បន្ទាប់ពីមានប្រព័ន្ធផ្សព្វផ្សាយជាច្រើនបានផ្សាយជាបន្តបន្ទាប់ នៅសាច់រឿងមួយចំនួនពាក់ព័ន្ធជាមួយ និងលោក សាំ ពិសិដ្ឋ នាយកមន្ទីរសាធារណៈការ និងដឹកជញ្ជូនរាជធានីភ្នំពេញ ភ្នាក់ងារយើងទទួលបាននូវសាច់រឿងជាច្រើនទៀត ដែល ជាប់ទាក់ទងជាមួយលោក សាំ ពិសិដ្ឋ នេះ ។
តាមប្រភពពីមន្ត្រីជាច្រើនរូបដែលបំរើការងារនៅសាលាក្រុងក៏ដូចជា នៅមន្ទីរសាធារណៈការ និងដឹកជញ្ជូន បាននិយាយប្រាប់ភ្នាក់ងារយើងថា ក្នុងរយៈពេលថ្មីនេះៗ នៅទូទាំងសាលារាជធានីភ្នំពេញ ស្ទើរតែទាំងមូល ដែលទទួលរង នូវការជំនន់លេចដោយទឹកភ្លៀង ឬលេចដោយសារទឹកនៅតាមប្រព័ន្ធលូមិនហូរ ទាំងនេះគឺដោយសារមានកំហុសឆ្គងពីមន្ត្រី ដែលទទួលបន្ទុកកាន់ការងារលូទឹកនៃអង្គភាពលូទឹកបូមទឹករបស់មន្ទីរសាធារណៈការ និងដឹកជញ្ជូនរាជធានីភ្នំពេញ ត្រួតពិនិត្យមិនបានត្រឹមត្រូវ ឬអាចពាក់ព័ន្ធជាមួយនិងអំពើពុករលួយ ?។
ប្រភពដដែលបានបន្តថា រឿងអីដែលមិនពុករលួយនោះ បើសូម្បីតែលោក ពិសិដ្ឋ ខ្លួនឯងពេលឡើងមកកាន់តំណែង ជាប្រធានមន្ទីរសាធារណការ ក៏អាចពាក់ព័ន្ធជាមួយ និងអំពើពុករលួយដែរ ? បើមិនអញ្ចឹងមិនមែនក្របខណ្ឌនៅក្រសួង មហាផ្ទៃ ហើយបុណ្យស័ក្តិស្មើប្រធានការិយាល័យ បែរជាឡើងផ្លោះរហូតដល់ទៅប្រធានមន្ទីរ គួរតែឡើងត្រឹមអនុប្រធាន ដើម្បីរៀនសូត្រយកបទពិសោធន៍សិន ទើបសមលក្ខន្តិកៈមន្ត្រីរាជការនៃព្រះរាជាណាចក្រកម្ពុជា ។
ប្រភពដដែលបានបញ្ជាក់បន្ថែមថា ចំពោះបញ្ហាដែលទឹកលេចក្នុងទីក្រុងភ្នំពេញ មួយរយៈពេលនេះ គឺដោយសារលោក សាំ ពិសិដ្ឋ ខ្វះខាតចំណេះដឹងផ្នែកខាងប្រព័ន្ធលូបង្ហូរទឹកនេះ ហើយក៏មិនដែលបានដឹងថា ប្រព័ន្ធប្រឡាយមេ ស្ថិតនៅសង្កាត់ណា-ខណ្ឌណាខ្លះដែរ ។ ម្យ៉ាងវិញទៀត ពេលដែលក្រុមហ៊ុនដំណើរការដាក់ប្រព័ន្ធលូបង្ហូរទឹក គឺលោក ពិសិដ្ឋ មិនដែលដាក់មន្ត្រីជំនាញណាមួយ ដើម្បីឱ្យទទួលត្រួតពិនិត្យ ឬទទួលខុសត្រូវនៅតាមបណ្តោយផ្លូវនោះសោះហើយ ។ ត្រង់នេះហើយដែលធ្វើឱ្យទីក្រុងភ្នំពេញទទួលរងនូវការលេចទឹកខ្លាំងយ៉ាងនេះ ។
