ភ្នំពេញ៖ នៅថ្ងៃទី១៦ តុលាខាងមុខនេះរដ្ឋបាលរាជធានីនឹងរៀបចំធ្វើពិធីទទួលយកស្ពានលីយ៉ុងផាត់ ពីក្រុមហ៊ុនLYP Group របស់លោកឧកញ៉ាលី យ៉ុងផាត់ មកគ្រប់គ្រងជាសម្បត្តិរាជធានីភ្នំពេញ ដើម្បីដាក់អោយប្រជាលរដ្ឋបានធ្វើដំណើរដោយមិនយក ប្រាក់រហូតតទៅ។
នេះបើតាមការបញ្ជាក់ឲ្យដឹងពីលោក ឃួង ស្រេង អភិបាលរាជធានីភ្នំពេញ ក្នុងកិច្ចសម្ភាសជាមួយអ្នកយកព័ត៌មាន កាលពីរសៀលថ្ងៃទី១១តុលា ក្រោយបញ្ចប់កម្មវិធីផ្សព្វផ្សាយសេចក្តីប្រកាសតំបន់វិនិច្ឆ័យប្រជាពលរដ្ឋស្ថិតក្នុងសហគមន៍វិមានទ្រង់ ស្ថិតក្នុងសង្កាត់ក្រាំងធ្នង់ ខណ្ឌសែន សុខជាមួយប្រ ជាពលរដ្ឋជាង៤០០ គ្រួសារ ។
លោក ឃួង ស្រេង បានបញ្ជាក់ថា៖ ស្ពានលីយ៉ុងផាត់ ដោយអនុវត្តតាមប្រសាសន៍ សម្តេចតេជោ ហ៊ុន សែន នាយករដ្ឋមន្ត្រី ស្ពាននេះនឹងត្រូវដាក់ឱ្យធ្វើដំណើរ ដោយមិនយកប្រាក់នៅថ្ងៃទី១៥ ម៉ោង០០ ខែតុលាឆ្នាំ២០១៧នេះតទៅ ហើយ នៅថ្ងៃ ទី១៦ រដ្ឋបាលរាជធានីនឹងរៀបចំពិធីទទួលយកស្ពាននេះមកគ្រប់គ្រងជាសម្បត្តិរាជធានីភ្នំពេញដើម្បីដាក់អោយប្រជាលរដ្ឋបានធ្វើដំណើរដោយមិនយកប្រាក់រហូតតទៅ។
លោកបន្តថា៖ នេះជាការគិតគូរ មួយរបស់រាជរដ្ឋាភិបាល ក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយសម្តេចតែងតែគិត គូរជានិច្ចពីសុខទុក្ខនិងការលំបាករបស់ប្រជាពលរដ្ឋ ។
លោកបន្តថា៖ ការផ្តល់ផ្លូវស្ពានអោយធ្វើដំណើរនេះជាការកាត់បន្ថយភាពក្រីក្រជូនប្រជាពលរដ្ឋ មានន័យថា មានផ្លូវមានស្ពានគឺមានក្តីសង្ឃឹម ។ ការសម្រេចរបស់ប្រមុខនៃរាជរដ្ឋាភិបាលនេះ គឺជាការគិតគូរ និងលើកកម្ពស់ជីវភាពរស់នៅប្រចាំថ្ងៃរបស់ប្រជាពលរដ្ឋទូទាំងប្រទេស ដូចជាការលុបចោលបង់ថ្លៃឆ្លងកាត់ផ្លូវជាតិលេខ៤ និងផ្លូវលេខ២០០៤ ឬផ្លូវម៉ៃដា កាលពីពេលកន្លងទៅផងដែរ។
សូមបញ្ជាក់ថា៖ កាលពីថ្ងៃទី០៥តុលា ជាការផ្ដល់កាដូដ៏ធំមួយជូនដល់ជនរួមជាតិទូទាំងប្រទេស សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បាន ប្រកាសទិញស្ពាន និងផ្លូវលីយ៉ុងផាត់ ព្រែកព្នៅ មកគ្រប់គ្រងវិញ ហើយអនុញ្ញាតឲ្យប្រជាពលរដ្ឋឆ្លងកាត់ដោយមិនបាច់បង់ថ្លៃ៕