កំពង់ឆ្នាំង៖ ប្រជាពលរដ្ឋក្នុងខេត្តកំពង់ឆ្នាំងបានសម្តែងនូវការខកចិត្តយ៉ាងខ្លាំង ចំពោះចំណាត់ការរបស់គ្របសមត្ថកិច្ចពាក់ព័ន្ធទៅលើឈ្មោះណុង ណាក់ ដែលឃើញនៅតែបន្តសកម្មភាពកាប់បំផ្លាញឈើយ៉ាងគគ្លើនបន្ទាប់ពីមានភាពស្ងប់ស្ងាត់មួយរយៈ។
ឈ្មោះ ណុង ណាក់បានធ្វើសកម្មភាពក្តៅគគុកឡើងវិញក្នុងការដឹកជញ្ជូនអុសតាមរថយន្តយីឌុបខ្នាត យក្សយ៉ាងកក្រើកក្នុងទឹកដីតំបន់ក្តុល និងតំបន់បំណក់។ ជាក់ស្តែងកាលពីយប់ថ្ងៃទី១៨ ខែតុលា ឆ្នាំ២០១៧ ក្បួនរថយន្តដឹកអុសរបស់ឈ្មោះ ណុង ណាក់ បានចេញប្រដេញគ្នាដូចដង្ហែរអង្គកឋិនទានយ៉ាងរំភើយដោយ គ្មានការរំខានពីសមត្ថកិច្ចពាក់ព័ន្ធឡើយ ដឹកចេញពីបំណក់ ឆ្ពោះទៅតាមផ្លូវអមលាំង ។
ប្រជាពលរដ្ឋដែលតាមដានរឿងលោក ណុង ណាក់ នេះបានលើកឡើងថាមានរឿងអ្វីដែលឈ្មោះ ណុង ណាក់ ត្រូវខ្លាចរអារ ព្រោះរថយន្តខ្នាតយក្សដែលឈ្មោះណុង ណាក់ ដឹកអុសត្រូវសមត្ថកិច្ចចាប់នាពេលកន្លងទៅនោះ ត្រូវបានដោះលែងអស់ហើយ បើចាប់ក៍ចាប់ទៅរត់ការដោះលែងក៍គ្មានបញ្ហាព្រោះត្រូវរ៉ូវគ្នាអស់ហើយ ។
សូមរម្លឹកថា បើយោងតាមប្រភពពីប្រជាពលរដ្ឋបានបង្ហើបថា ឈ្មោះ ណុង ណាក់ បានដើរតួជាបងធំកាប់បំផ្លាញឈើយកធ្វើឧសប្រចាំតំបន់ក្តុល ក្នុងស្រុកទឹកផុស ខេត្តកំពង់ឆ្នាំង។មិនត្រឹមតែប៉ុណ្ណោះ បើមានរថយន្តណាដឹកឈើឆ្លងកាត់ត្រូវបង់លុយឲ្យឈ្មោះ ណុង ណាក់ ជាកំហឹត បើមិនដូច្នេះទេលោក ណុង ណាក់ មិនឲ្យឆ្លងកាត់ទឹកដីរបស់ខ្លួនបានឡើយ ។
ប្រភពដដែលបានបន្ថែមថាមន្ត្រីជំនាញ និងសមត្ថកិច្ចបានត្រូវរ៉ូវគ្នាទទួលផលប្រយោជន៍ពីឈ្មោះ ណុង ណាក់ ទើបឈ្មោះនេះហ៊ានបំពានច្បាប់ និងធ្វើសកម្មភាពយ៉ាងគឃ្លើនដោយបើករថយន្តប្រដេញតាមគាបយកលុយពីប្រជាពលរដ្ឋដឹកឈើបន្តិចបន្តួច ។
លោក ឈួរ ច័ន្ទឌឿន អភិបាលខេត្តកំពង់ឆ្នាំង ត្រូវបានប្រជាពលរដ្ឋ រិះគន់ថា មិនទាន់មានចំណាត់ការផ្លូវច្បាប់ណាចំពោះសកម្មភាពរបស់ ណុង ណាក់ ដែលដើរតួជាបងធំ ក្នុង ការកាប់ដឹកអុសដោយរថយន្តខ្នាតធំរបស់ខ្លួន បំផ្លាញផ្លូវថ្នល់ ផ្លូវជាតិ ដែលជាសម្បត្តិសាធារណៈរបស់រដ្ឋនៅឡើយទេ ។