ចំណាត់ថ្នាក់លេខ០៣ ទទួលបានទឹកប្រាក់២លានរៀលអមដោយប័ណ្ណជ័យលាភី រួមនិងរង្វាន់លើក ទឹកចិត្ត អមដោយប័ណ្ណសរសើរ ។
លោកឈឹម សុធី បានបញ្ជាក់ថា៖ រហូតមកដល់ថ្ងៃទី៧ ខែវិចិ្ឆកា ឆ្នាំ២០១៧ មានបេក្ខជន បេក្ខនារី មកដាក់ពាក្យចូលរួមប្រកួតប្រមាណ៣០នាក់ និងស្តង់ដាក់បង្ហាញផលិតផលសូត្រមានប្រមាណ៤០ហើយ។
សិល្បៈតម្បាញសូត្រ ជាមរតកវប្បធម៌របស់ដូនតាបន្សល់ទុកសម្រាប់កូនចៅជំនាន់ក្រោយ នាំគ្នារួមចំណែកអភិរក្ស និងអភិវឌ្ឍវិស័យសិល្បៈនេះ ឲ្យសិ្ថតស្ថេរគង់វង្សជានិរន្តរ៍ ដើម្បីឲ្យកាន់តែមានភាពប្រសើរឡើងស្របតាមគោលនយោបាយវប្បធម៌ របស់ក្រសួង ក្នុងការជំរុញ និងផ្សព្វផ្សាយនូវផលិត ផល សិល្បៈសូនរូប និងសិល្បៈសិប្បកម្ម សំដៅលើកកម្ពស់គុណភាព ផ្គត់ផ្គង់ផលិតផលតម្បាញសូត្រក្នុង និងក្រៅស្រុកដល់អ្នកប្រើប្រាស់ទូទៅ ព្រមទាំងបម្រើដល់ការអភិវឌ្ឍវិស័យទេសចរណ៍ ឲ្យកាន់តែមានកំណើនច្រើនឡើងៗ ជួយលើកកម្ពស់ដល់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋផងដែរ ៕
