ភ្នំពេញ៖ លោក លឺ ឡាយស្រេង អតីតមន្ត្រីជាន់ខ្ពស់គណបក្សហ្វ៊ុនស៊ិនបិចនៅថ្ងៃទី២១តុលានេះ បានចេញវិដេអូខ្លីមួយ សុំទោសព្រះមហាក្សត្រនិងនាយរដ្ឋមន្ត្រីហ៊ុនសែន ដោយលោកបញ្ជាក់ថា លោកគ្មានចេតនា មើលងាយព្រះចេស្តាព្រះមហាក្សត្រនោះទេ។
ការចេញមុខសុំទោសគឺក្រោយពីមានការរិះគន់ក៏ដូចជាការព្រមានប្តឹងពីសំណាក់ គណបក្សហ្វ៊ុនស៊ិនប៉ិចរឿង ប្រមាថព្រះមហាក្សត្រ។លោក លឺ ឡាយស្រេង ទទួលស្គាល់ថា សម្តីរបស់លោក ពិតជាមានការជ្រុលជ្រួសទៅលើព្រះមហាក្សត្រមែន ប៉ុន្តែ លោក មិនមានចេនាអ្វី មើលងាយព្រះចេស្តាព្រះមហាក្សត្រនោះទេ។
លោក តាមាត់ឆៅរូបនេះ ក៏បាន សូមទោស ព្រះមហាក្សត្រ ក៏ដូចជា សម្តេចតេជោ ហ៊ុន សែន និងបងប្អូនប្រជាពលរដ្ឋ ផង ដែរ ថា លោក មិនមានបក្ស ពួកអ្វីទេ គ្រាន់តែលោក ជាមន្ត្រី ចាស់ ចេះតែព្រួយបារម្ភខ្លាំងពេក ហើយចេះតែនិយាយ ខុសខ្លះ អញ្ចឹងហើយ លោកទទួលស្គាល់ កំហុស ។លោកតាថា បាន បំរើ ព្រះមហាក្សត្រ តាំងពីយូយ៉ាណាស់មក ហើយតាំងពីសម្តេ ចតា មកម្លេះ ដូច្នេះលោក សុំអភ័យទោស ដល់ព្រះមហាក្សត្រ ក៏ដូចជា សម្តេចនាយករដ្ឋមន្ត្រី និងបងប្អូនប្រជាពលរដ្ឋ ផងដែរ នៅពាក្យ លើសលួស ដែលលោក បាននិយាយខុស។
សូមរំលឹកថា លោក លឺ ឡាយស្រេង ជាមួយលោកស្រី គី លំអង អតីតតំណាងរាស្ត្រគណបក្សហ្វ៊ុនស៊ិនប៉ិច បាន សម្លេងសន្ទនាគ្នា មានរយៈប្រមាណជាង៤នាទី ហើយ ត្រូវបាន Facebook សីហា យកមកបង្ហោះ នៅថ្ងៃទី២១ ខែតុលានេះ។សម្តីឆ្លើយឆ្លងគ្នារវាងលោក លឺ ឡាយ ស្រេង ជាមួយលោកស្រី គី លំអងដែលហ្វេសប៊ុកសីហាផ្សាយឲ្យដឹងថា៖ លោកលឺឡាយស្រេងបានលើក ឡើងពីផែនការដែលនឹងមានមន្ត្រីមួយ ចំនួនចង់ទៅចូលគាល់ព្រះមហាក្សត្រ ក្រោមលេសដែលគេបាននិយាយថា ដើម្បី បន្ថយកំដៅនយោបាយ ហើយទំនងជាចង់សុំការសម្រេចព្រះទ័យពីព្រះមហាក្សត្រឲ្យធ្វើអ្វីមួយតាមគោលបំណងរបស់ពួកគេ ។
