ភ្នំពេញ ៖ កម្មវិធីប្រឡងចម្រៀងលំដាប់ថ្នាក់ពិភពលោក The Voice Kids Cambodia រដូវកាលទី១បានរកឃើញម្ចាស់ជ័យលាភីហើយកាលពីរាត្រីថ្ងៃទី១៤តុលាឆ្នាំ២០១៧ក្នកងវគ្គបញ្ចប់ក្រោងអធិបតីភាពលោកខៀវកាញារិទ្ធរដ្ឋមន្ត្រីក្រសួងពតិមានគឺ បានទៅលើកុមារា ពេជ្រ ថៃ មានអាយុ ១២ ឆ្នាំ រៀនថ្នាក់ទី ៧ជាសិស្ស នៃអនុវិទ្យាល័យម្រះព្រៅ ខេត្តបាត់ដំបងមកពី ខេត្តបាត់ដំបង ។
ក្រៅពីកាន់ពានក្នុងកម្មវិធី The Voice Kids Cambodia រដូវកាលទី១ សរុបជាទឹកប្រាក់ ១០០ លានរៀលហើយនោះ ពេជ្រ ថៃ ដែលជាកូនក្រុមកំពូលតារាចម្រៀងលោក ព្រាប សុវត្ថិ បានទទួលអាហារូបករណ៍សិក្សានៅសាលាអន្តរជាតិ និងដំណើរកម្សាន្ត នៅប្រទេសជប៉ុន និងការឧបត្ថម្ភផ្សេងៗទៀត។
ក្នុងកម្មវិធីប្រឡងជម្រុះវគ្គផ្ដាច់ព្រ័ត្រ The Voice Kids Cambodia រដូវកាលទី១ មានបេក្ខជន និងបេក្ខនារី(ជាកុមារ)ចំនួន៦ រូបរួមមាន៖ កុមារី ឃុយ ម៉ីហៀង, កុមារា ពេជ្រ ថៃ, កុមារា ឡុង លីគ័ង្គ, កុមារី ណូ ឈូស៊ីវហេង, កុមារី រ៉ន ចាន់ឌីន, កុមារី សុខ សុជាតា។
ក្រោយបេក្ខភាពវ័យ១២ឆ្នាំ ពេជ្រ ថៃ ជាប់ជាម្ចាស់ជយលាភីលេខ១ The Voice Kids Cambodia ក៏មានទាំងអ្នកពេញចិត្ត និងមិនពេញចិត្តជាច្រើន។ តែ ខាងស្ថានីយ៍ទូរទស្សន៍ហង្សមាសវិញ គេមិនសូវជាខ្វល់ចំពោះការិះគន់នោះទេព្រោះគេយល់ថា៖ មានអ្នករិះគន់កាន់តែច្រើន គឺខាងស្ថានីយ៍យល់ថា កម្មវិធីល្អ មានអ្នកគាំទ្រ ផ្ទុះការចាប់អារម្មណ៍ ព្រោះស្ថានីយ៍ ឬអ្នករៀបចំកម្មវិធី មិនមែនជាអ្នកសម្រេច គឺសម្រេចលើអ្នកផ្ញើសារបោះឆ្នោតតើ។
អ៊ីចឹង មានតែបន្ទោសលើអ្នកផ្ញើសាទៅវិញ ព្រោះអ្វីៗពឹងលើអ្នកគាំទ្រផ្ញើសារ។ ម្យ៉ាងទៀត ពិធីករពិធីការិនី ក៏បានប្រកាសហើយថា លោកអ្នកផ្ញើសារគាំទ្រត្រូវគិតលើសំឡេងជាសំខាន់ ជៀសវាងផ្ញើសារលើការអាណិត ឬហេតុផលអ្វីផ្សេងនោះ គឺអាចបំផ្លាញអ្នកមានទេពកោសល្យ និងសំឡេងល្អពិតប្រាកដ។
