ខេត្តមណ្ឌលគីរី ៖ បើទោះបីជាខេត្តនេះ មានចម្ងាយឆ្ងាយពីរាជធានីភ្នំពេញយ៉ាងណាក៏ដោយ ក៏សមាគមគ្រូពេទ្យស្ម័គ្រចិត្តយុវជនសម្តេចតេជោ បានចុះបំពេញបេសកកម្មចុងក្រោយប្រចាំឆ្នាំ២០១៥របស់ខ្លួន តាមរយៈការចុះពិនិត្យ និងព្យាបាលជំងឺជូនប្រជាពលរដ្ឋចំនួនជិត៣០០០នាក់ ដោយឥតគិតថ្លៃនៅស្រុកពេជ្រដា នៃខេត្តភាគឥសានមួយនេះ កាលពីវេលាព្រឹកថ្ងៃទី១៤ វិច្ឆិកា ឆ្នាំ២០១៥ ។
សកម្មភាពមនុស្សធម៌នេះ ដឹកនាំដោយលោកហ៊ុន ម៉ាណែត ប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេច តេជោ និងលោកជំទាវ និងមានការចូលរួមពីអាជ្ញាធរ ខេត្ត ស្រុក ក្រុមការងារថ្នាក់ជាតិចុះជួយស្រុក ក្រុមការរងារសមាគមគ្រូពេទ្យស្ម័គ្រចិត្តយុវជនសម្តេចតេជោយុវជន ផ្នែកដែលក្រុមហ៊ុន អង្គការ ស្ថាប័នពាក់ព័ន្ធ និងប្រជាពលរដ្ឋជាច្រើននាក់ផងដែរ ។
លោកហ៊ុន ម៉ាណែត បានមានប្រសាសន៍ថា ស្របពេលប្រទេសមានសុខសន្តិភាព រាជរដ្ឋាភិបាលបានយកចិត្តទុកដាក់ និងខិតខំអភិវឌ្ឍលើគ្រប់វិស័យនៅទូទាំងប្រទេស ព្រមទាំងបានគិតគូរពីសុខទុក្ខ និងជីវភាពរស់នៅរបស់ប្រជាពលរដ្ឋ ។
ជាក់ស្តែង ក្រុមការរងារសមាគមគ្រូពេទ្យស្ម័គ្រចិត្តយុវជនសម្តេចតេជោ បានចុះធ្វើសកម្មភាពពិនិត្យ និងព្យាបាលជំងឺដោយឥតគិតថ្លៃជូនប្រជាពលរដ្ឋនៅក្នុងខេត្តមណ្ឌលគីរី ដែលសកម្មភាពនេះ ស្របតាមគោលនយោបាយរបស់រាជរដ្ឋាភិបាលកម្ពុជាក្នុងការលើកកម្ពស់សុខុមាលភាពប្រជាពលរដ្ឋ។
ដោយ ៖ ហ៊ិនសុគន់
