ភ្នំពេញ ៖ មេដឹកនាំយោធាជើងអាកាសជើងគោក ជើងទឹក និងទាហ៊ានតំបន់ បានប្រកាសជាបន្តបន្ទាប់គាំទ្រការពារសម្តេចអគ្គមហាសេនាតេជោ ហ៊ុន សែន នាយករដ្ឋមន្ត្រីនិងប្រឆាំងថ្កោលទោសលោក សម រង្ស៊ី ដែលអំពាវនាវឲ្យកងកម្លាំងប្រដាប់អាវុធបង្វែរចុងកាណុងប្រឆាំងទម្លាក់ ។
ការប្រកាសគាំទ្រជាបន្តបន្ទាប់បានកើតឡើងក្រោយពេលដែល សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានៅក្នុងពិធី ជួបសំណេះសំណាលជាមួយកម្មករ នៅតាមបណ្តោយផ្លូវជាតិលេខ៤ នាព្រឹកថ្ងៃទី១៨ ខែវិច្ឆិកា ឆ្នាំ២០១៧នេះ បានឲ្យដឹងថា នាថ្មីៗនេះមានការធ្លាយចេញនូវឃ្លីបវិដេអូថ្មីមួយទៀត ដែលបង្ហាញថា លោក សម រង្ស៊ី កាលពីឆ្នាំ២០១១ បានអំពាវនាវឱ្យមានការបះបោរប្រឆាំងនឹងរដ្ឋាភិបាលកម្ពុជា ហើយអំពាវនាវឱ្យកងកម្លាំងប្រដាប់អាវុធ បង្វែរកាណុងមកកាន់រដ្ឋាភិបាលកម្ពុជា ដែលការអំពាវនាវនេះ បានផ្សារភ្ជាប់ទៅនឹងការ លើកឡើង របស់លោក កឹម សុខា នៅទីក្រុងណូវែល រដ្ឋម៉ាសាឈូសេត សហរដ្ឋអាមេរិក។
ទាក់ទងបញ្ហាដែលកើតតាំងពីឆ្នាំ២០១១ទើបយកមកនិយាយនេះសម្តេចតេជោ ហ៊ុន សែន បានលើកឡើងយ៉ាងដូច្នេះថា៖ «មួយទៀតអំពីការអំពាវនាវឱ្យកងទ័ព និងនគរបាល កម្លាំងប្រដាប់អាវុធ ចេញមក ដើម្បីនឹងបង្វែរ កាណុងចូល។ នេះគឺនិយាយតាំងពីថ្ងៃ៤ ខែមិថុនា ឆ្នាំ២០១១ ប៉ុន្តែវាផ្សារភ្ជាប់គ្នា ជាមួយនឹង ការនិយាយនៅទីក្រុងណូវែល រដ្ឋម៉ាសាឈូសេត សហរដ្ឋអាមេរិក គេបាននិយាយថា របបហ៊ុនសែន ជិតដួលរលំហើយ ការបះបោរ យើងត្រូវការរៀបចំការណែនាំ ត្រូវការការផ្គត់ផ្គង់ឧបត្ថម្ភ ខ្នងបង្អែក ដើម្បីឱ្យការបះបោរផ្ទុះឡើង និងកងកម្លាំងប្រដាប់អាវុធ បែរចុងកាណុង ផ្តួលរំលំរបបផ្តាច់ការហ៊ុនសែន»។
សម្តេចតេជោ ហ៊ុន សែន បានពន្យល់ថា ការចាប់ខ្លួនលោក កឹម សុខ គឺហាក់ដូចជាការបន្លាយខ្សែវែង ដើម្បីស្ទូចត្រីធំ ហើយពេលនេះទង្វើរបស់ លោក កឹម សុខា គឺធ្វើជាប្រព័ន្ធ មិនមែនម្នាក់ឯងទេ។ សម្តេចបានបញ្ជាក់បែបនេះថា៖ «សួរថា ចុះនិយាយតាំងពីមុន ហេតុអ្វីទើបនឹងចាប់ពេលក្រោយ? បញ្ហាគឺនៅត្រង់ថា ស៊ីសង្វាក់គ្នាឬអត់? តែប៉ុណ្ណឹងទេ ដល់ពេលដែលវាស៊ីសង្វាក់គ្នាហើយ មិនមែនតែបុគ្គលម្នាក់ទេ វាជាបក្សទាំងមូលដែលចាំបាច់ ត្រូវតែរំលាយ ដោយតុលាការ ក៏ប៉ុន្តែនេះជាសមត្ថកិច្ចរបស់តុលាការ ដែលនឹងឈានទៅដល់ នៅពេលខាងមុខ»៕
