បន្ទាយមានជ័យ៖ ប្រជាពលរដ្ឋជាអាជីវកររាប់រយៈនាក់ខកខានមិនបានចូលទៅលក់ដូរនៅផ្សាររោងគ្លឿប្រទេសថៃ ដោយសារអាជ្ញាធរក្រុងប៉ោយប៉ែតមិនផ្តល់សំបុត្រចូលដល់ពួកគាត់បានចូល ។ ប្រជាពលរដ្ឋដែលខកខានមិនបានចូលដីថៃទាំងនោះបានប្រាប់អ្នកសារព័ត៌មានយើងនាម៉ោង៩ព្រឹកថ្ងៃទី០៥វិច្ឆិកា២០១៧ ថាពួកគាត់បានខឹងសម្បារយ៉ាងខ្លាំងដល់អាជ្ញាធរ ក្រុងប៉ោយប៉ែត ដែលមិនបានយកចិត្តទុកដាក់ចំពោះមុខរបរបស់ពួកគាត់។
ស្ត្រីវ័យកណ្តាលម្នាក់ដៃកាន់អាវរងានៅក្នងដៃបានបញ្ចេញប្រតិកម្មហាក់ខឹងតច្រឡោត ខណៈដឹងថា៖គាត់ត្រូវខកខានចូលបើកអាជីវកម្មលក់ដូរនៅក្នុងផ្សារក្នុងដីថៃ។ស្ត្រីរូបនោះបានបន្តថា មូលហេតុដែលនាំឲ្យពួកគាត់ខឹងអាជ្ញាធរក្រុង ដោយសារមិនបានយកទំនិញឲ្យម៉ូយមានតម្លៃរាប់សែនបាតប្រាក់ថៃ ។
សូមរំលឹកថា៖ កន្លងទៅសំបុត្រចូលផ្សារថៃត្រូវបានសមត្ថកិច្ចនគរបាលអន្តោប្រវេសន៏ប្រចាំច្រកទ្វារប៉ោយប៉ែតជាអ្នកលក់ឲ្យពលរដ្ឋសម្រាប់ម្នាក់តម្លៃ១០បាតចូលម្តងហើយមួយថ្ងៃៗពលរដ្ឋខ្លះប្រើសំបុត្រអស់៣ទៅ៥សំបុត្រ ប៉ុន្តែក្រោយមកនៅដើមឆ្នាំ២០១៧អាជ្ញាធរក្រុងប៉ោយប៉ែតលោកង៉ោម៉េង ជ្រូនបានចេញមុខធនារ៉ាប់រងក្នុងការបោះពុម្ពជូនពលរដ្ឋ ដើម្បីកាត់បន្ថយការចំណាយ ។ តែថាការចេញមុខដោះស្រាយរបស់អាជ្ញាធរក្រុងប៉ោយប៉ែតលើបញ្ហាសំបុត្រមិនបានធើ្វឲ្យក្រុមអាជីវករធូស្រាលបន្ទុកដូចការគិតរបស់អាជ្ញាធរទេ ព្រោះថ្ងៃខ្លះសំបុត្រមានថ្ងៃខ្លះសំបុត្រខ្វះ ដែលជាហេតុធើ្វឲ្យពួកគាត់ប្រឈម ។
ប្រជាពលរដ្ឋស្នើដល់ប្រមុខរដ្ឋាភិបាលកម្ពុជា មេត្តាដោះស្រាយលើករណីបណ្ណ័ចូលផ្សារថៃឲ្យបានល្អប្រសើ ជៀសវាងធើ្វឲ្យពលរដ្ឋខកខានដូចសព្វថ្ងៃ ។
លោក ង៉ោ មេងជ្រូន អភិបាលក្រុងប៉ោយប៉ែតដែលពលរដ្ឋដាក់ងារថាជាអភិបាលដែលផ្តល់មរតកកម្មឲ្យរាស្ត្រច្រើនជាងគេនោះ មិនអាចទាក់ទងសុំឲ្យលោកបកស្រាយបាននៅឡើយទេគិតត្រឹមម៉ោង១២ថ្ងៃទី០៥វិច្ឆិកា២០១៧ នេះ គេសង្ឃឹមថា លោកង៉ោមេងជ្រូន នឹងកែខៃលើបញ្ហាសំបុត្រចូលថៃឲ្យបានល្អជាជាង ធើ្វឲ្យរាំងស្ទះដល់ដំណើរការពាណិជ្ជកម្ម របស់អាជីវករដូចពេលនេះតទៅទៀត ! ៕