កំពត ៖ រយៈពេលបីថ្ងៃ នៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅរាជ ធានីភ្នំពេញ ភ្ញៀវទេសចរបានសម្រុកទៅសម្រាកកម្សាន្តនៅ ក្នុងខេត្តកំពត-កែប ច្រើនកុះករ មិនធ្លាប់មានពីមុនមក ។
ក្នុងរយៈពេលបីថ្ងៃ នៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ខេត្តកំពត និងកែប ទទួលបានភ្ញៀវទេសចរណ៏ ជាតិ-អន្តរជាតិជិត១០ម៉ឺននាក់។ នេះបើតាមការឲ្យដឹងពីមន្ត្រីមន្ទីរទេសចរណ៍ខេត្តទាំងពីរ កាលពីថ្ងៃទី ០៦ វិច្ឆិកា ឆ្នាំ២០១៧ ។
លោក ប៉ុក ទាង អនុប្រធាន មន្ទីរទេសចរណ៏ ខត្ដកែប បានឲ្យដឹងនៅថ្ងៃទី ០៦ វិច្ឆិកានេះថា៖ ជាទូទៅ តំបន់ទេសចរណ៍ ខេត្តកែប នៅក្នុងថ្ងៃបុណ្យជាតិធំៗ ដូចជា ចូលឆ្នាំខ្មែរ ភ្ជុំបិណ្ឌ បុណ្យអុំទូក និងពិធីបុណ្យដទៃទៀត គឺតែង ទទួលបានទេសចរជាច្រើនទៅសម្រាកលម្ហែ កម្សាន្ត ស្រូបយកខ្យល់អាកាសដ៏បរិសុទ្ធ និងគយគន់មើល ទេសភាពយ៉ាងប្រណីតៗ នៅតំបន់ទេសចរណ៍នានានៃខេត្តកែប ដែលទើបតែឈ្នះពានរង្វាន់ទីក្រុងនិរន្តរ ភាព បរិស្ថានអាស៊ាន (ដីស្អាត ខ្យល់ស្អាត និងទឹកស្អាត) នៅពេលថ្មីៗកន្លងទៅនេះ។
បើតាមការប៉ាន់ស្មានរបស់លោក ប៉ុក ទាង ក្នុងឱកាសបុណ្យអុំទូក បណ្តែតប្រទីប អកអំបុក និង សំពះព្រះខែ រយៈពេលបីថ្ងៃ គឺចាប់ថ្ងៃទី០២ រហូតដល់ថ្ងៃទី០៤ ខែវិច្ឆិកា នេះ លោកសង្កេតឃើញភ្ញៀវ ទេសចរ ទាំងជាតិ និងអន្តរជាតិ ចន្លោះប្រមាណពី២ទៅ៣ម៉ឺននាក់ក្នុងថ្ងៃ មកសម្រាកលម្ហែ កាយ នៅខេត្ត កែប ដែលជាខេត្តនឹងត្រូវធ្វើជាម្ចាស់ផ្ទះរៀបចំពិធីបុណ្យសមុទ្រឆ្នាំ២០១៧ នៅដើមសប្តាហ៍ទី៤ ខែធ្នូ ខាងមុខ។
ដោយឡែក ខេត្តកំពត ដែលជាបណ្តុំទេសចរណ៍សម្បូរ បែប ទាំងវប្បធម៌ និងសម័យ ទាំងធម្មជាតិ និងកែច្នៃ ព្រមទាំងតំបន់កសិទេសចរណ៍ដ៏អស្ចារ្យជាច្រើន មានដូចជាដំណាំម្រេច ដែលមានឈ្មោះល្បីរន្ទឺ ជុំវិញពិភពលោកលើផ្នែកគុណភាព ដំណាំធូរ៉េន និងស្រែអំបិល ជាដើមនេះ ក៏បាននឹង កំពុងតែបោះជំហ៊ានកែច្នៃខ្លួនឲ្យក្លាយទៅជាខេត្តសេដ្ឋកិច្ច និងពាណិជ្ជកម្មដ៏សំខាន់របស់ប្រទេសផងដែរ ហើយកត្តានេះហើយបានទាក់ទាញភ្ញៀវជាតិ និងអន្តរជាតិ។
ប្រធានការិយាល័យផែនការអភិវឌ្ឍទេសចរណ៍វប្បធម៌ នៃមន្ទីរទេសចរណ៍ខេត្តកំពត លោក គឹម ប៊ុនថន បានប្រាប់ឲ្យដឹងថា ក្នុងរយៈពេលបីថ្ងៃនៃព្រះរាជពិធីបុណ្យអុំទូក បណ្តែតប្រទីប អកអំបុក និង សំពះព្រះខែ ខេត្តនេះទទួលបានភ្ញៀវទេសចរជិត៨ម៉ឺននាក់។ ទេសចរបានធ្វើដំណើរទៅសម្រាកលម្ហែ កម្សាន្តនៅតាមតំបន់រមណីយដ្ឋានពេញនិយមធំៗ ដូចជា ភ្នំបូកគោ ទឹកឈូ ទឹកជ្រោះតាដា និងតំបន់មាត់ ព្រែកកំពត ជាដើម ហើយភាគច្រើនបំផុតជាភ្ញៀវទេសចរជាតិ៕
