ខេត្តឧត្តរមានជយ័ ៖ សត្វដំរីញីមួយក្បាលរស់នៅក្នុងតំបន់អភិរក្សបរិស្ថានគូលែន-ព្រហ្មទេព ក្នុងស្រុកអន្លង់វែង ខេត្តឧត្តរមានជ័យ បានស្លាប់កាលពីល្ងាចម៉ោង ៥ថ្ងៃទី៦ ខែតុលា ឆ្នាំ២០១៧ ។លោក ដាយរីច ថូមសាន់ (Darrick Thomson) ជាជនជាតិអូស្ត្រាលី ដែលជាម្ចាស់អភិរក្សដំរី បានឱ្យដឹងថា ដំរីញីឈ្មោះ ខាំលីន បានស្លាប់ នេះមានអាយុជាង ៨០ឆ្នាំហើយ។
លោកបន្តថា ដំរីខាំលីន រួមនឹងសត្វដំរីញី ៣ក្បាលទៀត ដែលគាត់បានទិញ មកពីខេត្តមណ្ឌលគីរី ចំនួន ២ក្បាល និងខេត្តរតនគិរី ចំនួន ២ក្បាល នៅក្នុងអំឡុងឆ្នាំ២០១២ ដើម្បីធ្វើការអភិរក្ស និងសិក្សា ពីរបៀបរស់នៅសត្វដំរីក្នុងប្រទេសកម្ពុជា ក្រោយពីរាជរដ្ឋាភិបាលកម្ពុជា បានអនុញ្ញាតិឱ្យលោករៀបចំនៅទីតាំងតំបន់បរិស្ថានដែនគូលែន-ព្រហ្មពេទ ស្ថិតនៅប៉ែកឧត្តរនៃប្រទេសកម្ពុជា។
ដោយសារជំងឺចាស់ជរា ខាំលីន មានអាការៈធ្ងន់ដើរមិនរួចអស់រយៈពេលជាង មួយអាទិត្យមកហើយ ដែលក្រុមជំនាញពេទ្យសត្វ មកពីប្រទេសថៃ ប្រចាំការនៅតំបន់អភិរក្ស បានខិតខំព្យាយាម ព្យាបាលយ៉ាងណាក្តី តែក៏មិនអាចជួយបាន។
លោក ដាយរីច ថូមសាន់ (Darrick Thomson) បានបន្ថែមថា លោកមានការសោកស្ថាយចំពោះដំរីខាំលីន ដែលលោកអស់សមត្ថភាព ក្នុងការជួយសង្គ្រោះនាង ដោយសារតែវ័យចាស់ជរាពេក។ ហើយសាកសពដំរីនាង លោកបានរៀបចំកប់ទុកនៅក្បែរស្នាក់ការអភិរក្ស និងនិមន្តព្រះសង្ឃ សូត្រមន្តបង្ស្កុលទៅតាមប្រពៃណីខ្មែរ។