ព្រៃវែង៖ លោក អ៊ុក សំណាងប្រធានមន្ទីរកសិកម្មខេត្តព្រៃវែង និងបក្ខពួកចំនួន៣រូប បច្ចុប្បន្ន បានធ្វើអោយមន្ត្រីភាគច្រើន នៅក្នុងមន្ទីរ កើតការក្ដៅក្រហាយយ៉ាងខ្លាំង ដោយសារពួកគេ ឃុបឃឹតគ្នា កឹបកេងថវិកាជាតិ លើខ្ទង់ចំណាយរបស់មន្ទីរមិនតែប៉ុណ្ណោះថែមទាំងទាមទារយកលុយបេសកកម្មចំនួន៣៥% ពីមន្ត្រីដែលចុះបេសកម្ម ។ ចាប់តាំងពី លោក អ៊ុក សំណាង ត្រូវបានតែងតាំងជាអនុប្រធានក្ដាប់រួម និងជាប្រធានមន្ទីរ បន្តតំណែង ពីលោក យស់ មុន្នី មកនោះ លោក អ៊ុក សំណាង បានសហការ ជាមួយលោកអនុប្រធានមន្ទីរ សំ សារុន លោកប្រធានការិយាល័យ គណនេយ្យ ស្រស់ ហ៊ុន និងលោកស្រីប្រធានការិយាល័យរដ្ឋបាល ប៊ន វុទ្ធា និងមន្ត្រីហែហមមួយក្ដាប់តូចធ្វើសកម្មភាពក្បៀស ។ រាល់ការងារ និងការចំណាយទាំងអស់ គឺគេធ្វើឡើងដោយស្ងាត់ៗ តែលោកប្រធានមន្ទីរ និងបក្ខពួក៣រូបប៉ុណ្ណោះ ។
ឯអនុប្រធានមន្ទីរ ចំនួន២រូបគឺលោកស្រី យឺម អ៊ុត លោក ជុំ ចន្ទរ៉ា និងមន្ត្រីសំខាន់ៗ ជាច្រើនរូបទៀតត្រូវបានគេរាយការណ៍ថាមោគសុទ្ធព្រោះ លោក អ៊ុក សំណាង យកភ្នែកមើលនោះទេ ។ ថវិកាសម្រាប់អន្តរាគមន៍ និងថវិកាកម្មវិធីមិនបានយកទៅប្រើប្រាស់តាមចំនួនប្រចាំឆ្នាំទេ គឺយកទៅមិនលើសពី១០% ចាប់តាំងពីឆ្នាំ២០១៥ រហូតឆ្នាំ២០១៦ត្រូវលោក អ៊ុក សំណាង និងបក្ខពួកស៊ីដាច់ រួមទាំងប្រេងសម្រាប់ចុះបេសកកម្មរបស់មន្ត្រីទៅបូមទឹក ។
ប្រភពបង្ហើបថា៖ លោក អ៊ុក សំណាង បានលេងល្បិច និងសហការជាមួយក្រុមហ៊ុន បំប៉ោងគម្រោងជុសជុលអគារមន្ទីររយៈពេលពីឆ្នាំជាប់គ្នា ឆ្នាំ២០១៤ ២០១៥ ដោយចំណាយសរុបអស់ទឹកប្រាក់ជាង១៥០០លានរៀល តែបើតម្លៃពិតមិនលើសពី៨០លានរៀល ។ អគារជុសជុលបានរយៈពេលមិនដល់ពីរឆ្នាំផង មកនេះបានធ្លុះធ្លាយ និងហូរជ្រាបទឹកនៅក្នុងរដូវវស្សានេះ ធ្វើអោយមន្ត្រីពិបាកអង្គុយធ្វើការថែមទៀត ។
សម្រាប់ឆ្នាំ២០១៧នេះ ការចំណាយប្រាក់តាមកម្មវិធី នៅតាមរិយាល័យចំណុះមន្ទីរ មិនមានប្រាក់ចំណាយ មិនដឹងថា លោក អ៊ុក សំណាង យកប្រាក់ទៅណាអស់? រាល់សកម្មភាពត្រូវគាំងតែម្ដង ។ ប្រភពបានបញ្ជាក់ថា នៅថ្ងៃទី ២៥ ដល់ ថ្ងៃ ៣០ កញ្ញាឆ្នាំ ២០១៧ ក្រុមអធិការកិច្ចក្រសួងកសិកម្ម ដឹកដោយលោកអគ្គាធិការ គឹម សុន និងលោកអគ្គាធិការរង គង់ វ៉ាយ រួមនិងសហការី បានចុះត្រួតពិនិត្យ នៅមន្ទីរកសិកម្មខេត្តព្រៃវែង ក្នុងពេលចុះពិនិត្យ មន្ត្រីជាច្រើនបានរាយការណ៏ពីអំពើពុករលួយ របស់លោក អ៊ុក សំណាង រួមនិងបក្ខពួកប្រាប់គណៈប្រតិភូក្រសួង និងស្នើរសុំជួយដោះស្រាយករណីនេះទៀតផង ។
ទាក់ទងករណីនេះ អ្នកយកព័ត៏មាន យើងមិនអាចសុំការបំភ្លឺពី លោកប្រធានមន្ទីរ អ៊ុក សំណាង បានទេដោយទូរស័ព្ទចូល ដឹងថាអ្នកកាសែត គាត់លែងនិយាយ និងផ្ដាច់ទូរសព្ទតែម្ដង ។
ចំណែក លោកអគ្គាធិការ គឹម សុន បានអះអាងថា លោកបានចុះទៅ តែលទ្ធផលកំពុងផ្ទៀងផ្ទាត់ ។
សម្រាប់លោក វ៉េង សាខុន រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ បានមានប្រសាសន៍ថា ករណីនេះលោករដ្ឋមន្ត្រី បានជ្រាប់ហើយ ហើយត្រៀមនឹងចាត់ការទៀតផង ៕
