នាព្រឹកថ្ងៃទី ០៦ ខែ វិច្ឆិកា ឆ្នាំ២០១៧ នៅបរិវេណវិទ្យាល័យព្រះមហាក្សត្រីយានីកុសុមៈ បានរៀបចំប្រារព្ធធ្វើពិធីអបអរសាទរ ថ្ងៃបើកបវេសនកាល ឆ្នាំសិក្សាថ្មី២០១៧.២០១៨ ដែលបានប្រព្រឹត្តទៅ ក្រោមអធិបតីភាពរបស់ឯកឧត្តមសរ ចំរុង អភិបាលនៃគណៈអភិបាលខេត្ត ដោយមានការអញ្ជីញចូលរួមពីសំណាក់ ឯកឧត្តម លោកជំទាវ អស់លោក លោកស្រីជាថ្នាក់ដឹកនាំមន្ទីរ លោកគ្រូសាស្ត្រាចារ្យ មាតាបិតា អាណាព្យាបាលសិស្ស ព្រមទាំងសិស្សានុសិស្សផងដែរ ។
ឯកឧត្តមអភិបាលខេត្ត ក៏បានធ្វើការសាទរផងដែរ អំពីលទ្ធផលល្អនៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៦.២០១៧ ព្រមទាំងទទួលបាននិទ្ទេសល្អផងដែរ ។
ឯកឧត្តមអភិបាលខេត្ត បានថ្លែងនូវសុន្ទរកថារបស់សម្ដេចអគ្គមហាសេនាបតីតេជោ ហ៊ុន សែន នាយរដ្ឋមន្ដ្រីនៃព្រះរាជាណាចក្រកម្ពុជា ក្នុងពិធីបើកបវេសនកាល ឆ្នាំសិក្សាថ្មី២០១៧.២០១៨ ដោយគូសបញ្ជាក់ថា៖ រាជរដ្ឋាភិបាលបានប្ដេជ្ញាហើយថា នឹងបន្តលើកកម្ពស់គោលការណ៍ ”ការអប់រំប្រកបដោយចិរភាព” តាមរយៈការធានាឱ្យបាននូវលទ្ធភាពទទួលបានសេវាអប់រំប្រកបដោយសមធម៌ ដែលផ្ដល់ឱកាសស្មើៗគ្នាដល់កុមារ និងយុវជនកម្ពុជា ជាពិសេសនៅតាមតំបន់ជនបទដាច់ស្រយាល និងនៅតាមតំបន់ព្រំដែនឱ្យទទួលការអប់រំជាមូលដ្ឋាន ទាំងក្នុងប្រព័ន្ធ និងក្រៅប្រព័ន្ធ ។
កិច្ចការនេះនឹងត្រូវពង្រឹង និងពង្រីកជាបន្តបន្ទាប់ ពីព្រោះការសិក្សារៀនសូត្រ គឺជារឿងដែលត្រូវធ្វើគ្មានទីបញ្ចប់។ ជាពិសេសយើងទាំងអស់គ្នាត្រូវចូលរួមជុំរុញ ឱ្យមានការអប់រំបណ្តុះបណ្តាលឱ្យកាន់តែខ្ពស់ ដោយមិនត្រូវអនុញ្ញាតឱ្យកូនចៅណាម្នាក់ស្ថិតនៅក្រៅសេវាអប់រំនោះឡើយ ។
ឯកឧត្តម ក៏បានផ្តល់នូវដំបូន្មានល្អៗមួយចំនួន ដល់ក្មួយៗសិស្សានុសិស្សទាំងពីរភេទ ត្រូវខិតខំសិក្សារៀនសូត្រ ត្រង់ត្រាប់ស្តាប់ដំបូន្មានរបស់លោកគ្រូអ្នកគ្រូដែលជាអ្នកម្តាយទី២ របស់ខ្លួន និង ត្រូវជៀសចេញឲ្យឆ្ងាយពីគ្រឿងញៀន ល្បែងស៊ីសង ការសែបគប់មិត្តមិនល្អ និង ត្រូវខិតខំរៀនសូត្រ គោរពច្បាប់ចរាចរណ៍ ដើម្បីអប់រំខ្លួនឲ្យក្លាយជាកូនល្អ សិស្សល្អ ពលរដ្ឋល្អក្នុងសង្គមដែលជាសសរស្តម្ភ ដ៏រឹងមាំរបស់ប្រទេសជាតិទៅថ្ងៃអនាគត ៕
លោក កិះខន