ភ្នំពេញ៖ ក្នុងដំណើរចុះពិនិត្យស្ថានភាពលិចលង់អោយទឹកជំនន់ទឹកភ្លៀងនៅរសៀលនិងល្ងាចថ្ងៃទី០៩ តុលានេះ អភិបាលរាជធានី លោកឃួង ស្រេង បានបញ្ជាយ៉ាងមុតមាំ ដោយឲ្យមន្ទីរជំនាញ និងអាជ្ញាធរដែនដីរួមគ្នា ដាក់គ្រឿងចក្រកាយប្រឡាយមេទាំងយប់ ដើម្បីរំដោះការលិចលង់នៅខណ្ឌជាយក្រុង។
លោកឃួង ស្រេង បានដឹកនាំ មន្ទីរសាធា រណការ និងដឹកជញ្ជូនរាជធានីភ្នំពេញនិងអាជ្ញាធរខណ្ឌពោធិសែនជ័យ បានបញ្ជាអោយ ស្ថាប័នទាំង២នេះរួមគ្នា ដាក់គ្រឿងចក្រកាយប្រឡាយ ទួលពង្រទាំងយប់ទាំងថ្ងៃ ពិសេសនៅយប់នេះត្រូវដាក់គ្រឿងចក្រ២គ្រឿង ដោយប្រឡាយនេះមានទួលនាទីយ៉ាងសំខាន់ក្នុងការរំដោះទឹក ពីខណ្ឌពោធិសែន ជ័យ ទៅកាន់ខណ្ឌដង្កោ និងខណ្ឌមានជ័យ ។
លោកហែម ដារិទ្ធ អភិបាលខណ្ឌពោធិសែនជ័យ បានបញ្ជាក់អោយដឹងថា ប្រឡាយទួលពង្រមានទទឹង១០ម៉ែត្រ ហើយប្រឡាយនេះបានដើរតួយ៉ាងសំខាន់ ក្នុងការរំដោះទឹកជំនន់ចេញពីសង្កាត់ ចោមចៅទី១ ចោមចៅទី២ និងចោមចៅទី៣ ខណ្ឌ ពោធិសែនជ័យ ។ ដោយមើលឃើញពីសារះសំខាន់នេះ ទើបអភិបាលរាជធានី បញ្ជាអោយមន្ទីរជំនាញ និងអាជ្ញាធររួមគ្នា ដាក់គ្រឿងចក្រ ចុះមកកាយប្រឡាយមេនេះទាំងយប់ ដើម្បីរំដោះការលិចលង់ នៅខណ្ឌជាយក្រុង ពិសេសនៅតំបន់ម្តុំសាលាក្តីខ្មែរក្រមាម។
ដើម្បីជាការលើកទឹកចិត្តអភិបាលរាជធានីក៏បានផ្តល់ការលើកទឹកចិត្តដោយអោយប្រាក់ម្នាក់ ២០ម៉ឺនរៀលទៅតៃកុង ដែលកាន់គ្រឿងចក្រទាំង ២គ្រឿងនេះផងដែរ សំខាន់គឺត្រូវតែ រំដោះទឹកលិច លង់នេះអោយបានក្នុងរយះពេល២ទៅ៣ថ្ងៃនេះ៕
