ភ្នំពេញ ៖ កញ្ញា ឌុច លីដា តារាស្រីល្បីក្នុងរឿងស្រីវេទនមន្តនិងរឿងស្បែកគង់ បានផ្ទុះជម្លោះបែកផ្សែងជាមួយថៅកែកុនគឺលោកគាំចន្ធី ដោយសារតែមិនព្រមបើលុយ៥០ភាគរយ ថ្លៃនាងសម្តែង ។ ក្រោយពី ឌុច លីដា បានបង្ហោះលើផេកផ្ទាល់ខ្លួន ជុំវិញករណីរឿងផលិតករក្រឡិចក្រឡុចនិងគេចវេះ មិនព្រមបើកលុយថ្លៃសម្ដែង អោយនាងតាមហ្វេសប៊ុក លោក គាំ ចន្ធី ថៅកែផលិតកម្ម FCI បានចេញមុខមកប្រកាសតែម្ដងថាផលិតករដែល ឌុច លីដា ដែលបានបង្ហោះបង្ខូចឈ្មោះដោយមិនបញ្ជាក់អត្តសញ្ញាណនោះ គឺលោកដោយសារតែមុនការបង្ហោះរបស់នាងប៉ុន្មានម៉ោង គឺនាងនិងលោកផ្ទុះសម្ដីដាក់គ្នាធ្ងន់ៗ។
លោកប្រកាសថា មិនខ្វះលុយត្រឹម៥០ភាគរយបើកអោយនាងនោះទេ បើនាងពិតជាបានបំពេញការងារច្បាស់លាស់ជាមួយនឹងផលិតកម្ម FCI របស់លោក ក្នុងនោះលោកប្រកាសដាក់បណ្ដឹងបន្ថែមពីលើការបកអាក្រាតផងដែរ ប្រសិនបើនាងស្រាប់តែឈប់ថតរឿងអោយលោកក្រោយផ្ទុះចម្រូងចម្រាស់។លោក គាំ ចន្ធី និយាយថា ឌុច លីដា បានកុងត្រាថតរឿងភាគអោយលោកក្រោមចំណងជើងថា «ទូកបាត់ច្រវ៉ា» ដោយក្នុងពេលកុងត្រា នាងបានសន្យាអោយថ្ងៃថតលើសពីមួយថ្ងៃក្នុងមួយសប្ដាហ៍ ប៉ុន្តែភាគតិចដែលនាងគោរពពាក្យសន្យា ក្នុងពេលដែលនៅថ្ងៃខ្លះនាងមកយឺតយ៉ាវដល់ទៅមួយព្រឹកៗធ្វើអោយលោកខាតបង់។
លោកថា ឌុច លីដា បានសន្យាជាមួយលោកថាក្នុងអំឡុងខែ៦ នាងអោយមួយសប្ដាហ៍មួយថ្ងៃ ខែ៧អោយ២ថ្ងៃ និងអំឡុងខែ៨ នាងអោយមួយសប្ដាហ៍៣ថ្ងៃ ប៉ុន្តែតិចណាស់ដែលនាងអោយមួយសប្ដាហ៍៣ថ្ងៃតាមការព្រមព្រៀង ។ លោកថាក្រោយទទួលនាងអោយសម្ដែងជាតួក្នុងរឿង «ទូកបាត់ច្រវ៉ា» លោកមានសម្ពាធយ៉ាងខ្លាំងដោយសារតែនាងជាអ្នកធ្វើអោយយឺតយ៉ាវចំពោះការផលិតរបស់លោក ខណៈដែលរឿង «ទូកបាត់ច្រវ៉ា» ត្រូវដាក់ផ្សាយលើកញ្ចក់ទូរទស្សន៍ PNN តាំងពីថ្ងៃទី១៦ ខែ៩ ប៉ុន្តែរហូតមកដល់ពេលនេះនៅថតមិនទាន់ចប់ ដោយសារតែ ឌុច លីដា អោយថ្ងៃតិចពេក ហើយក្នុងពេលមកថតម្ដងៗក៏សុំសម្រាក ព្រោះតែជាប់ស្រវឹងពីយប់និងជួនកាលគឺណាត់ម៉ោង៦ព្រឹក មកថតម៉ោង៨ និងម៉ោង១០ជាដើម។
លោក គាំ ចន្ធ បានពន្យល់ពីហេតុផលនៃជម្លោះ រហូតធ្វើអោយ ឌុច លីដា បង្ហោះសារជាធារណៈនោះថា កាលពីថ្ងៃទី១០ តុលា នាងបានទាក់ទងមកសុំបើកលុយពីលោកចំនួន៥០ភាគរយ ហើយលោកក៏បានណាត់អោយនាងមកយកពីលោកនៅទូរទស្សន៍អប្សរានៅវេលាម៉ោង១០ព្រឹក។
