ខេត្តបាត់ដំបង ៖ ឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង បានអញ្ជើញចូលរួម ជាគណអធិបតី ក្នុងពិធីបើកការប្រណាំងទូក បណ្តែតប្រទីប ខេត្តបាត់ដំបងកាលពី រសៀល ថ្ងៃទី ២៦ ខែតុលា នៅវេទិការមាត់ស្ទឹងសង្កែ។
ក្នុងនយោបាយ លោក សុខ គង់ អភិបាលរង ខេត្តបាត់ដំបង បានឲ្យដឹងថាថ្ងៃនេះ ជាព្រឹត្តិការមួយសម្រាប់ខេត្តបាត់ដំបង ដែលបានរៀបចំការប្រណាំងទុកក្នុង ថ្ងៃចេញពេញ ព្រះវស្សាជារៀងរាល់ឆ្នាំ។ ឆ្នាំនេះជាឆ្នាំលើកទី១៥ ដែលរដ្ឋបាលខេត្តឲ្យមានការប្រណាំងទូក ក្នុងគោលបំណង រំលឹកឡើងវិញពីវីរៈភាពអង់អាចក្លាហានរបស់កងទ័ពជើងទឹក និងបង្ហាញ ពីសាមគ្គីភាពមិត្តភាពរបស់អង្គភាពស្ថាប័ណ្ណនានា និងប្រជាពលរដ្ឋគ្រប់មជ្ឈដ្ឋាន ទូទៅក្នុង ខេត្តបាត់ដំបង កាន់តែមានស្មារតីផុលផុសឡើង រួមចំណែកលើកស្ទួយ រក្សានូវវប្បធម៌ ប្រពៃណីដូនតាខ្មែរយើង តាំងពីបរមកាលរៀងមក។ជាងនេះទៀត គឺជាការបង្កភាពសប្បាយ រីករាយជូនប្រជាពលរដ្ឋ ដែលបានសម្រាកពីការនឿយហត់ ក្នុងការកសាងជីវភាពរស់នៅ និងកិច្ចអភិវឌ្ឍន៍សង្គម។
ការរៀបចំប្រណាំងទូកឆ្នាំនេះ គណៈកម្មាការបច្ចេកទេស បានទទួលទូកចូលរួម ប្រណាំងមានចំនួន ២៤ទូក ក្នុងនោះទូកខ្លី ខ្នាតអន្តរជាតិបុរស មាន ៧ទូក នារី៣ទូក ទូកខ្លីប្រពៃណី៤ទូក ទូកវែងប្រពៃណី៦ទូក និងទូលបើកឆាក៤ទូក។ ហើយក្នុងឲកាសនេះ ក៏មានប្រតិភូមកពីខេត្តប៉ៃលិន កំពង់ និងខេត្តច័ន្ទបុរិ គ្រាត នៃព្រះរាជាណាចក្រថៃចូលរួម ផងដែរ។
ក្នុងប្រសាសន៍បើកការប្រកួតឯកឧត្តម ច័ន្ទ សុផល បានបញ្ជាក់ថាគណកម្មការរៀបចំ បុណ្យអុំទូកខេត្តបាត់ដំបង បានរៀបចំពិធីនេះ ចំថ្ងៃបុណ្យប្រពៃណីចេញព្រះវស្សាសំដៅផ្សា ភ្ជាប់ ទៅនិងប្រពៃណីរបស់ខេត្តបាត់ដំបង ដែលបានធ្វើជារៀងរាល់ឆ្នាំ ទៅតាមទំនៀមទំលាប់ នៃព្រះពុទ្ធសាសនា នាថ្ងៃពេញបូណ៌មី ហើយថ្ងៃនោះនៅតាមបណ្តាវត្តអារាម ប្រជាពលរដ្ឋ ដែលរស់នៅតាមដងស្ទឹងសង្កែ និងជិតស្រះត្រពាំង បឹងបួរ តែងតែធ្វើប្រទីបជ្វាលា តុបតែង លំអ ទៅដោយក្បូរក្បាច់រចនា ផ្កាភ្ញី ភ្លើងទៀន នំចំណី បណ្តែតទៅតាមទឹក ក្នុងគោលដៅ ជូនដំណើរដូនតាក៏ដូចជា ដឹងគុណ ដល់ព្រះគង្គា និងទឹកឲ្យបានគ្រប់គ្រាន់ ក្នុងរបរកសិកម្ម ទៅឆ្នាំក្រោយ។ ឯកឧត្តមបានបញ្ជាក់ថា ក្រោយពីបញ្ចប់ការប្រកួតនេះ គណកម្មការខេត្ត និង ធ្វើការការជ្រើសរើស ទូលដែលជាប់ចំណាត់ថ្នាក់យកទៅចូលរួមប្រណាំង នៅរាជធានីភ្នំពេញ ក្នុងព្រះរាជពិធីបុណ្យអុំទូកអកអំបុកសំពះព្រះខែនាពេលខាងមុខនេះ ៕