រតនគិរី៖ ក្នុងដំណើរកម្សាន្តនាថ្ងៃឈប់សម្រាកចំនួន ៣ថ្ងៃ នៃឱកាសព្រះរាជពិធីបុណ្យអ៊ុំទូក សំពះព្រះខែ និងបណ្តែតប្រទីប លោក សុខ សំណាង មានអាយុ ៣៦ ឆ្នាំ ជាប្រជាពលរដ្ឋមកពីរាជធានីភ្នំពេញ ដែលបានមកលំហែកាយនៅខេត្តមួយចំនួនក្នុងភូមិភាគឥសាន្ត បានបង្ហាញពីអារម្មណ៍ភ្ញាក់ផ្អើលចំពោះការអភិវឌ្ឍន៍ និងការ រីកចំរើនយ៉ាងឆាប់រហ័សរបស់ខេត្តរតនគិរី ដោយលោកផ្តោតសំខាន់ទៅលើហេដ្ឋារចនាសម្ព័ន្ធផ្លូវថ្នល់ សួនច្បារ ផ្លូវភ្លោះ ដែលមានលក្ខណៈងាយស្រួលក្នុងការធ្វើដំណើរ និងការរីកលូតលាស់ នូវសណ្ឋាគារទំនើបៗ ផ្ទះសំណាក់ និងភោជនីយដ្ឋានយ៉ាងសម្បូរបែប បូករួមទាំងសម្បូរទៅដោយតំបន់រមនីយដ្ឋានធម្មជាតិជាច្រើន គួរអោយគយគន់ ។
លោក ងិន សូរ៉ា អាយុ ៤៥ឆ្នាំ ជាប្រជាពលរដ្ឋរស់នៅខេត្តក្រចេះ ដែលបានធ្វើដំណើរកម្សាន្តជុំវិញខេត្តក្នុងតំបន់ភូមិភាគឥសាន្ត បានចាត់ទុកខេត្តរតនគិរី គឺជាខេត្តដែលមានសក្តានុពលខ្លាំងលើវិស័យទេសចរណ៍ ជាពិសេសទៀតនោះ គឺខេត្តមួយនេះ មានការអភិវឌ្ឍខ្លាំងលើវិស័យហេដ្ឋារចនាសម្ព័ន្ធផ្លូវថ្នល់ និងវិស័យសំណង់សណ្ឋាគារដ៏ទំនើបៗ រីកដុះដាលដូចផ្សិតជាបន្តបន្ទាប់ ។
លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី បានបញ្ជាក់ថា ក្នុងឱកាសព្រះរាជពិធីបុណ្យអ៊ុំទូក សំពះព្រះខែ និងបណ្តែតប្រទីប នាឆ្នាំនេះ ឃើញថាចំនួនភ្ញៀវទេសចរជាតិ និងអន្តរជាតិ សម្រុកមកកម្សាន្តនៅខេត្តរតនគិរី ច្រើនលើសពីការរំពឹងទុក ដូច្នេះសណ្ឋាគារ ផ្ទះសំណាក់ និងភោជនីយដ្ឋាន ពុំមានគ្រប់តម្រូវការភ្ញៀវ ។ ហើយតំលៃសណ្ឋាគារ ផ្ទះ
សំណាក់នៅក្នុងខេត្តរតនគិរីមានកើនការឡើងពី១៥ដុល្លា ទៅ២០ដុល្លា និងពី២០ដុល្លា ទៅ២៥ដុល្លា គឺដោយសារតែអ្នកដែរអ្នកចូលស្នាក់នៅមិនតាមស្ដង់ដារបស់សណ្ឋាគារ ផ្ទះសំណាក់ ។ ដោយក្នុង១បន្ទប់តម្រូវអោយគេងពីរ ឬបីនាក់ តែភ្ញៀវដែរជួលបន្ទប់ស្នាក់នៅគាត់គេងរហូតដល់៦ ទៅ៧នាក់
។
ជាមួយគ្នានោះ លោក ង៉ែត ពិទូ បានសង្កត់ធ្ងន់ថា ជាមួយនឹងកំណើនដ៏ឆាប់រហ័សនៃលំហូរភ្ញៀវទេសចរមកកាន់ខេត្តរតនគិរី ឃើញថាមានការរីកចម្រើនជាបន្តបន្ទាប់នូវសម្បទាទេសចរណ៍នៅទូទាំងខេត្ត ក្នុងនោះរមនីយដ្ឋានទេសចរណ៍ធម្មជាតិ ដែលមានការគ្រប់គ្រងនឹងរៀបចំដោយសហគមន៍ បានកំពុងដំណើរការទទួលភ្ញៀវទេសចរចំនួន ៨កន្លែង ក្នុងចំណោម ១៤កន្លែង និងមានសណ្ឋាគារចំនួន ១៤កន្លែង ស្មើនឹង ៦២៥ បន្ទប់ ផ្ទះសំណាក់មានចំនួន ៣៦កន្លែង ស្មើនឹង ៥០៤ បន្ទប់ ភោជនីដ្ឋាន អាហារដ្ឋានមានចំនួន ៣៩កន្លែង និងខារ៉ាអូខេ មានចំនួន ១៣កន្លែង ។
លោក ង៉ែត ពិទូ បានអោយដឹងបន្ដរទៀតថា ភ្ញៀវទេសចរដែលមកកម្សាន្តនៅក្នុងខេត្ត
រតនគិរីរយៈពេល៣ថ្ងៃ ក្នុងព្រះរាជពិធីបុណ្យអ៊ុំទូក បណ្ដែតប្រទីប សំពះព្រះខែ អកអំបុក មានចំនួន១២,៧៤៤ នាក់ ក្នុងនោះភ្ញៀវជាតិមានចំនួន១២,៤១៣ នាក់ និងភ្ញៀវអន្តរជាតិមានចំនួន ៣៣១ នាក់ មានការកើនឡើងសរុប២៩,០៤ ភាគរយ ក្នុងនោះមានភ្ញៀវជាតិមានការកើនឡើង២៩,៤៥ ភាគរយ និង ភ្ញៀវអន្តរជាតិកើនឡើង១៥,៣៣ភាគរយ បើធៀបទៅនឹងរយៈពេលដូចគ្នាក្នុងឆ្នាំ២០១៦ ។
គួរបញ្ជាក់ថា ភ្ញៀវទេសចរដែលធ្វើដំណើរកម្សាន្តនៅខេត្តភូមិភាគឥសាន្ត ភាគច្រើនគឺពួកគាត់ធ្វើដំណើរទស្សនាជាខ្សែ ពោលគឺចេញពីខេត្តមួយទៅខេត្តមួយទៀត ដូចជាក្រចេះ មណ្ឌលគិរី រតនគិរី ស្ទឹង
ត្រែង និងខេត្តព្រះវិហារជាដើម ៕
ដោយ៖ចាបសំអាន