បើក្រឡេកមើលសមត្ថភាពគ្រូបង្ខឹកវិញ គឺជារៀមច្បងសិល្បៈ លោក ព្រាប សុវត្ថិ គឺជាអ្នកជោកជាំខ្លាំង មានស្នាដៃក្នុងសិល្បៈ មុនកញ្ញា ឱក សុគន្ធកញ្ញា និងកញ្ញា សុគន្ធ និសា ដោយមិនអាចបាក់មុខឲ្យកូនក្រុមផ្សេងលើកពានបាននោះទេ។ ចំពោះ លោក ព្រាប សុវត្ថិ ផ្ទាល់ក៏អាចដឹងហើយថា បេក្ខភាពណាមានសំឡេងល្អ ទើបជានិច្ចកាលឲ្យតែ ពេជ្រ ថៃ ជាប់ផ្ញើសារ នោះលោក Save យកកុមារា ឡុង លីគ័ង្គ រហូត ព្រោះដឹងថា លីគ័ង្គ មានសំឡេងល្អ។
លោក ព្រាប សុវត្ថិ ក៏បានថែមទាំងនិយាយ នៅយប់ផ្តាច់ព្រ័ត្រនោះថា លោកជាជម្រើសទី២ សម្រាប់ Save យកបេក្ខជនល្អ បន្ទាប់ពីជាប់អ្នកបោះឆ្នោតផ្ញើសារ។
ប្អូនប្រុស ពេជ្រ ថៃ មានអាយុ១២ឆ្នាំ នៅឆ្នាំនេះ រស់នៅភូមិជ្រៃ១ ឃុំជ្រៃ ស្រុកមោងឫស្សី ខេត្តបាត់ដំបង។ ពេជ្រ ថៃ គឺជាកូនទីពីរ ក្នុងចំណោមបងប្អូនពីរនាក់ ដែលបងស្រីបង្កើតរបស់ប្អូន បច្ចុប្បន្នមានស្វាមីហើយ ព្រមទាំងមានកូនស្រីម្នាក់ ជាចំណងដៃថែមទៀតផង។ប្អូនប្រុស ពេជ្រ ថៃ មានឪពុកឈ្មោះ ពេជ្រ សារ៉ាត់ និងម្តាយឈ្មោះ សាំ គង់ បច្ចុប្បន្ន រស់នៅនិងធ្វើការនៅប្រទេសថៃ។ សព្វថ្ងៃនេះ ប្អូនប្រុស ពេជ្រ ថៃ គឺកំពុងស្ថិតក្នុងវ័យសិក្សា រៀននៅថ្នាក់ទី៧ នៃអនុវិទ្យាល័យ ម្រះព្រៅ។
អ៊ុំស្រី ជូ ហុំ អាយុ៧៧ឆ្នាំ ត្រូវជាជីដូនរបស់ប្អូនប្រុស ពេជ្រ ថៃ ឬ ប្អូនប្រុស ហៅថា “ម៉ែចាស់” បានរៀបរាប់ថា ម្តាយឪពុករបស់ ពេជ្រ ថៃ បានចាកចេញពីស្រុកកំណើត ទៅធ្វើការនៅក្នុងប្រទេសថៃ អស់រយៈពេល២៥ឆ្នាំមកហើយ តាំងពី ពេជ្រ ថៃ មិនទាន់កើតម្ល៉េះ ដោយសារតែបញ្ហាជីវភាព ប៉ុន្តែរៀងរាល់៣ ឬ៤ ឆ្នាំម្ដង ទើបគេបានមកលេងផ្ទះម្តង ដែលធ្វើអោយពួកគេ សឹងតែមិនស្គាល់មុខគ្នា ដោយសារតែកូនស្រី និងកូនប្រុស ទាំងពីរនាក់ ត្រូវរស់នៅជាមួយពូ មីង រួមជាមួយនឹងរូបគាត់ផងដែរ។
អ៊ុំស្រីបានបន្តថា រាល់ថ្ងៃនេះមានជីវភាពមានការខ្វះមុខ ខ្វះក្រោយ ដោយសារតែគ្មានដីស្រែធ្វើនឹងគេ។ សព្វថ្ងៃនេះមានតែការងារមើលគោបង្វាស់ឲ្យគេ និងដាំដំណាំបន្តិចបន្ទួចនៅជុំវិញផ្ទះ។ ពេលខ្លះម្តាយមីងរបស់ ពេជ្រ ថៃ បានធ្វើនំ ដើម្បីអោយប្អូនប្រុស ពេជ្រ ថៃ ទូលដើរលក់ ក្រោយពីចេញពីសាលា។
ទោះបីជាមានការលំបាកបែបនេះក្តី ក៏ ពេជ្រ ថៃ បានខំប្រឹងសិក្សាណាស់ដែរ។ ពេជ្រ ថៃ ទៅ រៀន ដោយជិះកូនកង់ ជាមធ្យោបាយ ក្នុងការធ្វើដំណើរទៅសាលា ដែលមានចំងាយប្រមាណ ជាង៥គីឡូម៉ែត្រ ពីផ្ទះដោយខ្លួនឯង ទៅនិងមក។ ឯពូ មីង របស់ប្អូន ក៏មិនហ៊ានទៅធ្វើការនៅឯណាដែលឆ្ងាយពីផ្ទះដែរសព្វថ្ងៃនេះ ដោយសារតែជីដូន ម៉ែចាស់ កាន់តែមានវ័យចាស់ជរាណាស់ទៅហើយ។សូមជួយស៊ែរបន្តផងណា។