ប៉ុន្តែរហូតដល់ម៉ោង៥ល្ងាច ទើបមានមនុស្សម្នាក់ផ្សេងទៀតដែលអះអាងថាជាបងប្រុសរបស់នាងទាក់ទងមកសុំបើកលុយ ដោយចំពេលលោកជាប់ណាត់ហើយចេញទៅក្រៅទៅហើយ ទើបលោកស្នើអោយចាំបើកថ្ងៃស្អែក(ថ្ងៃទី១១ តុលា)ម៉ោង១០ព្រឹកជំនួសវិញ ដោយអ្នកនិយាយជាមួយលោកនោះក៏បានទាំងឆ្លើយអូខេ។ប៉ុន្តែមិនដល់ប៉ុន្មាននាទីក្រោយមកផង ឌុច លីដា ក៏បានផ្ញើសំឡេងមកលោកមាក់ងាយចំពោះលោកយ៉ាងខ្លាំងដោយនាងនិយាយថាលុយនោះ គឺលុយដែលនាងខំសម្ដែង មិនមែនលុយនាងសុំលោកនោះទេ ទើបបណ្ដាលអោយផ្ទុះពាក្យសម្ដីដាក់គ្នាទៅវិញទៅមក។
លោកថាកាន់តែឆេះដុំខ្លាំងឡើង ក្នុងពេលដែល ឌុច លីដា បង្ហោះសារជាសាធារណៈនៅលើហ្វេសប៊ុក ដោយលោកប្រកាសថាបើនាងជ្រុលជាហ៊ានធ្វើបែបនេះទៅហើយ លោកក៏លែងបន្តទុកមុខអោយនាងទៀតដែរ។ លោកបានបញ្ជាក់ថា ក្នុងកិច្ចកុងត្រាអត់មានកំណត់ថានាងថតបានប៉ុន្មានភាគបើកលុយប៉ុន្មានភាគរយទេ គឺនោះជាការចរចារវាងលោកនិងនាងសុទ្ធសាធ តែបើមានគឺនាងត្រូវកំណត់មកថតអោយលោក អោយបានចប់ប៉ុណ្ណេះភាគប៉ុណ្ណោះភាគនិងកំណត់កាត់លុយជាដើម បើនាងមកយឺតចាប់ពី២ម៉ោងឡើងទៅ។
លោកគាំចន្ធីអះអាងថារឿង «ទូកបាត់ច្រវ៉ា» ទើបតែថតបានជាង២០ភាគប៉ុណ្ណោះ ក្នុងចំណោម៣០ភាគ ហើយលោកនឹងមានវិធានការចំពោះ ឌុច លីដា ផងដែរ ប្រសិនបើក្រោយផ្ទុះចម្រូងចម្រាស់ស្រាប់តែ ឌុច លីដា មិនព្រមមកថតបញ្ចប់រឿងអោយលោកតាមការកំណត់ក្នុងកុងត្រា។លោកនិយាយថាលោកនឹងសម្រេចកែប្រែខ្លឹមសារដោយតម្រូវអោយតួឯកស្លាប់កណ្ដាលទី ហើយដាក់ជំនួសតួអង្គមួយថ្មី ប៉ុន្តែបើឈានដល់ដំណាក់កាលត្រូវផ្លាស់ប្ដូរសាច់រឿងនោះមែន លោកនឹងក៏រៀបមេធាវីដាក់បណ្ដឹង ឌុច លីដា អោយសងថ្លៃការផលិតចំពោះលោកទាំងស្រុងតាំងពីការចំណាយផលិតពីដើមរឿងមកទល់នឹងពេលនាងបញ្ឈប់ការសម្ដែងនោះផងដែរ។
មុនឈានដល់កម្តៅ តារាសម្ដែងនាង ឌុច លីដា បានអះអាងថានាងមានទម្លាប់ពិបាកតែជាមួយផលិតករដែលមិនច្បាស់លាស់ការងារជាមួយនាងប៉ុណ្ណោះ។ នាងបានលើកឧទាហរណ៍ថាដូចជាករណីពេលនាងចេញថតអោយអ្នកស្រី ពាន់ ភួងបុប្ផា គឺអ្នកស្រីច្បាស់លាស់ទាំងម៉ោងពេលថត និងថ្ងៃថតទើបនាងសុខចិត្តមិនហ៊ានដេក និងមិនហ៊ានសម្រាកដើម្បីកុំអោយខកខានចំពោះការងារ ក្នុងនោះចំពោះលុយកាក់ក៏នាងប្រកាសថាអ្នកស្រីច្បាស់លាស់ជាមួយនឹងផងដែរ ៕
