ភ្នំពេញ៖ ពិធីបុណ្យអុំទូកបណ្តែតប្រទីប និងសំពះព្រះខែត្រូវបានបញ្ចប់ដោយជោគជ័យ ពុំមានបញ្ហាអ្វីកើតឡើងធ្ងន់ធ្ងរដល់ជីវិតមនុស្ស ខណៈមានទូកចំនួនប្រាំបានលិចតែអាជ្ញាធរសង្គ្រោះទាន់ពេលវេលា និងបានជួយសង្គ្រោះ និងព្យាបាលប្រជាពលរដ្ឋមកកម្សាន្តចំនួនជាង១ម៉ឺននាក់ផងដែរ។
យោងតាមរបាយការណ៍របស់គណៈកម្មាធិការជាតិរៀបបុណ្យជាតិ និងអន្តរជាតិបានចេញនៅយប់ថ្ងៃទី៤វិច្ឆិកា ដែលជាថ្ងៃបញ្ចប់នៃពិធីបុណ្យបានឲ្យដឹងថា ទូកចំនួនប្រាំក្នុងចំណោមទូក១៦២បានលិច តែពុំមានកីឡាករអុំទូកណាម្នាក់រងគ្រោះនោះឡើយ ខណៈកីឡាករអុំទូកម្នាក់ត្រូវបានខ្យល់គរក៏សង្គ្រោះទាន់ពេលវេលាដែរនោះ។
របាយការណ៍បានបន្តថា៖ ការពិនិត្យជារួមនៅថ្ងៃទី៣នៃពិធីបុណ្យអុំទូក អកអំបុក បណ្តែតប្រទីប និងសំពះព្រះខែ សភាពការណ៍សន្តិសុខ សណ្តាប់ធ្នាប់ មានភាពល្អប្រសើរ ដែលមានប្រជាពលរដ្ឋចូលរួមកម្សាន្តសប្បាយប្រមាណចន្លោះពី១,៣លានទៅ១,៥លាននាក់។
របាយការណ៍បានបន្តទៀតថា៖ តាមរយៈកិច្ចខិតខំប្រឹងប្រែងរបស់អាជ្ញាធរមានសមត្ថកិច្ចពាក់ព័ន្ធ ក្នុងការពង្រឹងវិធានការរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាព បានធ្វើឲ្យស្ថានភាពទូទៅ នៅថ្ងៃទី៣នៃព្រះរាជពិធីបុណ្យអុំទូកបណ្តែតប្រទីប និងសំពះព្រះខែអកអំបុកនៅតែមានលក្ខណៈល្អប្រសើរដោយពុំមានហេតុការណ៍ ព្រឹត្តិការណ៍អសន្តិសុខកើតឡើងបង្កភាពភ័យខ្លាច ឬមានផលប៉ះពាល់ ដល់ទិដ្ឋភាពរួមនៃការប្រារព្ធពិធីនោះឡើយ។
តែយ៉ាងណាក៏ដោយក្នុងរយៈពេលបីថ្ងៃនោះជាពិសេសចំថ្ងៃទីពីរនៃពិធីក៏បានធ្វើការឃាត់ខ្លួនយុវជនយុវនារីចំនួនជាង៥០០នាក់មកធ្វើការអប់រំផងដែរ ក្រោយពីពួកគេទាំងនោះបានពាក់អាវមានអក្សរ Army និងPolice ហើយដើរជាក្រុមៗនោះ។
បើតាមរបាយការណ៍ក្នុងរយៈពេលបីថ្ងៃនោះគឺមានករណីលួចតែមួយករណីប៉ុណ្ណោះ តែក៏ត្រូវអាជ្ញាធរធ្វើការឃាត់ខ្លួនបានភ្លាមៗផងដែរ ដោយជនសង្ស័យបន្លំលួចឥវ៉ាន់នៅក្នុងផ្សារទំនើបអ៊ីអន និងឃាត់ខ្លួនជនបរទេសម្នាក់ក្រោយឆែកឃើញជននោះ មានកាំបិទខ្លីជាប់នឹងខ្លួនតែត្រូវបានបញ្ជូនទៅនាយកដ្ឋានអន្តោប្រវេសន៍ ដើម្បីអនុវត្តតាមនីតិវិធីច្បាប់ផងដែរ។
សូមបញ្ជាក់ថា៖ នៅក្នុងពិធីបុណ្យអុំទូកនៅឆ្នាំ២០១៧នេះ គឺមានប្រជាពលរដ្ឋបានមកដើរលែងកម្សាន្តច្រើនជាងឆ្នាំ ២០១៦កន្លងទៅ ហើយការមកច្រើននេះក៏ដោយសារតែពួកគាត់យល់ដឹងកាន់តែច្បាស់អំពីសុខសន្តិភាពនៅប្រទេសកម្ពុជា និងមានសុវត្ថិភាពបន្ទាប់ពីកម្លាំងសមត្ថកិច្ចរាប់ម៉ឺននាក់ដាក់ពង្រាយការពារពួកគាត់ផងដែរ។ ជាមួយនឹងការដើរកម្សាន្តសប្បាយរីករាយក្រោមម្លប់សន្តិភាព ពួកគាត់ក៏បានយល់ដឹងអំពីភាព អនាម័យ និងសណ្តាប់ធ្នាប់ច្រើនផងដែរ ដោយគេសង្កេតឃើញការដាក់ និងខ្ចប់សំរាមដោយមានរបៀបរៀបរយ និងមានអនាម័យល្អនោះ ៕