ភ្នំពេញ៖ អភិបាលរាជធានីភ្នំពេញ លោក ឃួង ស្រេង បានជម្រុញ ឲ្យមន្ទីរសាធារណៈការ និងមន្ត្រីពាក់ព័ន្ធ រួមជាមួយ អាជ្ញាធរ ដែនដី ត្រូវ ពន្លឿនការបុកស៊ីផាយប្រឡាយបឹងត្របែកនិងការពារការរំលោភ ប្រឡាយនិងតួបឹងទាំងមូលអោយបាន ដើម្បីទុកជាអាងសម្រាប់រំដោះជំនន់ទឹកភ្លៀងដែលជនលិចរាជធានីភ្នំពេញ។
ការជម្រុញបែបនេះរបស់លោក ឃួង ស្រេងត្រូវបានធ្វើឡើងរសៀលថ្ងៃទី១០ ខែតុលា ឆ្នាំ២០១៧ ក្នុងកិច្ចប្រជុំក្រុមការងារបច្ចេកទេស ដើម្បីពិភាក្សាពន្លឿនការរៀបចំជញ្ជាំងបេតុងសងខាងមាត់ប្រឡាយ និងអាងស្តុកបឹងត្របែក ជាមួយមន្ទីរជំនាញ មានមន្ទីរ សាធារណការនិងដឹកជញ្ជូនរាជធានីភ្នំពេញ មន្ទីរធនធានទឹកនិងឧតុនិយម មន្ទីររៀបចំដែនដីនគររូបនីយកម្មសំនង់និងសុរិយាដីរាជធានី និងអាជ្ញាធរខណ្ឌពាក់ព័ន្ធផងដែរ។
លោកម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបានអោយដឹងក្រោយកិច្ចប្រជុំនេះថា ប្រឡាយបឹងត្របែកត្រូវបានរដ្ឋបាលរាជធានីបាននឹងកំពុងបុកស៊ីផាយធ្វើជញ្ជាំងប្រឡាយ ហើយលើកកិច្ចការងារនេះ ក្នុងកិច្ចប្រជុំខាងលើលោកអភិបាលរាជធានីបានជម្រុញអោយមន្ត្រីពាក់ព័ន្ធ និងអាជ្ញាធរពន្លឿនការបុកស៊ីផាយប្រឡាយបឹងត្របែកនិងការពារការរំលោភ ប្រឡាយនិងតួបឹងទាំងមូលអោយបាន ដើម្បីទុកជាអាងសម្រាប់រំដោះជំនន់ទឹកភ្លៀងដែលជនលិចរាជធានីភ្នំពេញ។
លោកឃួង ស្រេង បានលើកឡើងថា តាមពិតទៅប្រជាពលរដ្ឋរស់នៅប្រឡាយនិងតួបឹងត្របែក ប្រមាណ៨០%គឺពួកគាត់សុទ្ធសឹងតែមកជួលផ្ទះគេស្នាក់នៅប៉ុណ្ណោះ ហើយអ្នកដែលរំលោភយកប្រឡាយនេះពិតប្រាកដគឺមិនបានស្នាក់នៅផ្ទះរបស់ខ្លួនដែលរំលោភនោះទេ ដោយពួកគេយកផ្ទះទាំងនោះទៅជួលអោយប្រជាពលរដ្ឋក្រីក្រជួលស្នាក់នៅ។លោកបញ្ជាក់ថា អ្នកដែលរំលោភយកទ្រព្យសម្បត្តិសាធារណៈដើម្បីបម្រើផលប្រយោជន៍ផ្ទាល់ខ្លួន ជារឿងខុសច្បាប់ ដែលប្រឈមនិងមានទោសទណ្ឌបើតាមច្បាប់។ ដូច្នេះទេ អាជ្ញាធរពាក់ព័ន្ធទាំងអស់ត្រូវការពារប្រឡាយសាធារណៈរបស់រដ្ឋនេះអោយបាន ដើម្បីបម្រើផលប្រយោជន៍រួមទាំងអស់គ្នា៕
