បន្ទាយមានជ័យ ៖ នៅក្រុងប៉ោយប៉ែតអាណាចក្ររបស់លោក ង៉ោ ម៉េងជ្រួន មានល្បែងជាច្រើនប្រភេទបាននិងកំពុងបើកលេងរីកដូចផ្សិតចិញ្ចឹម សមត្ថកិច្ច។ជាក់ស្តែងថ្មីៗនេះ មានអ្នកញៀនល្បែងម្នាក់ចាក់កន្ទុយលេខត្រូវតែសងមិនគ្រប់ទើបបែកធ្លាយរឿងនៅម្តុំចំណតរថយន្តក្រុងហៅបេនឡានក្នុងភូមិបាលិលេយ្យ១សង្កាត់និងក្រុងប៉ោយប៉ែតខេត្តបន្ទាយមានជ័យ ។
កាលពីរសៀលថ្ងៃទី១តុលាបុរសម្នាក់បានចាក់កន្ទុយលេខឆ្នោតសៀមប្រាក់ដើមចំនួន៥០០០បាតប្រាក់ថៃគឺចាក់លេខ៥២ ពេលត្រូវគិតជាប្រាក់ឈ្នះមានចំនួនជាង៤៥ម៉ឺនបាត ។ប៉ុន្តែក្រោយពីបានចាក់ត្រូវនោះអ្នកលក់កន្ទុយលេខឆ្នោតខុសច្បាប់ សងតែ៩១០០០បាតតែប៉ុណ្ណោះ ដោយអះអាងថាថ្ងៃនោះទទួលកត់ជ្រុលហើយពេលឡើងមេ គេមិនទទួល។មេរកម្ចាស់ប្រាក់ដើម្បីប្រគល់លុយវិញតែគ្មានលេខទូរស័ព្ទទាក់ទង។
ជនរងគ្រោះពីការញៀនល្បែងខុសច្បាប់ត្រូវបានគេស្គាល់ថាឈ្មោះចិត្តភេទប្រុសអាយុជាង៣០ឆ្នាំមានទីលំនៅក្នុងក្រុងប៉ោយប៉ែត។ប្រភពពីអ្នករាយការណ៍ឲ្យដឹងថា៖ថាជនរងគ្រោះក្រោយពីគេសងប្រាក់មិនគ្រប់បានរត់រកការអន្តរាគមន៏ ឲ្យជួយពីអាវុធហត្ថម្នាក់នៅក្រុងសិរីសោភ័ណទើបបានប្រាក់មួយចំនួនដូចខាងលើ។ជុំវិញប្រភពព័ត៌មាននេះគ្រួសារមួយដែលរងការចោទប្រកាន់ថា ជាអ្នកលក់ឆ្នោតខុសច្បាប់មិនទទួលខុសត្រូវមិនប្រាប់ពីអត្តសញ្ញាណ បានបដិសេធថាគ្រួសារគាត់ពុំមែនជាអ្នកលក់ឆ្នោតទេ គឺលក់ចាបហួយនិងហ្គាស់តែប៉ុណ្ណោះ។
ប៉ុន្តែបុរសមេគ្រួសារនេះប្រឡូយសំដីថាករណីខាងលើជនរងគ្រោះនិងមេឆ្នោតធំ បានសម្រុះសម្រួលគ្នារួចរាល់អស់ហើយៗថាករណីនឹងគេបញ្ចប់នៅឯកន្លែងប៉េអឹម។លោកសសុភក្ត្រាមេបញ្ជាការរងស្តីទីអាវុធហត្ថក្រុងប៉ោយប៉ែតបានបដិសេធតាមទូរស័ព្ទថាលោកមិនទាន់ទទួលបានព័ត៌មានហ្នឹងនៅឡើយទេ ហើយថាពុំទាន់ឃើញមានជនរងគ្រោះមកដាក់ពាក្យបណ្តឹងនៅឡើយដែរ។
