ភ្នំពេញ ៖ បើពុំមានអ្វីប្រែប្រួលនោះ ទេ រថភ្លើងពីភ្នំពេញទៅទីក្រុងបាងកក ប្រទេសថៃ នឹងភ្ជាប់នៅឆ្នាំ២០២០ខាងមុខនេះ ហើយពេលនោះ អ្នកដំណើរនឹងមិនចាំបាច់ជិះយន្តហោះ រថយន្ដក្រុង ឬតាក់ស៊ីទៀតទេ ។
អ្នកនាំពាក្យនៃក្រសួងសាធារណការ និងដឹកជញ្ជូន លោក វ៉ា ស៊ីមសូរិយា បានថ្លែងតាមទូរស័ព្ទ ឲ្យដឹង ព្រឹកថ្ងៃទី១០ តុលា ថា៖ ផ្លូវរថភ្លើងភ្នំពេញ ភ្ជាប់ទៅកាន់ទីក្រុងបាងកក ប្រទេសថៃ កំពុងពន្លឿនការជួសជុល ដែលបានខូចខាតពីស្រុកមង្គលបុរី តភ្ជាប់មកខេត្តពោធិ៍សាត់ និងមកកាន់រាជធានីភ្នំពេញ និងកំពុងជួសជុលស្ថានីយមួយកន្លែងនៅក្នុងក្រុងប៉ោយប៉ែត ដើម្បីសម្រេចតាមផែនការរបស់ខ្លួនឆ្នាំ២០២០ ។
លោកបន្តថា៖ ផ្លូវរថភ្លើងបានតភ្ជាប់រួចហើយពីក្រុងប៉ោយប៉ែតប្រទេសកម្ពុជា និងខេត្តស្រះកែវ ប្រទេសថៃ ប៉ុន្តែដោយសារប្រទេសកម្ពុជាពុំមានថវិកាជួសជុលគ្រប់គ្រាន់ ទើបធ្វើឲ្យមានការយឺតយ៉ាវ ព្រោះកម្ពុជាប្រើប្រាស់ថវិកាជាតិទាំងស្រុងក្នុងការជួសជុល ។
លោកបញ្ជាក់ថា ៖ រថភ្លើងដែលគ្រោងនឹងដាក់ឲ្យដំណើរការពីភ្នំពេញ ទៅបាងកក អាចផ្ទុកទម្ងន់បានត្រឹមតែ១៥តោន ដែលមានលទ្ធភាពអាចផ្ទុកបានតែមនុស្ស និងដឹកទំនិញបានស្រាលៗប៉ុណ្ណោះ មិនដូចផ្លូវរថភ្លើងរត់ពីភ្នំពេញ ទៅកាន់ក្រុងព្រះសីហនុឡើយ ។
លោកបន្តថា ៖ភាគីកម្ពុជានឹងបន្តជជែកជាមួយភាគីថៃ ពីការសាងសង់ស្ថានីយនៅព្រំដែនដើម្បីផ្លាស់ប្តូរទូរថភ្លើង ការបង់ពន្ធ និងតម្លៃនៃការដឹកជញ្ជូនទំនិញចេញចូលនៃប្រទេសទាំងពីរ ។ ប្រមុខរដ្ឋាភិបាលកម្ពុជា និងថៃគ្រោងបង្កើនទំហំពា ណិជ្ជកម្មរវាងប្រទេសទាំងពីរ ឲ្យកើនដល់ចំនួន១៥ពាន់លានដុល្លារក្នុងឆ្នាំ២០២០ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងថា ការភ្ជាប់រថភ្លើងរវាងប្រទេសទាំងពីរជាសញ្ញាល្អនៃកិច្ចសហប្រតិបត្តិការទ្វេភាគីផង និងកិច្ចសហប្រតិបត្តិការក្នុងក្របខ័ណ្ឌតំបន់ផង ព្រោះបច្ចុប្បន្ន ប្រទេសទាំងពីរជាសមាជិកសហគមន៍អាស៊ានដូចគ្នា ។
លោកបន្តថា៖ ការដឹកជញ្ជូនផ្លូវដែកពិតជាមានសារសំខាន់ណាស់ ដោយសារវាជួយកាត់បន្ថយតម្លៃនៃការដឹកជញ្ជូន ផ្ទុកទំនិញបានច្រើន និងកាត់បន្ថយអត្រាគ្រោះថ្នាក់ចរាចរណ៍ជាដើម។
លោកបន្តថា ៖ ខ្ញុំស្វាគមន៍ការភ្ជាប់ខ្សែរថភ្លើងនេះ កាន់តែលឿនកាន់តែល្អ ព្រោះវាមិនត្រឹមតែជួយសម្រួលពាណិជ្ជកម្មនោះទេ តែក៏ទាក់ទាញភ្ញៀវទេសចរផងដែរ ។ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ បានថ្លែងថា ជារូបភាព គឺការភ្ជាប់បណ្តាញរថភ្លើងបែបនេះ ជារឿងល្អសម្រាប់ប្រទេសទាំងពីរ ដើម្បីសម្រួលលំហូរពាណិជ្ជកម្ម ការធ្វើដំណើរ និងការវិនិយោគ ប៉ុន្តែមានការលើកឡើងថា តើការភ្ជាប់រថភ្លើងនេះអាចមានទំនិញគ្រប់គ្រាន់សម្រាប់ដឹកឬទេ?ព្រោះមានការលើកឡើងពីកង្វះទំនិញសម្រាប់ដឹកជញ្ជូន ពិសេសទំនិញពីកម្ពុជាទៅកាន់ប្រទេសថៃ ដែលភាគច្រើនយើងមានតែកសិផល៕