ប៉ុន្តែលោកស្រី គី លំអង គិតថា ប្រហែល ព្រះមហាក្សត្រមិនហ៊ានទេ។ នេះបើតាមសំឡេងឆ្លើយឆ្លងរបស់លោកស្រី គី លំអង ក្នុងនោះមានទាំងបញ្ចេញឈ្មោះលោក ឡៅ ម៉ុងហៃ ក៏នឹងត្រូវចូលព្រះបរមរាជវាំងគាល់ព្រះករុណាផងដែរ។ ប៉ុន្តែលោក លឺ ឡាយស្រេង បានឆ្លើយតបទៅលោកស្រី គី លំអង វិញដោយប្រើសម្តីប្រមាថយ៉ាងធ្ងន់ធ្ងរចំពោះព្រះមហាក្សត្រថា «បើមិនហ៊ាន ទេឲ្យដាក់រាជ្យទៅឲ្យគេទៅធ្វើម្តងវិញមាន់ក្រៀវអ៊ីចឹងនោះ»។ បន្ទាប់ពីឮពាក្យនេះ លោកស្រី គី លំអង បានសរសើរលោក លឺ ឡាយស្រេងថា «ក្នុងចំណោមហ្វុ៊នស៊ិនប៉ិច ចាស់ៗមានតែបងឯងទេដែលហ៊ានងើប នោះ» ។
ក្នុងការសន្ទនាគ្នានោះដែរអ្នកទាំង២ក៏បានប្រើពាក្យវាយប្រហារទៅលើសម្តេចក្រុមព្រះ នរោត្តម រណឫទ្ធិ ប្រធានគណបក្ស ហ្វុនស៊ិនប៉ិចបច្ចុប្បន្នដោយពាក្យអសុរោះ មួយចំនួនដូចជាប្រើសម្តីថា «អាស្តេចចោល ម្សៀតមួយនេះយ៉ាប់មែនទែន… ថោកទាប ណាស់! អានេះបន្តុះបង្អាប់រាជវង្សជាដើម»។ លោកស្រី គី លំអង បានបន្ទរថា «ត្រូវ ហើយបង្អាប់ព្រះករុណាទៀត»។ លោក លឺ ឡាយស្រេង ថែមទាំងបានបន្តប្រមាថ ព្រះមហាក្សត្រទៀតថា «បើអាព្រះករុណាហ្នឹងវាអាប់ស្រាប់ផងទេ…» ។
អ្នកនាំពាក្យគណបក្សហ្វុ៊នស៊ិនប៉ិចលោក ញ៉េប ប៊ុនជិន បានថ្លែងថា «ខ្ញុំទទួល បានព័ត៌មានរួចហើយគាត់(លឺ ឡាយស្រេង) បានប្រមាថព្រះចេស្តាព្រះករុណាហើយ គាត់ជេរទាំងសម្តេចក្រុមព្រះទៅទៀត ដូច្នេះ ខ្ញុំសូមជម្រាបជូនទី១សម្តេចក្រុមព្រះលោកបាននាំមកសន្តិភាពជូនប្រជាពលរដ្ឋឆ្នាំ ១៩៩៣ ហើយលោកមានតួនាទីមើលថែ រក្សាស្ថានភាពនយោបាយ។ ដោយឡែក គណបក្សហ្វ៊ុនស៊ិនប៉ិចជាគណបក្សរាជា និយម, ជេរលោកជារឿងមួយ ប៉ុន្តែប្រមាថព្រះចេស្តាព្រះករុណាយើងតំណាងឲ្យរាជានិយម ហើយនៅក្នុងរដ្ឋធម្មនុញ្ញបានចែង ច្បាស់ទៀតមិនឲ្យប៉ះពាល់ដល់ព្រះចេស្តាព្រះនាមរបស់ព្រះករុណា។
ខ្ញុំបានស្តាប់ដោយយកចិត្តទុកដាក់យើងកំពុងប្រជុំគ្នាថ្នាក់ដឹកនាំនឹងរៀបចំពាក្យបណ្តឹងមួយហើយ យើងក៏បានទាក់ទងទៅខាងមេធាវីដើម្បី ប្តឹងលោកតា លឺ ឡាយស្រេង ដែលបាន ប្រមាថព្រះចេស្តាព្រះករុណានិងប្រមាថ សម្តេចក្រុមព្រះ ដូច្នេះយើងនឹងមានវិធាន ការភ្លាមៗ» ។