តាមប្រភពពីក្រុមអ្នករកស៊ីសង់ផ្ទះល្វែងលក់បានលួចបង្ហើបប្រាប់អ្នកយកព័ត៌មានយើងក្នុងលក្ខខណ្ឌមិនបញ្ចោញឈ្មោះថា មិនមែនពួកខ្ញុំមិនចង់ឱ្យផ្ទះ ដែលពួកខ្ញុំលក់ទៅឱ្យអតិថិជនទិញនៅនោះលេចទឹកនោះទេ ក៏ប៉ុន្តែបើខ្ញុំ(ប្រភពខាងលើ)ចំ ណាយលុយសាងសង់ប្រព័ន្ធលូបង្ហូរទឹកឱ្យត្រូវតាមស្តង់ដា ដែលបានស្នើសុំច្បាប់សាងសង់ គឺត្រូវលក់ខាតហើយ ព្រោះខាង លោកប្រធានមន្ទីរសាធារណការ គឺតម្រូវឱ្យបង់លុយទៅតាមទំហំលូ និងម៉ែត្រការ៉េ ហើយបើយើងចង់សង់ប្រឡាយឱ្យត្រូវ តាមស្តង់ដារ គឺទាល់តែចំណាយថ្លៃទឹកប៊ិចលោក សាំ ពិសិដ្ឋ ចូលម៉ឺនដុល្លារឯណោះ ទេបិគាត់ស៊ីញ៉េ(ចុះហត្ថលេខា)លើសំណុំ ឯកសារបញ្ជូនមកសាលាក្រុង ហើយបើពេលគាត់ទទួលបានការរាយការណ៍ពីកូនចៅគាត់ថា សំណង់កន្លែងនេះ ឬកន្លែងនោះ សង់ប្រព័ន្ធលូបង្ហូរទឹកមិនត្រឹមត្រូវ ឬមិនគ្រប់ខ្នាត គាត់ធ្វើ់លិខិតអញ្ជើញម្ចាស់សំណង់ទៅជួបហើយ និយាយគោះយកតែម្តង បើមិនព្រមតាមគាត់បញ្ជាឱ្យគេទៅគាស់កាយវិញ ។
តាមប្រភពពីមន្ត្រីនៅសាលារាជធានីភ្នំពេញ បានឱ្យដឹងថា ចំពោះបញ្ហាទឹកលេចក្នុងរាជធានីភ្នំពេញនេះ ដោយសារលោក សាំ ពិសិដ្ឋ ជាប្រធានមន្ទីរមិនមានចំណេះដឹងផ្នែកប្រព័ន្ធប្រឡាយ និងលូទឹក និងដោយសារលោក ពិសិដ្ឋ មិនបែងចែកការងារឱ្យគេជួយធ្វើ គឺគាត់ក្តោបតែម្នាក់ឯង បានជាអញ្ចឹង ។ បើយើងនឹកចាំកាលពីជំនាន់ ឯកឧត្តម ជា សុផារ៉ា និងជំនាន់ឯកឧត្តម កែប ជុតិមា ធ្វើជាអភិបាលរាជធានីភ្នំពេញ គឺមិនដែលជួបប្រទះបញ្ហាទឹកលិចខ្លាំងយ៉ាងនេះទេ ព្រោះថា កាលនោះ គឺអភិបាលក្រុងបែងចែកភារកិច្ចឱ្យមន្ត្រីសាធារណការទទួលខុសត្រូវដូចជា លោក សំ សាមុត ទទួលខុសត្រូវផ្នែក សួនច្បារ និងរុក្ខជាតិ លោក ភួង ចំរើន