ខេត្តបាត់ដំបង ៖ លោក ឆ ខេមរិន្ទ នាយករងវិទ្យាស្ថានជាតិបណ្តុះបណ្តាលបច្ចេកទេស បានមានប្រសាសន៍ ក្នុងពិធីបើកសិក្ខាសិលា ស្តីពីការអនុវត្តកម្មវិធីអប់រំ និងបណ្តុះបណ្តាលផ្អែកលើសមត្ថភាពសម្រាប់ គុណវុឌ្ឍិជាតិកម្រិត៣ ដែលរៀបចំដោយ អគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ ក្រោមកម្មវិធីអភិវឌ្ឍន៍ វិស័យអប់រំបណ្តុះបណ្តាលបច្ចេកទេស និងវិជ្ជាជីវៈកាលពីថ្ងៃទី២ ខែវិច្ឆិកា នៅ វិទ្យាស្ថានពហុបច្ចេកទេសភូមិភាគ តេជោសែន ខេត្តបាត់ដំបង បានបញ្ជាក់ថា ក្នុងនាមក្រសួងការងារ និងបណ្តុះបណ្តាលវិជ្ជាជីវៈ ក៏ដូចជាតំណាង នាយកដ្ឋានស្តង់ដារជាតិ និងតំណាងឲ្យវិទ្យាស្ថានជាតិ បណ្តុះបណ្តាលបច្ចេកទេស សូមសំដែងការអបអរសាទរ ចំពោះសិក្ខាសាលា ដ៏មានសារៈសំខាន់ នាពេលនេះ។
លោកបានបញ្ជាក់ទៀតថា ដូចយើងបានដឹងស្រាប់ហើយថា កន្លងមកយើងនៅមានបញ្ហាច្រើន ចំពោះសមត្ថភាព ការប្រើប្រាស់ស្តង់ដារ សមត្ថភាពក្នុងការប្រើប្រាស់កម្មវិធីសិក្សា និងចំណុចផ្សេងៗ ទៀត។ នៅពេលដែលលោក លោកស្រីជាសិក្ខាកាមទាំងអស់ បានចូលរួមទទួលការបណ្តុះបណ្តាល នៃការប្រើប្រាស់ស្តង់ដារ កម្មវិធីសិក្សាខ្លះទៀត និងការសិក្សាផ្សេងទៀត ដែលពាក់ព័ន្ធ មិនចង់ឲ្យ លោក លោកស្រី កុំនិយាយក៏អត់ចេះ អត់ដឹងអ្វីទាំងអស់នោះទេ លើកនេះយើង និងធ្វើការដោយ ប្រុងប្រយ័ត្ន។ ក្រោយពីបញ្ចប់វគ្គបណ្តុះបណ្តាលបន្ត រយៈពេល៥ថ្ងៃនេះ យើងសង្ឃឹមថា សិក្ខាកាម ទាំងអស់ត្រូវតែមានសមត្ថភាព ចាំបាច់ក្នុងការប្រើប្រាស់ ស្តង់ដារជាតិ អំពីកម្មវិធីសិក្សាថ្នាក់ជាតិឲ្យ បានច្បាស់ ចំណុចណាមិនច្បាស់ត្រូវលើជាសំណួរឡើង។
យើងក៏ដឹងហើយថា ចុងឆ្នាំ២០១៥នេះ និងមានសមាហរណកម្មអាស៊ានចូលមក ពេលនោះ យើងនៅមានបញ្ហាច្រើនណាស់ បញ្ហាចម្បងគឺបញ្ហាកម្លាំងពលកម្មហូរចូលមក សុទ្ធតែជាកម្លាំង ពោរពេញទៅដោយសមត្ថភាព ហើយយើងក៏ត្រូវការកម្លាំងពលកម្មយើងមានសមត្ថភាពគ្រាប់គ្រាន់ ដើម្បីឆ្លើយតបតម្រូវការទីផ្សារ។ ទន្ទឹមនឹងនេះយើងត្រូវការថ្នាលបណ្តុះបណ្តាលសំខាន់គ្រូ ប្រកបទៅ ដោយសមត្ថភាព សម្រាប់បណ្តុះបណ្តាលបន្ត នោះពិតជាទទួលបានលទ្ធផលល្អ ក្នុងនាមក្រសួង ការងារនិងបណ្តុះបណ្តាលវិជ្ជាជីវៈ ក៏ដូចជានាយកដ្ឋានស្តង់ដារជាតិ និងវិទ្យាស្ថានជាតិ បណ្តុះបណ្តាលបច្ចេកទេស សូមឲ្យសិក្ខាកាមទាំងអស់ខិតខំប្រឹងប្រែងដើម្បីចាប់យកសមត្ថភាពមួយ ច្បាស់លាស់អាចប្រើការបាន ៕