នៅរសៀលថ្ងៃទី៦តុលា២០១៧នេះបុរសម្នាក់ដែលគេស្គាល់ថាជាសាច់ញាតិអាវុធហត្ថក្រុងប៉ោយប៉ែតម្នាក់បានទាក់ទងប្រាប់តាមទូរស័ព្ទមកថា៖រឿងដែលបុរសម្នាក់លើកឡើងថាខ្លួនចាក់ឆ្នោតត្រូវ៥០០០បាតថ្ងៃចេញឆ្នោតថៃនោះវាជារឿងមិនពិតដោយលោកថាការពិតការចាក់នោះត្រូវតែ១០០០បាតទេ។លោកបន្តថាថ្ងៃនោះបុរសនោះចាក់អស់ប្រាក់៥ពាន់បាតក្រោយបានកន្ទុយលេខហើយក៌ចេញទៅបាត់លុះអ្នកលក់ឆ្នោត ទាក់ទងទៅមេឆ្នោតធំគេប្រាប់ថាគេទទួលបានត្រឹមតែ១០០០បាតនិងថាបិទលេខ៥២ឈប់ឲ្យលក់ហើយធ្វើឲ្យអ្នកលក់ឆ្នោតកើតក្តីកង្វល់ពេលរកអ្នកចាក់ដើម្បីនិយាយគ្នាឲ្យប្រាក់៤០០០4បាតវិញតែបុរសនោះចេញទៅបាត់។
បុរសដដែលបន្តថាដោយមានការតវ៉ាគ្នាតាមរយៈអាវុធហត្ថម្នាក់នៅក្រុងសិរីសោភ័ណក៏ឈានទៅសម្រុះសម្រួលគ្នាដោយភាគីអ្នកលក់កន្ទុយលេខបានសងប្រាក់ទៅអ្នកចាក់ចំនួន៩១០០០បាតរួចហើយ។ប្រភពមួយបានឲ្យដឹងមកថា មេធំល្បែងឆ្នោតសៀមនៅក្រុងប៉ោយប៉ែតនោះជាមេបញ្ជាការរងមូលដ្ឋានអាវុធហត្ថក្រុងប៉ោយប៉ែតទៀតផង ហើយថាមន្ត្រីមេបញ្ជាការរងម្នាក់នោះក៏បានបើកល្បែងអនឡាញខ្នាតយក្សមួយដែរនៅប្លុកដើមពុទ្រា ក្រុងប៉ោយប៉ែតនោះដែរ ។
គួរបញ្ជាក់ថាមួយរយៈចុងក្រោយនេះនៅក្រុងប៉ោយប៉ែតល្បែងស៊ីសងអបាយមុខបានបាននិងកំពុងកើតមានយ៉ាងពេញបន្ទុក រួមមានអនឡាញអ៊ិនធឺណិត ចាក់ភ្នាល់បាល់និងល្បែងកន្ទុយលេខនេះមិនទាន់បូករួមកាស៊ីណួមួយចំនួនធំទៀត ដែលកំពុងបើកភ្លើងខៀវឲ្យពលរដ្ឋខ្មែរចូលលេងយ៉ាងអាណាធិបតេយ្យផង។
គេមិនដឹងថាតើហេតុអ្វីបានជា លោកសួន ប វរ អភិបាលខេត្តបន្ទាយមាន មើលមិនឃើញបញ្ហាទាំងនេះនោះទេ?។ព្រោះបើតាមបទបញ្ជានាយករដ្ឋមន្ត្រីតេជោសែនហាមមិនឲ្យមានខ្មែរចូលលេងល្បែង សមត្តកិច្ចគប្បីមានវិធានការតឹងរឹងលើករណីបនល្បែងស៊ីសងខាងលើ ដើម្បីរក្សាបានសុខសន្តិភាពជូនពលរដ្ឋ។ក្នុងនោះលោកអភិបាលខេត្តគួដាស់តឿន មេបញ្ជាការកងរាជអាវុធហត្ថ និងលោកស្នងការនគរបាលខេត្តបន្ទាយមានជ័យ ដែលជាស្ថាបន័និតិប្រតិបត្តិឲ្យមានវិធានទប់ស្កាត់ និងបង្ក្រាបនោះទើបជាការត្រឹមត្រូវ ៕