ទទួលខុសត្រូវផ្នែកអគ្គីសនីបំភ្លឺសាធារណៈ លោក ហេង ងួន ទទួលខុសត្រូវផ្នែកផ្លូវ ថ្នល់ លោក នៅ សារឿន ទទួលខុសត្រូវផ្នែកលូបង្ហូរទឹក លោក ហេង ឡៃអ៊ន ទទួលខុសត្រូវផ្នែកចុះបញ្ជីយានយន្ត លោក តូ សុចន្ធី ទទួលខុសត្រូវផ្នែកចុះបញ្ជីទោចក្រយានយន្ត ដែលគ្រប់ផ្នែកទាំងអស់នោះ ពេលដែលជួបប្រទះបញ្ហា គឺចៅហ្វាយក្រុង ស្តីបន្ទោសចំៗតែម្តង ប្រធានមន្ទីរ គឺរងចាំតែពិនិត្យ និងជួយសម្របសម្រួលការងារប៉ុណ្ណោះ ។ មិនដូចជំនាន់លោក សាំ ពិសិដ្ឋ នោះទេ ការងារទាំងអស់ បើលោក ពិសិដ្ឋ មិនបញ្ជាទេ អ្នកណាហ៊ានចេញមុខធ្វើ ឬពន្យល់អ្វី់មួយទៅឯណា ម្នាក់ក៏អត់បាន ដែរ រួមទាំងការដកកញ្ចប់ថវិកា បើធម្មតាធ្វើការងារបាន ៥០ភាគរយ គឺយើងបើកលុយថ្លៃឈ្នួល ៣០ភាគរយ តែលោក ពិសិដ អត់ទេ ការងារមិនទាន់បានធ្វើផង បើកលុយយកអស់បាត់ទៅហើយ ។
ជាក់ស្តែងដូចជាការសាងសង់សួនច្បារមុខក្រសួងការពារជាតិ និងសួនច្បារ ខាងលិចវត្តភ្នំ ដែលជាគម្រោងជំនាន់ ឯកឧត្តម ប៉ា សុជាតិវង្ស មិនទាន់ធ្វើហើយនៅឡើយទេ បើកលុយយកអស់បាត់ហើយ ទាំងនេះគេយកលេសថាជារឿងរបស់ ក្រុមហ៊ុនជំនាញគ្រាន់តែបានពិនិត្យតាមដានប៉ុណ្ណោះ ។ ទាំងនេះគ្រាន់តែជាលេសដោះសារប៉ុណ្ណោះ បើមិនមានជំនាញស៊ីញ៉េ (ចុះហត្ថលេខា)បញ្ជាក់ថា ការងាររួចរាល់ទេសាលារាជធានីម៉េច នឹងបើកលុយឱ្យ។ ហើយបើនិយាយពីអង្គភាព ឬស្ថាប័ន របស់រដ្ឋវិញមុននិងចូលបំរើការងារ គឺគេត្រូវធ្វើការធានានៅចំពោះមុខថ្នាក់ដឹកនាំក៏ដូចជា មន្ត្រីទាំងអស់ថា រក្សាភាពសាមគ្គី ភាពផ្ទៃក្នុងមិនមែនដូចជា លោក ពិសិដ្ឋ មកធ្វើការងារតែម្នាក់ឯងអញ្ចឹងនោះ ។ អាងអីរាយការណ៍ជូនថ្នាក់លើទំលាក់កំហុស ឱ្យកូនចៅក្រោមឱវាទ សំញ៉ែងរិទ្ធិអំណាចថា ខ្លួនខ្លាំងមានខ្សែធំមានចំណេះដឹងគ្រប់ភ្នែកចង់ឱ្យធ្វើអ្វីៗមិនចាំបាច់ស្តាប់ យោបល់កូនចៅធ្លាប់កាន់ជំនាញនោះទេ ៕ (នៅមានត)