ខេត្តបាត់ដំបង ៖ ក្នុងសារលិខិត សម្តេចអគ្គមហាសេនា បតីតេជោ ហ៊ុន សែន នាយកថ្មីមន្ត្រីនៃ ព្រះរាជាណចក្រកម្ពុជា ថ្លែងក្នុងឪកាស បើកបវេសនកាល ឆ្នាំសិក្សា២០១៥-២០១៦ ដែល អានដោយឯកឧត្តម ច័ន្ទ សុផល អភិបាលនៃគណៈអភិបាលខេត្ត ក្នុងពិធីបើកបវេសនកាល ឆ្នាំ២០១៥-២០១៦ នៅវិទ្យាល័យព្រះមុនីវង្ស កាលពីថ្ងៃទី០១ ខែវិឆ្ឆិកា បានបញ្ជាក់ថា ថ្ងៃទី០១ ខែវិឆ្ឆិកា ឆ្នាំ២០១៥ នេះ ជាថ្ងៃដែលមានអត្ថន័យ យ៉ាងជ្រាលជ្រៅបំផុតសម្រាប់វិស័យអប់រំ សិក្សានៃព្រះរាជាណាចក្រកម្ពុជា ពីព្រោះថ្ងៃនេះជាថ្ងៃបើកបវេសនកាលឆ្នាំសិក្សា២០១៥-២០១៦ ដែលជាការបើកទំព័រឆ្នាំសិក្សាថ្មី ផ្តល់ឪកាសសម្រាប់ សិស្សានុសិស្ស និស្សិត ដែលជា កុលបុត្រកុលធីតា របស់យើងបានបន្តការសិក្សារៀនសូត្រ ទៅថ្នាក់ខ្ពស់បន្តទៀត និងជាថ្ងៃ ផ្តើមជីវិតសិក្សាដំបូង របស់កុមារដែលទើបដល់អាយុត្រូវចូលសាលារៀន។
ទិវាដ៏មានសារៈសំខាន់នេះ ត្រូវបានប្រារព្ធឡើងជារៀងរាល់ឆ្នាំ ក្នុងបុព្វហេតុលើក កំពស់វប្បធម៌ស្រលាញ់ការសិក្សា រំលឹកដាស់តឿនកុលបុត្រកុលធីតាខ្មែរឲ្យបានយល់ថា ចំណេះវិជ្ជាគឺជាទ្រព្យ ដ៏មានតម្លៃសម្រាប់ជីវិតផ្ទាល់ខ្លួន និងជួយរំលឹកតម្កើង កិត្យានុភាព ភាព ថ្លៃថ្នូររបស់មនុស្ស និងការរស់នៅប្រកបដោយសុខដុមរមនា។
ជាការពិតការសិក្សារៀនសូត្រ ត្រូវតែអនុវត្តជានិច្ច ពេញមួយជីវិតសម្រាប់បុគ្គលម្នាក់ៗ ហើយការងារអប់រំជាការមួយ តម្រូវឲ្យមានការបន្ត លើកកម្ពស់ និងអភិវឌ្ឍន៍គ្មានទីបញ្ចប់ ដើម្បីពង្រឹងសមត្ថភាពធនធានមនុស្ស ឲ្យប្រកបដោយគុណភាព ទេពកោសល្យផលិតភាព សក្តានុពល មានសីលធម៌ គុណធម៌ ដែលនិងរួមចំណែកសម្រាប់ការអភិវឌ្ឍន៍ សង្គម សេដ្ខកិច្ចជាតិ ឲ្យមានការរីកចំរើនប្រកបដោយវីរភាព។
ក្នុងស្មារតីនេះខ្ញុំព្រះករុណាខ្ញុំ សូមអំពាវនាវឲ្យជនរួមជាតិយើងទាំងអស់ ចូលនាំគ្នា យកកូនចៅមកចុះឈ្មោះចូលរៀន ក្នុងដើមបវេសនកាលឆ្នាំសិក្សាថ្មីនេះ ឲ្យបានគ្រប់គ្នា ក្នុងនោះ ដែលសូមឲ្យអាជ្ញាធរដែនដី គ្រប់លំដាប់ថ្នាក់ត្រូវជួយសម្របសម្រួល ជម្រុញលើក ទឹកចិត្តនិងផ្តល់លទ្ធភាពជូនដល់ពួកគេឲ្យបានចូលរៀន និងរៀនបានចប់កម្រិតសិក្សាមូលដ្ឋាន ឲ្យបាន៩ឆ្នាំយ៉ាងតិច។ ជួមួយនិងការខិតខំប្រឹងប្រែង និងប្តេជ្ញាចិត្តខ្ពស់បន្ថែមទៀត របស់យើងទាំងអស់គ្នាលើការអភិវឌ្ឍន៍វិស័យអប់រំនេះ ខ្ញុំព្រះករុណាខ្ញុំ មានសង្ឃឹមយ៉ាងមុខ មាំថា កម្ពុជា និងអាចសម្រេចបាន នូវសមិទ្ធិផលថ្មីៗច្រើនទៀតទាំងបរិមាណ និងគុណភាព ដែលជាមូលដ្ឋានគ្រឹះដ៏រឹងមាំ ឆ្លើយតបនិងចក្ខុវិស័យ រយៈពេលវែងរបស់ខ្លួន ពិសេសសម្រច បាននូវគោដៅរបស់យើង ដែលយើងបានប្តេជ្ញាចិត្តថា មិនទុកឲ្យកូនចៅយើងណាម្នាក់ស្ថិត នៅក្រៅ ឬមិនបានទទួលសេវាអប់រំឡើយ ៕