ភ្នំពេញ ៖ ឯកឧត្ដម នាយឧត្តមសេនីយ៍ នេត សាវឿន អគ្គស្នង ការ នគរបាលជាតិបានជំរុញឲ្យសមត្ថកិច្ច ដាក់ពាក្យបណ្តឹង ប្តឹង ចោរឆក់តាមផ្លូវ សាធារណៈ ពីបទប៉ុនប៉ង មនុស្សឃាត មួយកម្រិតទៀត ខណៈការ អនុវត្តកន្លងទៅមានទោសតិចតួច ដែលជាកត្តាធ្វើឲ្យជនល្មើសបានចិត្ត និងធ្វើសកម្មភាព បែបនេះ ដដែលជាដដែលនោះ ។
ការលើកឡើងរបស់អគ្គស្នងការនគរបាលនេះ គឺបានធ្វើឡើង នៅក្នុងកិច្ចប្រជុំផ្សព្វផ្សាយអំពីការវិវត្តន៍ នៃសភាព បទល្មើសថ្មីៗ ដោយមានការចូលរួម ពីស្នងការគ្រប់ ខេត្ដ រាជធានី និង នាយកដ្ឋានពាក់ព័ន្ធទាំងអស់ កាលពីថ្ងៃទី ១៨ ខែតុលា ឆ្នាំ២០១៧ នៅអគ្គស្នងការដ្ឋាននគរបាលជាតិ ។
ឯកឧត្ដមនាយឧត្តមសេនីយ៏ គៀតចាន់ថា រិទ្ធ អគ្គស្នងការរងនគរបាលជាតិ បានបញ្ជាក់ថា៖ ភាគីពាក់ព័ន្ធ ចូលរួម ទាំងអស់ឲ្យមានការប្រុងប្រយ័ត្នបន្ថែមទៀត ទាក់ទង នឹងករណីឆក់ ខណៈ នាពេលបច្ចុប្បន្ននេះករណីឆក់នេះបានកើតឡើងជាញឹកញាប់ហើយករណីខ្លះ បានធ្វើឲ្យជន រងគ្រោះមានគ្រោះថ្នាក់ ដល់ជីវិតក៏មាន ដែរនោះ ។
តែយ៉ាងណាក្តីនៅក្នុងកិច្ចប្រជុំនោះនាយឧត្តមសេនីយ៍ បានជំរុញឲ្យមានការប្តឹង ដល់ជនល្មើសមួយកម្រិតទៀត គឺពីទោសប៉ុនប៉ងមនុស្សឃាតដោយចេតនា ។
ឯកឧត្ដមនាយឧត្ដមសេនីយ៍ គៀត ចាន់ថា រិទ្ធ បានបន្ត ទៀតថា៖ គ្រប់រាជធានី ខេត្ត ទាំងអស់ត្រូវពង្រឹងសកម្មភាពរបស់ ខ្លួនបន្ថែមទៀតឲ្យ ដូចទៅហ្នឹងភ្លៀងរលឹម ដើម្បីធ្វើយ៉ាងណាឆ្លើយតប ទៅនឹងតម្រូវការរបស់បងប្អូនប្រជាពលរដ្ឋ និងខិតខំធ្វើយ៉ាងណា ទប់ស្កាត់ ឲ្យបានរាល់បទល្មើសផ្សេងៗ ទៀត ក្នុង គោលបំណង ផ្តល់ភាពកកក្តៅដល់ប្រជាពលរដ្ឋ នោះ ។
ឯកឧត្ដមនាយឧត្តមសេនីយ៍ នេត សាវឿន ក៏បានជំរុញឲ្យអង្គភាពទាំងអស់ត្រូវត្រៀមកម្លាំងឲ្យបានគ្រប់ពេល និងគ្រប់ គោលដៅ ក្នុងគោលបំណង ទប់ស្កាត់នូវសកម្មភាពណា ដែល ធវើឲ្យ ប៉ះពាល់ ដល់សន្តិសុខសង្គមនិងសន្តិភាព ជាដើមនោះ ។
ដោយឡែក សម្រាប់ បុណ្យអុំទូក បណ្តែតប្រទីពសំពះព្រះ ខែនាពេល ខាងមុខនេះ អគ្គស្នងការនគរបាលជាតិ ក៏បាន ត្រៀម កម្លាំងចំនួនជិត ៣ម៉ឺននាក់ដើម្បីការពារនិងរក្សាសន្តិសុខជូន ដល់ បងប្អូនប្រជាពលរដ្ឋ ក៏ដូចជាភ្ញៀវទេសចរជាតិនិងអន្តរ ជាតិ ផងដែរ ៕