ដោយមាននិស្ស័យ និងទេពកោសល្យ ខាងវិស័យសិល្បៈ នៅពេលណាដែល ពេជ្រ ថៃ លក់នំមិនដាច់ គឺ ពេជ្រ ថៃ សុខចិត្តច្រៀងអោយគេស្តាប់ ដើម្បីអោយគេជួយទិញនំ យកលុយមកឲ្យមីង ដើម្បីទំនុបបំរុងជីវភាពគ្រួសារ។ ថ្ងៃមួយម្តាយមីងជីដូនមួយ បានប្រាប់ ពេជ្រ ថៃ ថា នៅក្នុងបាត់ដំបង មានការប្រលងចំរៀងកុមារ។ មិនបានគិតយូរ ពេជ្រ ថៃ ក៏សម្រេចចិត្តទៅដាក់ពាក្យប្រលង ដោយម្តាយមីងរូបនោះជាអ្នកនាំទៅ។
នៅទីបំផុត ពេជ្រ ថៃ ក៏បានប្រលងជាប់ នៅក្នុងវគ្គជ្រើសរើសដំបូងនោះ ហើយមិនបានប៉ុន្មានផង គឺប្រហែលជាមួយខែមុន នៅខាងភ្នំពេញបានទាក់ទង អោយ ពេជ្រ ថៃ ទៅបញ្ចេញទេពកោសល្យ។ ស្រាប់តែនៅពេលនោះ ជីដូន (ម៉ែចាស់) របស់ ពេជ្រ ថៃ បានបដិសេធមិនអោយ ឡើងទៅភ្នំពេញទេ ព្រោះ ម៉ែចាស់ ខ្លាច និងមិនសូវស្គាល់ភ្នំពេញច្បាស់។
ទោះបីជាយ៉ាងណាក៏ ពេជ្រ ថៃ នៅតែមានៈ ទាមទារឡើងទៅភ្នំពេញ ឲ្យទាល់តែបាន ដោយមានម្តាយមីងរបស់គេ ជាអ្នកជូនមកភ្នំពេញ។ ដោយសារតែភាពមានៈនេះហើយ ទើបមហាជនទាំងអស់ ជាពិសេសគណៈកម្មការ បានមើលឃើញនូវសមត្ថភាព និងភាពក្លាហាន ក្នុងការសម្ដែងរបស់ ពេជ្រ ថៃ ថែមទាំង មានការពេញចិត្តយ៉ាងខ្លាំង ទៅលើភាពដ៏ក្រម៉ិចក្រម៉ើម ចេះនិយាយលេងសើច និងមានសំលេងដ៏ក្រអួន ធ្វើអោយទស្សនិកជន មានការពេញចិត្តយ៉ាងខ្លាំងផងដែរ។
ទាក់ទងនិងការ មានគណនីជាច្រើន នៅលើបណ្តាញសង្គម ត្រូវបានគេបង្កើតឡើង ដោយបានយកឈ្មោះ និងរូបភាពរបស់ប្អូនប្រុស ពេជ្រ ថៃ ដែលគណៈកម្មការ បានអោយរហ័សនាមថា « កវីតូច » មកបង្ហោះព្រោងព្រាត ក្នុងន័យទាក់ទាញកេងយកផលចំណេញ ពីសប្បុរសជនណា ដែលមានបំណងជួយជ្រោមជ្រែង ឬមានការឧបត្ថម្ភដល់ “កវីតូច” យើង។ ប្អូនប្រុស ពេជ្រ ថៃ បាននិយាយថា ប្អូនមិនទាន់មានអាខោនហ្វេសប៊ុកប្រើនឹងគេទេ។ ដូច្នេះការឃោសនាតាមរយៈអាខោនផ្សេងៗ គឺមិនមែនជារបស់ប្អូនឡើយ ទាំងនេះ គឺជាការលើកឡើងរបស់ប្អូនប្រុសផ្ទាល់ផង និងក្រុមគ្រួសារ ព្រមទាំងសាច់ញាតិផងដែរ៕