ភ្នំពេញ៖ករណីយ៍មន្ត្រីនគរបាលម្នាក់បង្ករបួសស្នាមដល់ភ្នែកសន្តិសុខរោងចក្ររហូតចូលដេកពេទ្យដល់វគ្គឆ្លើយដាក់គ្នា។រឿងអាងខ្លួនជានគរបាលវ៉ៃគេបែកភ្នែកនេះ បានកើតឡើងកាលពីវេលាម៉ោង១០:០៥នាទីយប់ថ្ងៃទី៥ ខែតុលា ឆ្នាំ២០១៧ ស្ថិតតាមបណ្តោយផ្លូវជាតិលេខ៥ ក្នុងសង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ។ ក្រោយពេលបង្ក របួសស្នាមបុរសម្នាក់ដែល បានអះអាងខ្លួនជាឧត្ដមសេនីយ៍ត្រូវបានគេស្គាល់ឈ្មោះទីចំរើនកុសល តួនាទីអនុប្រធាននាយកដ្ឋានកិច្ចការនគរបាលប៉ុស្តិរដ្ឋបាលនៅក្រសួងមហាផ្ទៃ បានព្យាយាមបើករថយន្តរត់ ប៉ុន្តែត្រូវសមត្ថកិច្ចចំនួន២ខណ្ឌ សហការគ្នាចាប់បាន ។
ប្រជាពលរដ្ឋ ដែលឃើញហេតុការណ៍ បានឲ្យដឹងថា លោកទីចំរើនកុសល បានប្រើអំពើហិង្សាលើសន្តិសុខ ដែលជាអ្នកយាមរោងចក្រមួយកន្លែងមានឈ្មោះ Sportex និងបានយកស្ព្រៃយ៍បាញ់ចូលភ្នែកសន្តិសុខរូបនោះទៀត បណ្តាលឲ្យសន្តិសុខរូបនោះមានឈ្មោះហែមសារុំអាយុ៤៧ឆ្នាំរងរបួសភ្នែក ត្រូវបានគេដឹកយកទៅមន្ទីរពេទ្យធ្វើការព្យាបាលភ្លាម។ឯសន្តិសុខម្នាក់ទៀតដែលត្រូវបាញ់ស្ប្រៃចូលភ្នែកឈ្មោះហឿងម៉ាលី។ឧត្តមសេនីយ៍រូបនោះ ក៏បានព្យាយាមបើករថយន្តរត់គេចខ្លួន តាំងពីខណ្ឌឫស្សីកែវ រហូតចូលមកដល់ខណ្ឌព្រែកព្នៅ ក៏សមត្ថកិច្ចខណ្ឌឫស្សីកែវ សហការជាមួយសមត្ថកិច្ចខណ្ឌព្រែកព្នៅ ឃាត់បានទាំងរថយន្ត ទាំងមនុស្ស។
លោកឧត្តមសេនីយ៍ទីចំរើនកុសល បានបកស្រាយថា មុនពេលកើតហេតុ រូបគាត់ បានបើករថយន្តម៉ាក ឡិចស៊ីស LX 470 ពណ៌ស ពាក់ស្លាកលេខភ្នំពេញ 2AF- 6181 ធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង ខណ:ពេលកំពុងតែធ្វើដំណើរ ស្រាប់តែមានរថយន្តកុងតឺន័រមួយគ្រឿង មិនចាំស្លាកលេខ បើកបរបញ្ច្រាសទិសគ្នា បានបើកចូលមកផ្លូវរបស់គាត់ ដោយមិនស៊ីញូ និងឈប់កាក់មុខរថយន្តគាត់ទៀត ។
គាត់ក៏បានដើរទៅសួរអ្នកបើកបររថយន្ត កុងទឺន័រថា តើប្អូនមានប័ណ្ណបើកបរដែរ ឬក៏អត់ ចំណែកអ្នកបើកបររថយន្តកុងតឺន័រ ឆ្លើយថា គាត់មាន។ គាត់ (ឧត្តមសេនីយ៍) បន្តសួរទៀតថា បើប្អូនមានប័ណ្ណបើកបរ តើប័ណ្ណនោះធ្វើត្រូវ ឬក៏ខុស បើផ្លូវនៅខាងនោះ ហើយប្អូនបើកបត់ចូលមកផ្លូវរបស់គេ។
បុរសខាងលើ បានបន្ថែមទៀតថា ខណៈពេលកំពុងជជែកគ្នា អ្នកបើកបររថយន្តកុងតឺន័រ បានដើរចូលទៅរោងចក្រ Sportex ភ្លាមៗនោះ លោកក៏បានដើរតាម ហើយហៅអ្នកបើកបររថយន្ត កុងតឺន័រ ឲ្យត្រឡប់មកនិយាយគ្នាវិញ រំពេចនោះ ក៏មានប្រធានសន្តិសុខម្នាក់ ក្នុងរោងចក្រ បានហៅឲ្យសន្តិសុខ ដែលយាមទ្វារឲ្យបិទទ្វាររោងចក្រ ដើម្បីឃាត់រូបគាត់ តែគាត់ក៏បានដើរ ទៅរុញសន្តិសុខ ដែលជាអ្នកយាមទ្វារនោះចេញ ដើម្បីកុំសនិ្តសុខឲ្យបិទទ្វារ ហើយគាត់ក៏បានទូរស័ព្ទទាក់ទងទៅខាងសមត្ថកិច្ចឲ្យមកអន្តរាគមន៍ ពេលសមត្ថកិច្ចចុះមកដល់ សមត្ថកិច្ចក៏បានឲ្យគាត់ចាកចេញពីកន្លែងកើតហេតុតែម្តង។
លោកឧត្តមសេនីយ៍ ទី ចំរើនកុសល ថារូបលោកមិនបានវាយនិងបាញ់ស្ប្រៃចូលភ្នែកហើយក៏មិនបានបើករថយន្តរត់គេចនោះទេ គឺបើករថយន្តមកតាមផ្លូវធម្មតាតែប៉ុណ្ណោះ?។
ចាំមើលមើលថាតើខាងណាខុសបើតាមរូបភាពជាក់ស្តែងគឺខាងសន្តិសុខពីនាក់បានរងរបួសភ្នែកជាភស្តុតាងចឹង!។