បន្ទាយមានជ័យ ៖ ទោះបីជាក្រសួងមហាផ្ទៃបានចេញសារាចរណ៏ឲ្យបិទច្រករបៀងនានានៅតាមបន្ទាត់ព្រំដែនកម្ពុជាថៃក៏ដោយក៏គេនៅ តែឃើញថា អំពើរត់ពន្ធឬគេចពន្ធនៅតែមានសកម្មភាពហើយកាន់តែបានបង្ហាញឲ្យឃើញលើគោកៗថែមទៀត។
សេចក្តីរាយការណ៏មួយពីប្រជាពលរដ្ឋបានឲ្យដឹងថា៖ នៅច្រករបៀងចំការគរស្ថិតនៅក្នុងស្រុកស្វាយចេក ខេត្តបន្ទាយមានជ័យ គឺជាច្រករបៀងគ្រប់គ្រងដោយកងយោធាវរសេនាតូចថ្មើជើងលេខ៥០៣ ដែលមានលោកឧត្តមសេនីយ៏ត្រី ឃួន ជឿន ជាមេបញ្ជាការ ។វរៈ៥០៣នេះចំណុះឲ្យយោធភូមិភាគទី០៥ មាននាយឧត្តមសេនីយ៏ ប៊ុន សេង ជាមេបញ្ជាការ ។
ទាក់ទិននិងបញ្ហាច្រករបៀងខុសច្បាប់នេះដែរ កន្លងទៅគេបានឃើញសកម្មភាពដេញ ប្រផាប់ចាប់ប្រភីងក្រុមនាំម៉ូតូក្តៅ(ម៉ូតូផលចោរកម្មពីថៃ)នគរបាលក្រសួងមហាផ្ទៃ ដឹកនាំបង្ក្រាបដោយលោក ឧត្តមសេនីយ៏ទោ មាស សុធឿន ជាលទ្ធផលបានឲ្យឃើញថា ច្រករបៀងនៅស្រុកស្វាយចេក និងថ្មពួកផង ពិតជាជាប់ទាក់ទិននិងករណីទទួលផលចោរកម្មពីថៃយ៉ាងពិតប្រាកដ ពោលគឺសមត្ថកិច្ចបង្ក្រាបបានទាំងម៉ូតូ និងរថយន្តចង្កូតស្តាំផងទៀត ។
ទន្ទឹមនិងនេះមានប្រភពមួយដែលអ្នកសារព័ត៌មានយើងទទួលបានពីមន្ត្រីនគរបាលស្និទ្ធជាមួយលោក អាត់ ខែម ស្នងការនគរបាលខេត្តបន្ទាយមានជ័យបានបង្ហើបឲ្យដឹងថា៖ សព្វថ្ងៃនេះបុរសម្នាក់ត្រូវជាកូនប្រុសបង្កើតលោកស្នងការខេត្តបន្ទាយមានជ័យ ឈ្មោះ ខែម សោភណ័ គឺជាជើងខ្លាំងខាងរត់ពន្ធម៉ូតូសេរីទំនើប នាំចូលតាមច្រករបៀងខុសពីប្រទេសថៃមកកម្ពុជា។ មិនត្រឹមតែប៉ុណ្ណោះទេ ឈ្មោះខែម សោភណ័នេះក៏មានជំនាញខាងរកស៊ីរថយន្ត សេរីទំនើបៗ ចង្កូតស្តាំពីមកដែរ ។
បើយោងតាម មន្ត្រីគយម្នាក់នៅច្រកតំបន់បឹងត្រកួនបានឲ្យដឹងមកដែរ ថា ម៉ូតូសេរីទំនើបៗ គឺកូនប្រុសស្នងការខេត្តបន្ទាយមានជ័យជាអ្នកនាំចូល។តែ មន្ត្រីគយដដែលបន្តថា ខាងលោកមិនពិបាកទេ ឲ្យតែគេបានប្រកាស់ពន្ធរួចហើយ គឺមិនមានអ្វីត្រូវចោទទេ ។ ជុំវិញករណីខាងលើនេះ កន្លងទៅ មានទូរទស្សន៏ក្នុងស្រុកមួយបានផ្សាយលើករណី រថយន្តពាក់ស្លាកលេខ នប«នគរបាល) ភាគច្រើននៅក្នុងស្នងការខេត្តបន្ទាយមានជ័យ ហើយថា រថយន្តខ្លះពាក់ស្លាកគ្រាន់តែជាលេសដើម្បីបិទបាំងទង្វើ អាក្រក់ក្រុមខ្លួនតែប៉ុណ្ណោះ ព្រោះរថយន្តទាំងនោះ ភាគច្រើនជារថយន្តសេរីទំនើប ត្រូវគេយកមកពីថៃតាមច្រករបៀងខុសច្បាប់ ។ ប៉ុន្តែដោយសំអាងថាលោកស្នងការមិនមាត់ទើបហ៊ានប្រព្រឹតបែបនេះ ។
លោក ខែម សុភណ័ ដែលត្រូវបានប្រភពលួចទម្លាយនោះ នាព្រឹកម្សិលមិញ សារព័ត៌មានយើង មិនអាចស៊ំឲ្យលោកជួយបំភ្លឺបាននៅឡើយទេ គិតត្រឹមថ្ងៃទី១០តុលា២០១៧នេះ ។ ដូចគ្នាដែរលោក ឧត្តមសេនីយ៏ផ្កាយ អាត់ខែម ស្នងការខេត្ត បន្ទាយមានជ័យ ក៏មិនអាចសុំឲ្យលោកធើ្វការអត្ថាធិប្បាយបាយពីករណីមានសេចក្តីរាយការណ៍ថាមានកូនប្រុសលោកជាអ្នករកស៊ីនាំម៉ូតូគេចពន្ធចូលតាមច្រករបៀងបានដែរ៕ ? ។